Números 15 - Bible in Tzeltal Bachajón

Mandariletic yu'un yaq'uel mahtaniletic

¹ Te Jehová la yalbe te Moisés:

² Halbeya te snich'nab Israel: C'alal ya x'ochex bahel ta q'uinal te ho'on ya ca'beyex banti ya xnahinex,

³ soc c'alal yac awa'beyic chic'bil smahtan te Jehová, teme scohtol chic'bil mahtanil, milbil mahtanil yu'un toro, tuminchij o tentsun, mahtanil yu'un bin la yich' chapel, mahtanil scuenta sc'anojel awo'tan, o teme yac awac' bin sumet yic' ta stojol Jehová ta yorahil q'uinetic awu'unic,

⁴ te mach'a ya xtal ya'be smahtan Jehová ya me yich' tal jun ta slajunebal efa lequil harina wots'bil soc jun ta schanebal hin aceite.

⁵ Ya me awa'be sjoquin jun ta schanebal hin vino te jujucoht tuminchij scuenta scohtol chic'bil mahtanil o milbil mahtanil.

⁶ Te jujucoht tat tuminchij ya me awac' sjoquin cheb ta slajunebal lequil harina wots'bil soc jun ta yoxebal hin aceite;

⁷ soc te vino yu'un te malbil mahtanil ya me awac' jun ta yoxebal hin, scuenta sumet yic' ta stojol Jehová.

⁸ Teme yac awa'be jcoht toro yu'un scohtol chic'bil mahtanil o milbil mahtanil scuenta bin la yich' chapel o scuenta lamal q'uinal ta stojol Jehová,

⁹ ya me awa'be sjoquin te toro oxeb ta slajunebal harina wots'bil soc j'ohlil hin aceite;

¹⁰ soc ya me awac' j'ohlil hin vino yu'un malbil mahtanil scuenta chic'bil mahtanil te sumet yic' ta stojol Jehová.

¹¹ Hich ya yich' pasbeyel te jujucoht toro, tat tuminchij, jcolel tuminchij, o tentsun.

¹² Hich yac apasbeyic jujucoht chambahlam, ha chican te jaycoht yac awaq'ue.

¹³ Hich me ya spasic spisil te mach'atic ha nix slumalic te c'alal ya yich' aq'uel chic'bil mahtanil te sumet yic' ta stojol Jehová.

¹⁴ Teme ay jyanlum te ya sjoquinex o mach'ayuc a te ya xnahin ta awohlilic ta cajalcaj ats'umbalic bahel, teme ya yac' chic'bil mahtanil scuenta sumet yic' ta stojol Jehová, hich ni me ya spas te bin ut'il yac apasic te ha'exe.

¹⁵ Junax mandaril awu'unic soc te jyanlum te ya sjoquinex ta nahinel. Ha mandaril te ma xlaj sc'oblal ta cajalcaj ats'umbal bahel; hich te bin ut'il ayex, hich nix ay te jyanlum ta stojol te Jehová.

¹⁶ Junax mandaril soc junax te bin chapal te ya xtuhun awu'unic soc te jyanlum te ya sjoquinex ta nahinel, xchi.

¹⁷ Te Jehová la yalbe te Moisés:

¹⁸ Halbeya te snich'nab Israel: C'alal ochemexix a tey ta q'uinal ta banti ya quiq'uex bahel,

¹⁹ c'alal ya xhahch awe'ic te we'elil yu'un te q'uinal, ya me awa'be smahtan te Jehová.

²⁰ Ta banti te shahchibal te harina yac awots'ic, ya me awaq'uic jun pimil pan; ha yac awac' scuenta mahtanil yu'un te sq'uiyojibal trigo.

²¹ Ta cajalcaj ats'umbal bahel ya me awa'beyic smahtanin Jehová te shahchibal te harina awu'unique.

