Números 16 - Bible in Tzeltal Bachajón

Te stoybahil Coré

¹ Te Coré snich'an Izhar, snich'an Coat, snich'an Leví, soc te Datán soc Abiram, snich'nab Eliab, soc te On snich'an Pelet, te oxtuhlic ha snich'nab Rubén, la yiq'uic tal winiquetic,

² hahch scontrahinic te Moisés soc lajuneb yoxlajunwinic (250) ta tuhl winiquetic te snich'nab Israel, ha príncipaletic yu'un te pueblo, te mach'atic ayic ta tsoblej, winiquetic te mero na'bil sbahic.

³ La stsob sbahic ta scontrahinel Moisés soc Aarón, hich la yalbeyic: ¡Tic'uquex a te ha'exe! Como ch'uhltesbilic spisil te pueblo, spisilic ch'uhltesbilic, soc ay ta yohlilic te Jehová. ¿Bin yu'un hiche te ha'ex yac atoy abahic ta stojol te pueblo yu'un Jehová? xchihic.

⁴ C'alal hich la ya'iy te Moisés, la spahcan sba ta lum.

⁵ La yalbe te Coré soc spisil te mach'a sjoquinejic: Pajel te Jehová ya me yac' ta ilel mach'a a te ha yu'un soc te ch'ultesbil, ha ya yac' te ya xnohpoj tal ta stojol. Te mach'a tsahbil yu'un, ha ya yac' ya xnohpoj tal ta stojol.

⁶ Hich me yac apasic: ha'at, Coré, soc spisil mach'atic st'unojat, ya me awich'ic te schic'ojibal pom,

⁷ pajel yac awa'beyic c'ahc' soc pom tey ta stojol Jehová. Te winic te ya xtsahot yu'un Jehová, ha me te ch'ultesbil stuquel. Tic'uquex me a te bin la apasic, snich'nabex Leví, xchi.

⁸ Te Moisés la yalbe xan te Coré: A'iya awa'iyic, snich'nab Leví:

⁹ ¿Yu'un bal ma tic'uquex a te la stsahex te Dios yu'un Israel ta yohlil te pueblo yu'un te snich'nab Israel, te la yiq'uex tal ta stojol yu'un yac apasic te a'tel ta nahilpac' yu'un Jehová soc te ya xtehc'ajex ta stojol te pueblo ta scoltaylanel?

¹⁰ La yiq'uex tal ta stojol soc spisil awermanotac, ha te snich'nab Leví, ¿yu'un bal yac awotsesix abahic ec ta sacerdotehil?

¹¹ Ha yu'un, ha'at soc spisil amohloltac la atsob abahic ta scontrahinel Jehová; como ¿mach'a a te Aarón te yac acontrahinic ta c'op? xchi.

¹² Hich te Moisés la sticon ta iq'uel tal te Datán soc Abiram te snich'nab Eliab. Pero hich la sjaq'uic: Ma ba ya xbohotcotic tey a.

¹³ ¿Ma bal tic'uc yac awa'iy a te la awic'otcotic loq'uel ta q'uinal ta banti ya x'oquin leche soc chab scuenta yu'un yac awac'otcotic ta lajel ta jochol taquin q'uinal, yu'un bal yo'tic yac ac'an yac acuyix aba ta ajwalil cu'uncotic?

¹⁴ Soc ma ba ochemotiquix bahel awu'un ta q'uinal ta banti ya x'oquin leche soc chab, soc ma ba awa'beyejotiquix slumil awal-ts'unubiletic soc ts'usubiletic. ¿Ya bal aloq'uesbe sitic te winiquetic ini? ¡Ma ba ya xmohotcotic bahel! xchihic.

¹⁵ Ha yu'un bayel ilin te Moisés, hich la yalbe te Jehová: ¡Ma me xatsacbe te mahtanil yu'unique! Ni jcohtuc burro la jpojbe, ni jtuhluc ay bin chopol la jpasbe, xchi.

