Números 18 - Bible in Tzeltal Bachajón

Ya'tel sacerdotehetic soc levitahetic

¹ Te Jehová la yalbe te Aarón: Te ha'at soc anich'nab soc te jchahp sts'umbal Leví ay ta acuentahic te mulil ya xchicnaj ta ch'ul templo; yan te ha'at soc anich'nab ay ta acuenta atuquelic te mulil ya xchicnaj te ayex ta sacerdotehil.

² Ic'ticlana tal ta atojol te awermanotac, ha te jchahp sts'umbal atat Leví, yu'un ya scoltayex te c'alal yaquex ta a'tel ta stojol te Nahilpac' yu'un te Testigo-c'op.

³ Ya me spasic te bin yac awa'be spasic, soc ay ta scuentahic spasel spisil te a'tel ta Nahilpac' Templo, pero ma me xnohpojic bahel ta banti ay te ch'ul biluquetic yu'un te ch'ul awilal soc ta banti scajtajib ta chiq'uel mahtanil, scuenta yu'un ma ba ya xchamic soc ma ba ya xchamex a te ha'exe.

⁴ Ya sjoquinat soc ya spasic te a'tel ta Nahilpac' Templo yu'un tahojibal, spisil te a'tel yu'un te Nahilpac' Templo. Ma me ayuc yan mach'a ya xnohpoj tal ta atojolic.

⁵ Ay ta acuentahic spasel te a'tel ta ch'ul awilal soc ta scajtajib ta chiq'uel mahtanil, scuenta yu'un ma ba ya xtal xan ilimba ta stojol te snich'nab Israel.

⁶ Ho'on la jtsa te awermanotac levitahetic ta yohlil te snich'nab Israel scuenta amahtanic yu'un Jehová, yu'un ya spasic te a'tel ta Nahilpac' Templo yu'un tahojibal.

⁷ Yan te ha'at soc anich'nab yac apasic te a'tel ta sacerdotehil ta banti scajtajib ta chiq'uel mahtanil soc te bintic ay ta pasel ta yutil te stsalul pac'. La jca'beyex scuenta mahtanil te awa'telic ta sacerdotehil. Te mach'a yan ya xnohpoj tal, ya me xlaj, xchi te Jehová.

Swe'elic sacerdotehetic soc levitahetic

⁸ Te Jehová la yalbe xan te Aarón: La jca'batix acuentahin te mahtaniletic cu'un. Spisil te ch'ul mahtaniletic ya ya'bonic te snich'nab Israel la jca'bat soc anich'nab, ha te bin yac awich'ic hilel, ha mandaril te ma xlaj sc'oblal.

⁹ Ha awu'un ya xc'oht te mahtanil yu'un te bintic ch'ultesbil te ma ba ya xlaj ta chiq'uel, spisil te mahtaniletic ya yaq'uic, ha te mahtanil harina, te mahtaniletic yu'un stojel mulil, soc mahtaniletic yu'un stahel falta, ha mero ch'ultesbil awu'un soc anich'nab ya xc'oht.

¹⁰ Ya me awe' ta ch'ul lugar; spisil winiquetic ya xhu' ya swe'ic. Ha te bin ch'ultesbil ya xc'oht awu'un.

¹¹ Soc ha awu'un ya xc'oht ini: ha te banti tsahbil yu'un spisil te tuchilambil mahtaniletic ya yaq'uic te snich'nab Israel, ha'at la jca'bat soc te ach'ix-queremetic awu'un scuenta mandaril te ma xlaj sc'oblal. Spisil mach'atic lec sc'oblalic ay ta ana ya xhu' ya swe'ic.

¹² Spisil te lequil aceite, lequil vino, trigo soc te sba sit te ya ya'beyic Jehová, ho'on la jca'bat.

¹³ Spisil sba sit ts'unub-awalil ya xloc' ta sq'uinalic te ya yich'ic tal ta stojol Jehová, ha'at me awu'un. Spisil mach'atic lec sc'oblalic ay ta ana ya xhu' ya swe'ic.

¹⁴ Spisil te bintic ay ta Israel te ac'bil ta jtojol, ha'at me awu'un.

¹⁵ Spisil te ba-alaletic yu'un ants-winiquetic soc sba-yal chambahlametic te ya ya'beyic Jehová, ha'at me awu'un. Pero ya me alehbe sjelol te ba-alal yu'un ants-winiquetic soc te sba-al chambahlametic te bohloben sc'oblal.

