Números 12 - Bible in Tzeltal Bachajón

María soc Aarón la scontrahinic Moisés

¹ Te María soc Aarón la scontrac'optayic te Moisés ta scaj te cusi-ants te yic'oj, yu'un nuhpunem soc cusi-ants.

² Hich la yalic: Te Jehová ¿ha nax bal c'opoj ta scuenta stuquel te Moisés? ¿Ma bal hichuc nix c'opoj ta jcuentacotic? xchihic. La ya'iy te Jehová.

³ Te winic Moisés mero peq'uel yo'tan ta winiquil, c'ax hich a te bin ut'il spisil winiquetic ayic ta bahlumilal.

⁴ Te Jehová ora la yalbe te Moisés, Aarón soc María: Bahanic awoxebalic ta Nahilpac' Templo yu'un tahojibal, xchi. Hich baht yoxebalic.

⁵ Te Jehová co tal ta bahlal tocal, la stehc'an sba ta yochibal te Nahilpac' Templo. La yic' tal te Aarón soc te María; hich nohpoj tal schebalic.

⁶ Hich halbotic yu'un te Jehová: A'iya awa'iyic te jc'ope: Teme ay jalwanej yu'un Jehová ta awohlilic, ya cac' jba ta ilel yu'un ta snahalsit, ya jc'opon ta swayich.

⁷ Ma hichuc stuquel te ca'bat Moisés, te jun yo'tan ya scuentahin spisil te jnahe.

⁸ Ya jsitin jba ta c'op soc, jamal ya jc'opon, ma ha'uc ta scuenta muquen c'op; soc ya yil bin yilel te Jehová. ¿Bin yu'un hiche te ma ba yac axi'ic te yac acontrac'optayic te ca'bat Moisés? xchi.

⁹ Hich tihl yilimba Jehová ta stojolic, loc' bahel.

¹⁰ C'alal hahch bahel te tocal ta Nahilpac' Templo, te María tsacot hilel ta c'a'elchamel, te snuhculel ha sac hich te bin ut'il me'sic. Te Aarón c'alal la sut sba yil te María, la yil te yich'ojix c'a'elchamel,

¹¹ hich la yalbe te Moisés: ¡Awocoluc, tatic, ma xawac' cuchcotic te mulil ini, yu'un la jpascotic soc sohquemal jolcotic!

¹² Ma xawac' te hich ya xc'oht te María te bin ut'il chamen-alal te ayine, te j'ohlil lajemix sbaq'uetal a te c'alal ya x'ayin, xchi.

¹³ Ha yu'un te Moisés awon ta stojol Dios: Awocoluc, Dios, lecubtesa ta chamel, xchi.

¹⁴ Te Jehová hich la sjac'be sc'op Moisés: Teme tuhbataybot yelaw yu'un te state, ¿ma bal yacuc yich' q'uexlaltesel huqueb c'ahc'al yu'un? Ac'a yich' loq'uesel bahel ta campamento huqueb c'ahc'al, patil ya xhu' ya suht tal, xchi.

¹⁵ Ha yu'un te María la yich' loq'uesel ta campamento huqueb c'ahc'al. Ma ba behenic xan bahel te pueblo ha to c'alal suht xan tal te María.

¹⁶ Patil loq'uic bahel ta Hazerot te pueblo, la spas scampamentohic ta jochol taquin q'uinal Parán.