¹⁶ Patil te Moisés hich la yalbe te Coré: Pajel ya me atehc'an aba soc spisil amohloltac ta stojol Jehová; ha'at soc te yantic soc Aarón.

¹⁷ Jujutuhl ac'a stsac te schic'ojibal pom yu'un, ac'a yotsesbe spomil soc ac'a nohpojuc tal ta stojol Jehová jujutuhl soc te schic'ojibal pom yu'une, lajuneb yoxlajunwinic (250) schic'ojibal pom ta spisil. Ha nix hichat, soc Aarón, jujutuhlex soc te schic'ojibal pom awu'unique, xchi.

¹⁸ Hich jujutuhl la stsaquic te schic'ojibal pom yu'unic, la ya'beyic sc'ahc'al soc spomil, pajal la stehc'an sbahic soc te Moisés soc Aarón ta stojol te Nahilpac' Templo yu'un tahojibal.

¹⁹ Te Coré la stsob spisil te pueblo ta stojol te yochibal te Nahilpac' Templo yu'un tahojibal ta scontrahinel te Moisés soc te Aarón. Te yutsilal Jehová chicnaj ta stojol spisil te pueblo.

²⁰ Te Jehová hich la yalbe te Moisés soc Aarón:

²¹ Loc'anic bahel ta yohlil te pueblo ini, yu'un ya jlajinlan ta ora, xchi.

²² Pero te Moisés soc Aarón la spahcan sbahic c'alal ta lum, hich la yalic: ¡Diosat, Diosat yu'un te scuxlejal spisil ch'ich'-baq'uet! ¿ma bal jtuhluc nax winic te la sta smul? ¿Bin yu'un ilinat ta stojol spisil te pueblo? xchihic.

²³ Te Jehová la yalbe te Moisés:

²⁴ Halbeya te pueblo: Loc'anic bahel ta stojol te snahilpaq'uic te Coré, Datán soc Abiram, xchi.

²⁵ Hich hahch te Moisés, baht ta banti ay te Datán soc Abiram, joquinot bahel yu'un te mamaletic yu'un Israel.

²⁶ Hich la yalbe te pueblo: Loc'anic bahel ta stojol te snahilpaq'uic te bohl winiquetic ini, soc ma xapicbeyic te bin ay yu'unic, scuenta yu'un ma ba ya xlajex ta scuenta spisil te smulique, xchi.

²⁷ Ha yu'un loq'uic bahel ta banti ay snahilpaq'uic te Coré, Datán soc Abiram. Te Datán soc Abiram loq'uic tal stehc'an sbahic ta yochibal te snahilpaq'uic soc yihnamic, snich'nabic soc tut alaletic yu'unic.

²⁸ Te Moisés la yal: Hich me yac ana'ic a te Jehová la sticonon tal ta spasel spisil ini, te ma ha'uc la jpas te bin ya sc'an te co'tane.

²⁹ Teme spisil te winiquetic ini hich ya xchamic te bin ut'il ya xchamic ants-winiquetic, teme hich nix ya xc'oht ta stojolic te bin ya xc'oht ta stojol spisil ants-winiquetic, yu'unix ma ha'uc la sticonon tal a te Jehová.

³⁰ Yan teme ay bin yach'il ya spas te Jehová, teme ya sjam sba te lum soc ya sbic' cohel soc spisil bintic ay yu'unic, teme cuxul a ya xcohic bahel ta yawil chamen ants-winiquetic, hich yac ana'ic a te la scontrahinic te Jehová te winiquetic ini, xchi.

³¹ C'alal laj yo'tan ta c'op, la sjam sba te lum ta banti tec'ajtic;

³² la sjam sba te lum, la sbic'ticlan cohel soc snahic soc spisil smohloltac te Coré soc spisil bintic ay yu'unic.

³³ Ha'ic soc spisil bintic ay yu'unic cuxulic a cohic bahel ta yawil chamen ants-winiquetic; la smac xan sba te lum, hich ch'ayic bahel ta yohlil te pueblo.

