Números 1 - Bible in Tzeltal Bachajón

La yich' ahtayel Israel ta Sinaí

¹ Te Jehová la sc'opon te Moisés c'alal ay ta jochol taquin q'uinal Sinaí, ta Nahilpac' Templo yu'un tahojibal, ta sba c'ahc'alil yu'un te schebal u, ta schebal ha'bil sloq'uelic tal ta Egipto a, hich la yalbe:

² Ahtaya spisil te pueblo yu'un te snich'nab Israel ta jujuchahp sts'umbal, ta jujuchahp sna static, otsesa ta hun te sbihil jujutuhl winic.

³ Te mach'atic ayic ta jtahb (20) ya'bilal bahel, ha'at soc Aarón ya me awahtayic spisil mach'atic ya xhu' ya xbahtic ta guerra, ta scuenta jujuchahp soldado yu'unic.

⁴ Ya me sjoquinex jtuhl winic ta jujuchahp sts'umbal Israel, te ha jtsobaw yu'un te sna te statique.

⁵ Ha sbihilic ini te winiquetic te ya sjoquinex: Ta sts'umbal Rubén: ha te Elisur snich'an Sedeur;

⁶ ta Simeón: ha te Selumiel snich'an Zurisada;

⁷ ta Judá: ha te Naasón snich'an Aminadab;

⁸ ta Isacar: ha te Natanael snich'an Zuar;

⁹ ta Zabulón: ha te Eliab snich'an Helón;

¹⁰ ta snich'nab José: ta Efraín, ha te Elisama snich'an Amiud; ta Manasés, ha te Gamaliel snich'an Pedasur;

¹¹ ta Benjamín: ha te Abidán snich'an Gedeoni;

¹² ta Dan: ha te Ahiezer snich'an Amisadai;

¹³ ta Aser: ha te Pagiel snich'an Ocrán;

¹⁴ ta Gad: ha te Eliasaf snich'an Deuel;

¹⁵ ta Neftalí: ha te Ahira snich'an Enán, xchi te Jehová.

¹⁶ Ha'ic te tsahbilic ta yohlil te pueblo, te jtsobawetic yu'un jujuchahp sts'umbal te static, te jtsobawetic yu'un te chahpalchahp ta Israel.

¹⁷ Te Moisés soc Aarón la yiq'uic tal te winiquetic te tsahbilic ta sbihilique;

¹⁸ soc la stsobic spisil te pueblo ta sba c'ahc'alil ta schebal u. Hich ochic ta ahtayel ta scuenta jujuchahp na soc ta scuenta sna te statique, la yich' ahtayel jujutuhl te ay jtahb (20) ya'bilal bahel.

¹⁹ Hich te bin ut'il halbot yu'un Jehová, te Moisés la yahtaylan te israeletic ta jochol taquin q'uinal Sinaí.

²⁰ Te sts'umbal Rubén, ha te sba-nich'an Israel, te jujuchahp sts'umbal soc te jujuchahp sna te statique, jujutuhl la yich' ahtayel, spisil te winiquetic te stahojix jtahb (20) ya'bilalic, ha spisil mach'atic te ya xhu' ya xloq'uic bahel ta guerra:

²¹ te loc' ta ahtayel te jchahp yu'un Rubén ay ho'pic soc ho'winic shuclajuneb ta bahc' (46,500);

²² Te sts'umbal Simeón, te jujuchahp sts'umbal soc te jujuchahp sna te statique, jujutuhl la yich' ahtayel, spisil te winiquetic te stahojix jtahb (20) ya'bilalic, ha spisil te mach'atic ya xhu' ya xloq'uic bahel ta guerra:

²³ te loc' ta ahtayel te jchahp yu'un Simeón ay hucpic soc ho'winic sbalunbahc' (59,300).

²⁴ Te sts'umbal Gad, te jujuchahp sts'umbal soc te jujuchahp sna te statique, jujutuhl la yich' ahtayel, spisil te winiquetic te stahojix jtahb (20) ya'bilalic, ha spisil te mach'atic ya xhu' ya xloq'uic bahel ta guerra:

²⁵ te loc' ta ahtayel te jchahp yu'un Gad ay ho'pic soc lajuneb yoxwinic yo'lajunbahc' (45,650).