¹⁶ Ta jun u yayinel a yac ajeltay ta ho'sehp siclo plata, ha te siclo yu'un ch'ul awilal, te ha jtahb (20) geras.

¹⁷ Yan te sba-al wacax, tuminchij soc tentsun ma me xajeltay stuquel, yu'un ch'uhltesbilic. Yac atsihtsimbe sch'ich'el ta scajtajib ta chiq'uel mahtanil, soc yac achic'be sjuhp'el scuenta chic'bil mahtanil te sumet yic' ta stojol Jehová.

¹⁸ Ha'at awu'un te sbaq'uetal, hich te bin ut'il te stahn ya yich' tuchilanel soc te swa'el cub.

¹⁹ Spisil te ch'ul mahtaniletic ya ya'beyic Jehová te snich'nab Israel la jca'bat ha'at soc te ach'iex-queremetic awu'un scuenta mandaril te ma xlaj sc'oblal. Ha chapbil-c'op yu'un ats'am te ma xlaj sc'oblal ta stojol Jehová te ha awu'un soc yu'un ats'umbal, xchi te Jehová.

²⁰ Te Jehová la yalbe te Aarón: Mayuc q'uinal yac awich' ta banti sq'uinalic te yantique, soc mayuc binti yac awich' ta yohlilic. Ho'on me te bin yac awich' soc ho'on aq'uinalon ta yohlil te snich'nab Israel.

²¹ La jca'be te levitahetic spisil te jun ta slajunebal ya yich' aq'uel ta Israel, yu'un te a'tel ya spasic ta Nahilpac' Templo yu'un tahojibal.

²² Te snich'nab Israel ma xhu' ya xnohpojic tal ta Nahilpac' Templo yu'un tahojibal, scuenta yu'un ma ba ya sta smulic te hich ya xchamic yu'un.

²³ Te levitahetic ha nax stuquelic ya spasic te a'tel ta Nahilpac' Templo yu'un tahojibal, soc ha ay ta scuentahic te bin mulil ya xc'oht ta scuentahique. Ha mandaril te ma xlaj sc'oblal yu'un te ats'umbale. Mayuc q'uinal ya yich'ic ta yohlil te snich'nab Israel.

²⁴ Yu'un la jcac'ticlambe te levitahetic te jun ta slajunebal ya ya'beyic Jehová te snich'nab Israel, ha sq'uinalic c'ohem. Ha scuentahil te caloj te mayuc q'uinal ya yich'ic ta yohlil te snich'nab Israel, xchi.

²⁵ Te Jehová la yalbe te Moisés:

²⁶ Hich me xawalbe te levitahetic: Te c'alal yac awich'beyic te jun ta slajunebal yu'un te snich'nab Israel te la jca'beyex, tey yac aloq'ues a te jun ta slajunebal te yac awa'beyic Jehová scuenta tuchilambil mahtanil.

²⁷ Te amahtan hich ya xc'oht awu'unic te bin ut'il te trigo ya xtal ta sq'uiyojibal soc te ya'lel ts'usub ya xtal ta sp'e'ojibal.

²⁸ Hich yac awa'beyic smahtanin Jehová te jun ta slajunebal awu'unic te ya ya'beyex te snich'nab Israel. Tey yac aloq'uesic a te smahtan Jehová, ya me awa'beyic te Aarón.

²⁹ Ta spisil te mahtaniletic yac awich'ic, tey yac awa'beyic smahtanin a te Jehová; ya me awac' te banti mero lec, ha ch'ultesbil ya xc'oht.

³⁰ Soc hich me xawalbe te levitahetic: Te c'alal parte awac'ojiquix ta banti lec, te hich ya xc'oht awu'unic te bin ut'il te trigo ya xtal ta sq'uiyojibal soc te ya'lel ts'usub ya xtal ta sp'e'ojibal,

³¹ ya xhu' te bayuc yac awe'ic, ha'ex soc mach'atic ay awu'unic, yu'un ha stojol awa'telic te yac apasic ta Nahilpac' Templo yu'un tahojibal.

³² Ma ba yac ata amulic a teme la awaq'uic ta banti leque. Hich ma ba yac abohlobtes te bintic ch'ultesbil yu'un te snich'nab Israel, soc ma ba ya xchamex yu'un, xchi.