³⁴ Spisil Israel te ayic ta sjoyobal loq'uic ta ahnel te c'alal la ya'iybeyic yawic, yu'un la yalic: Ma me sbic'otic cohel ec te lume, xchihic.

³⁵ Soc loc' tal c'ahc' ta stojol Jehová, la smil te lajuneb yoxlajunwinic (250) ta tuhl winiquetic te la yaq'uic te pome.

³⁶ Te Jehová la yalbe te Moisés:

³⁷ Halbeya te Eleazar snich'an te sacerdote Aarón te ac'a sloq'ueslan te schic'ojibal pometic ta yohlil te banti lajix ta c'ahq'uel, namal ac'a sch'ay bahel te yac'alel c'ahc', yu'un ch'uhltesbilic

³⁸ te schic'ojibal pometic yu'un te winiquetic lajemiquix ta scaj te smulique. Pasahic ta jayal lehchel taq'uin yu'un ya yich' potsel a te scajtajib ta chiq'uel mahtanil, como la stuhunic ta stojol Jehová, hich ch'ultesbil c'ohtic. Ha seña ya xc'oht ta stojol te snich'nab Israel, xchi.

³⁹ Ha yu'un te sacerdote Eleazar la stsac te schic'ojibal pom pasbilic ta bronce te la yaq'uic te winiquetic te lajic ta c'ahc', la spas ta jayal lehchel taq'uin yu'un ya yich' potsel a te scajtajib ta chiq'uel mahtanil,

⁴⁰ scuenta shultesojibal yo'tanic te snich'nab Israel te ma me ayuc mach'a yan ya xhu' ya xnohpoj tal ta stojol Jehová ta yaq'uel pom teme ma ha'uc sts'umbal Aarón, scuenta yu'un ma ba ya xc'oht ta scuenta te bin c'oht ta scuenta te Coré soc te smohloltac, hich te bin ut'il yaloj Jehová ta scuenta Moisés.

⁴¹ Ta schebal c'ahc'al spisil te pueblo Israel hahchic ta scontrac'optayel te Moisés soc Aarón, hich la yalbeyic: Te ha'exe la amilic te pueblo yu'un Jehová, xchihic.

⁴² Te c'alal la stsob sbahic ta scontrahinel te Moisés soc Aarón, la yilic bahel ta stojol te Nahilpac' Templo yu'un tahojibal te tal ta axintesel ta tocal, soc chicnaj tey a te yutsilal te Jehová.

⁴³ Hich te Moisés soc Aarón talic ta Nahilpac' Templo yu'un tahojibal.

⁴⁴ Te Jehová la yalbe te Moisés:

⁴⁵ Loc'anic bahel ta stojol te pueblo ini, ya me jlajin ta ora, xchi. La spahcan sbahic ta lum yu'un.

⁴⁶ Te Moisés la yalbe te Aarón: Ich'a tal te schic'ojibal pom, a'beya tey a te sc'ahc'al te scajtajib ta chiq'uel mahtanil soc a'beya pom ta sba, bahan ta ora ta banti ay te pueblo, pasbeya te stojel mulil, yu'un loq'uemix tal ilimba ta stojol Jehová, hahchemix jmilawal-chamel, xchi.

⁴⁷ Hich te Aarón la spas te bin halbot yu'un te Moisés. La yich' tal te schic'ojibal pom, ahnimal baht ta yohlil te pueblo; hahchemix a te jmilawal-chamel. La ya'be pom, la spas te stojel mulil yu'un te pueblo.

⁴⁸ La stehc'an sba ta yohlil te mach'atic chamenic soc te mach'atic cuxulic, hich quehchaj te jmilawal-chamel.

⁴⁹ Te jaytuhl lajic yu'un te jmilawal-chamel, ha jpic soc ho'lajunwinic shuclajunbahc' (14,700) ta tuhl; parte te mach'atic lajic yu'un te la stoy sbahic soc Coré.

⁵⁰ C'alal quehchaj te jmilawal-chamel, te Aarón suht bahel ta stojol Moisés ta yochibal te Nahilpac' Templo yu'un tahojibal.