Números 28 - Bible in Tzeltal Bachajón

Mahtaniletic scuenta jujun c'ahc'al

¹ Te Jehová hich la yalbe te Moisés:

² Pasa ta mandar te snich'nab Israel: Ya me awil te yac awa'bonic ta mero yorahil te mahtaniletic cu'un, ha te mahtaniletic scuenta sumet yic' te ya yich' chiq'uel ta jtojol.

³ Soc hich me xawalbe: Ha ini te chic'bil mahtanil te yac awa'beyic te Jehová: cha'coht tuminchijetic te jujun ya'bilal te mayuc bin jihnem yu'unic, scuenta scohtol chic'bil mahtanil jujun c'ahc'al.

⁴ Jcoht yac awac' ta sab, jcoht ta xtibiltay;

⁵ soc jun ta slajunebal efa lequil harina wots'bil soc jun ta schanebal hin aceite yu'un pits'bil oliva.

⁶ Ha scohtol chic'bil mahtanil te ya yich' aq'uel spisil ora, te halbot sc'oblal ta wits Sinaí, te ha chic'bil mahtanil te sumet yic' ta stojol Jehová.

⁷ Te malbil mahtanil yu'un: ha jun ta schanebal hin te ya yich' aq'uel soc te jujucoht tuminchij. Ya me amal te lequil vino ta stojol Jehová ta ch'ul awilal.

⁸ Te schebal tuminchij ya me awac' ta xtibiltay, soc ha nix hich yac awac' te mahtanil harina soc te malbil mahtanil te yac awac' ta sab. Ha chic'bil mahtanil te sumet yic' ta stojol Jehová.

Mahtaniletic scuenta jujun semana soc jujun u

⁹ Ta sc'ahc'alel cux-o'tan ya me awaq'uic cha'coht tuminchijetic te jujun ya'bilal te mayuc bin jihnem yu'unic, soc cheb ta slajunebal efa lequil harina wots'bil soc aceite, soc te malbil mahtanil yu'une.

¹⁰ Ha te scohtol chic'bil mahtanil te ya yich' aq'uel ta jujun sc'ahc'alel cux-o'tan, parte a te scohtol chic'bil mahtanil ya yich' aq'uel jujun c'ahc'al soc te malbil mahtanil yu'une.

¹¹ Ta shahchibal te jujun u ya me awa'beyic scuenta scohtol chic'bil mahtanil te Jehová cha'coht jcolel toro, jcoht tat tuminchij, soc huqueb tuminchijetic te jujun ya'bilal te mayuc bin jihnem yu'unic;

¹² oxeb ta slajunebal efa lequil harina wots'bil ta aceite yac awac' soc te jujucoht jcolel toro; cheb ta slajunebal efa harina wots'bil ta aceite yac awac' soc jcoht tat tuminchij;

¹³ soc jun ta slajunebal efa lequil harina wots'bil ta aceite yac awac' soc jujucoht tuminchij. Ha scohtol chic'bil mahtanil te sumet yic', ha chic'bil mahtanil ta stojol Jehová.

¹⁴ Te malbil mahtanil vino, ha j'ohlil hin soc te jujucoht jcolel toro, jun ta yoxebal hin soc te jujucoht tat tuminchij, soc jun ta schebal hin soc te jujucoht tuminchij. Ha te scohtol chic'bil mahtanil yu'un jujun u ta sjunal ha'bil.

¹⁵ Soc ya me yich' a'beyel Jehová jcoht tat tentsun scuenta mahtanil yu'un stojel mulil; parte a te scohtol chic'bil mahtanil te ya yich' aq'uel spisil ora soc te malbil mahtanil yu'une.

Mahtaniletic yu'un te muc'ul q'uinetic

¹⁶ Ta schanlajunebal (14) c'ahc'al yu'un shahchel u yu'un te ha'bil, ha me te Q'uin Pascua yu'un Jehová.

¹⁷ Ta yo'lajunebal (15) c'ahc'al ta u ini ha te q'uin abi: huqueb c'ahc'al yac awe'ic pan te ma ba yich'oj levadura.

¹⁸ Ta sba c'ahc'alil ay me ch'ul tsoblej; ma me xapas awa'telic a.

¹⁹ Ya me awa'beyic scuenta scohtol chic'bil mahtanil te Jehová cha'coht jcolel toro, jcoht tat tuminchij, soc huqueb tuminchijetic te jujun ya'bilal, te mayuc bin jihnem yu'unic.

²⁰ Te mahtanil harina wots'bil ta aceite, ha oxeb ta slajunebal efa soc jujucoht jcolel toro, cheb ta slajunebal efa soc jujucoht tat tuminchij,

²¹ soc jun ta slajunebal efa soc jujucoht tuminchij.

²² Soc ya me awaq'uic jcoht tat tentsun scuenta mahtanil yu'un stojel amulic.

²³ Ha me yac awaq'uic soc te scohtol chic'bil mahtanil te ya yich' aq'uel jujun sab ta spisil ora.

²⁴ Huqueb c'ahc'al hich me yac awaq'uic te we'elil soc te chic'bil mahtanil te sumet yic' ta stojol Jehová; ya yich' aq'uel soc te scohtol chic'bil mahtanil te ya yich' aq'uel spisil ora soc te malbil mahtanil yu'une.

²⁵ Ta shuquebal c'ahc'al ay me ch'ul tsoblej awu'unic; ma me xapas awa'telic a.

²⁶ Ta sc'ahc'alel te sba sit, te c'alal yac awa'beyic Jehová te sba sit ta yorahil te Q'uin yu'un Semanahetic, ay me ch'ul tsoblej awu'unic; ma me xapas awa'telic a.

²⁷ Ya me awaq'uic scuenta scohtol chic'bil mahtanil te sumet yic' ta stojol Jehová cha'coht jcolel toro, jcoht tat tuminchij, soc huqueb tuminchijetic te jujun ya'bilal,

²⁸ soc te mahtanil yu'unic, ha te lequil harina wots'bil ta aceite, oxeb ta slajunebal efa soc te jujucoht jcolel toro, cheb ta slajunebal efa soc te jcoht tat tuminchij,

²⁹ soc jun ta slajunebal efa soc te jujucoht tuminchij.

³⁰ Soc ya me awaq'uic jcoht tat tentsun scuenta stojel amulic.

³¹ Ya me awaq'uic te mahtaniletic ini soc te scohtol chic'bil mahtanil te ya yich' aq'uel spisil ora soc te mahtanil harina soc te malbil mahtanil yu'unic. Te chambahlametic ma me ayuc bin jihnem yu'unic.