²² Teme ma awolojuc a te ma ba yac apasic biluc mandariletic ini te halbot yu'un Jehová te Moisés,

²³ biluc a te la yalbeyex Jehová ta scuenta Moisés, c'alal ta sc'ahc'alel nix te la yal mandar te Jehová soc ta patil bahel ta cajalcaj ats'umbal,

²⁴ teme ma yolojuc a te hich ya spas te pueblohe, spisil te pueblo ya me yaq'uic jcoht toro scuenta scohtol chic'bil mahtanil te sumet yic' ta stojol Jehová, soc mahtanil harina soc malbil mahtanil yu'un, hich te bin ut'il ay ta pasel, soc ya me yaq'uic jcoht tat tentsun scuenta stojel mulil.

²⁵ Hich te sacerdote ya spas te stojel mulil yu'un spisil te pueblo yu'un te snich'nab Israel, hich ya xpasbotic perdón a, como ma yolojuc a la spasic. Ya ya'beyic Jehová te mahtanil te ya yich' chiq'uel soc te mahtanil yu'un stojel mulil, ta scaj te howiyique.

²⁶ Hich ya xpasbotic perdón spisil te pueblo yu'un te snich'nab Israel soc te jyanlum te nahinem ta awohlilic, como ma yolojuc a la spasic spisil te pueblohe.

²⁷ Teme jtuhl nax te mach'a ma yolojuc a te stahoj smul, ya me yac' jcoht yantsilel tentsun te jun ya'bilal scuenta mahtanil yu'un mulil.

²⁸ Te sacerdote ya spas te stojel mulil yu'un te mach'a ma yolojuc a te stahoj smul ta stojol Jehová; ya spas te stojel mulil ta scuenta, hich ya xpasbot perdón.

²⁹ Te snich'nab Israel soc te jyanlum te nahinem ta yohlilic, junax mandaril awu'unic te mach'a ma yolojuc a te ya sta smul.

³⁰ Yan te mach'a snopoj ta yo'tan a ya spas mulil, te mach'a ha nix slumal a o teme jyanlum, ya sbohlobtesbe sc'oblal Jehová, ya me yich' loq'uesel ta yohlil te slumale.

³¹ Te bin ut'il mayuc sc'oblal ta yo'tan te sc'op Jehová soc la sc'axuntaybe smandar, jc'axel me ya yich' loq'uesel soc scuchoj smul ya xhil, xchi.

Castigo yu'un sc'axuntayel sc'ahc'alel cux-o'tan

³² C'alal ayic ta jochol taq'uin q'uinal a te snich'nab Israel, la stahic jtuhl winic te yac ta stsobel si' ta sc'ahc'alel cux-o'tan.

³³ Te mach'atic la stahic te yac ta stsobel si', la yiq'uic bahel ta stojol Moisés soc Aarón soc spisil te pueblo.

³⁴ La yotsesic ta cárcel, yu'un ma ba la sna'ic bin ya spasbeyic.

³⁵ Ha yu'un te Jehová la yalbe te Moisés: Ya me xlaj te winique. Spisil te pueblo ya sch'ojic ta ton ta sti'il te campamento, xchi.

³⁶ Hich te pueblo la sloq'uesic bahel ta campamento, la sch'ojic ta ton, hich laj, hich te bin ut'il halbot yu'un Jehová te Moisés.

Stsihtsimal sti'il c'u'ul

³⁷ Te Jehová la yalbe te Moisés:

³⁸ Halbeya te snich'nab Israel te ya me yac'ticlambeyic stsihtsimal ta sti'il te sc'u'ic ta cajalcaj sts'umbal bahel; soc ta jujun stsihtsimal ya me yaq'uic jlihc ts'otbil yaxal hilera.

³⁹ Ya xtuhun awu'unic te stsihtsimal, yu'un te c'alal yac awilic tey yac ana'ic a spisil te mandariletic yu'un Jehová; hich yac ach'uhunic spasel soc ma ba yac at'unic bahel te bin ya sc'an awo'tanic soc te bin ya yil te asit, te ha la yac' te yac awac' aba ta antsinel c'ohem.

⁴⁰ Hich yac ana'ic soc yac apasic a spisil te mandariletic cu'un soc ch'ultesbil ya xc'ohex ta stojol te Dios awu'unique.

⁴¹ Ho'on Jehovahon, te Dioson awu'unic, te la jloq'uesex tal ta sq'uinal Egipto scuenta yu'un Dioson awu'unic ya xc'ohon. Ho'on, Jehovahon, te Dioson awu'unique, xchi.