Números 25 - Bible in Tzeltal Bachajón

Israeletic ta Baal-peor

¹ Te Israel c'alal ayic ta Sitim a hahch yic' yantsimbeyic te yantsil-nich'nab moabetic,

² te ha ic'otic bahel yu'unic ta banti ya yich' a'beyel milbil smahtan te diosetic yu'unique. We'ic te israeletic soc la squejan sbahic ta stojol te diosetic yu'unique.

³ Hich te pueblo la sjoquinic ta sch'uhuntayel te Baal-peor. Tihl hahchel yilimba Jehová yu'un ta stojol Israel.

⁴ Te Jehová hich la yalbe te Moisés: Tsoba spisil te príncipaletic yu'un te pueblo, johc'anlana ta te' ta c'ahc'alel ta stojol Jehová, hich ya xlahmaj a te yilimba Jehová ta stojol Israel, xchi.

⁵ Ha yu'un te Moisés la yalbe te juecetic yu'un Israel: Jujutuhlex ya me amilic te mach'atic ay awu'unic te la sjoquinic ta sch'uhuntayel te Baal-peor, xchi.

⁶ Ay jtuhl israel-winic te baht yic' tal jtuhl madianita-ants ta banti ay te yermanotac, ta sit Moisés soc spisil te pueblo Israel, te c'alal yaquic ta oq'uel a ta yochibal te Nahilpac' Templo yu'un tahojibal.

⁷ C'alal la yil te Finees snich'an Eleazar, te snich'an te sacerdote Aarón, loc' bahel ta yohlil te tsoblej, la yich' bahel slanza,

⁸ och bahel ta spat te israel-winic ta snahilpac', la slow ta sch'uht schebalic, ha te israel-winic soc te madianita-ants. Hich quehchaj te jmilawal-chamel ta yohlil te snich'nab Israel.

⁹ Cham oxpic (24,000) ta tuhl yu'un te jmilawal-chamel.

¹⁰ Hich te Jehová la yalbe te Moisés:

¹¹ Te Finees snich'an Eleazar, te snich'an te sacerdote Aarón, la yac' quehchajuc te quilimba ta stojol te snich'nab Israel, yu'un la yac' ta ilel ta stojolic te xut'et yo'tan te hich nix ay te bin ut'il te xut'et co'tan; ha scuentahil te ma ba jc'axel la jlajin te snich'nab Israel ta scuenta te xut'et co'tan.

¹² Ha yu'un hich me xawalbe: Ya jchap jc'op scuenta lamal q'uinal soc te Finees.

¹³ Ha yu'un ya xc'oht soc sts'umbal te chapbil-c'op scuenta sacerdotehil te ma xlaj sc'oblal, ta scaj te xut'et yo'tan yu'un te Dios yu'un, soc te la yac' te stojel mulil yu'un te snich'nab Israel, xchi sc'oblal.

¹⁴ Te israel-winic te laj soc te madianita-ants, Zimri sbihil, ha snich'an Salu, te jtsobaw yu'un te jchahp yu'un Simeón.

¹⁵ Te madianita-ants, Cozbi sbihil, yantsil-nich'an Zur, te príncipal yu'un te jchahp yu'un Madián.

¹⁶ Te Jehová la yalbe te Moisés:

¹⁷ Contrahina te madianetic, soc milticlana,

¹⁸ te bin ut'il la ya'beyex awocolic yu'un te la slo'loyex ta scuenta Baal-peor, soc ta scuenta Cozbi te yantsil-nich'an te príncipal yu'un Madián, ha te yantsilelic, te laj ta milel ta yorahil te jmilawal-chamel te tal ta scuenta Baal-peor.