²⁶ Te sts'umbal Judá, te jujuchahp sts'umbal soc te jujuchahp sna te statique, jujutuhl la yich' ahtayel, spisil te winiquetic te stahojix jtahb (20) ya'bilalic, ha spisil te mach'atic ya xhu' ya xloq'uic bahel ta guerra:

²⁷ te loc' ta ahtayel te jchahp yu'un Judá ay balunpic soc j'ohlil shucbahc' (74,600).

²⁸ Te sts'umbal Isacar, te jujuchahp sts'umbal soc te jujuchahp sna te statique, jujutuhl la yich' ahtayel, spisil te winiquetic te stahojix jtahb (20) ya'bilalic, ha spisil te mach'atic ya xhu' ya xloq'uic bahel ta guerra:

²⁹ te loc' ta ahtayel te jchahp yu'un Isacar ay wacpic soc jbahc' (54,400).

³⁰ Te sts'umbal Zabulón, te jujuchahp sts'umbal soc te jujuchahp sna te statique, jujutuhl la yich' ahtayel, spisil te winiquetic te stahojix jtahb (20) ya'bilalic, ha spisil te mach'atic ya xhu' ya xloq'uic bahel ta guerra:

³¹ te loc' ta ahtayel te jchahp yu'un Zabulón ay hucpic soc j'ohlil schanbahc' (57,400).

³² Te sts'umbal José: ha te sts'umbal Efraín, te jujuchahp sts'umbal soc te jujuchahp sna te statique, jujutuhl la yich' ahtayel, spisil te winiquetic te stahojix jtahb (20) ya'bilalic, ha spisil te mach'atic ya xhu' ya xloq'uic bahel ta guerra:

³³ te loc' ta ahtayel te jchahp yu'un Efraín ay ho'pic soc ho'winic scha'bahc' (40,500).

³⁴ Soc te sts'umbal Manasés, te jujuchahp sts'umbal soc te jujuchahp sna te statique, jujutuhl la yich' ahtayel, spisil te winiquetic te stahojix jtahb (20) ya'bilalic, ha spisil te mach'atic ya xhu' ya xloq'uic bahel ta guerra:

³⁵ te loc' ta ahtayel te jchahp yu'un Manasés ay chanpic soc lajunwinic (32,200).

³⁶ Te sts'umbal Benjamín, te jujuchahp sts'umbal soc te jujuchahp sna te statique, jujutuhl la yich' ahtayel, spisil te winiquetic te stahojix jtahb (20) ya'bilalic, ha spisil te mach'atic ya xhu' ya xloq'uic bahel ta guerra:

³⁷ te loc' ta ahtayel te jchahp yu'un Benjamín ay chanpic soc j'ohlil sbalunbahc' (35,400).

³⁸ Te sts'umbal Dan, te jujuchahp sts'umbal soc te jujuchahp sna te statique, jujutuhl la yich' ahtayel, spisil te winiquetic te stahojix jtahb (20) ya'bilalic, ha spisil te mach'atic ya xhu' ya xloq'uic bahel ta guerra:

³⁹ te loc' ta ahtayel te jchahp yu'un Dan ay hucpic soc ho'lajunwinic shuclajunbahc' (62,700).

⁴⁰ Te sts'umbal Aser, te jujuchahp sts'umbal soc te jujuchahp sna te statique, jujutuhl la yich'ic ahtayel, spisil te winiquetic te stahojix jtahb (20) ya'bilalic, ha spisil te mach'atic ya xhu' ya xloq'uic bahel ta guerra:

⁴¹ te loc' ta ahtayel te jchahp yu'un Aser ay ho'pic soc ho'lajunwinic schanbahc' (41,500).

⁴² Te sts'umbal Neftalí, te jujuchahp sts'umbal soc te jujuchahp sna te statique, jujutuhl la yich' ahtayel, spisil te winiquetic te stahojix jtahb (20) ya'bilalic, ha spisil te mach'atic ya xhu' ya xloq'uic bahel ta guerra:

⁴³ te loc' ta ahtayel te jchahp yu'un Neftalí ay wacpic soc j'ohlil schanlajunbahc' (53,400).

⁴⁴ Ha te la yich'ic ahtayel yu'un Moisés, Aarón soc te lahchaytuhl príncipaletic yu'un te jujuchahp snahique.

⁴⁵ Spisil te snich'nab Israel, te jujuchahp sna te statique, te mach'atic stahojix jtahb (20) ya'bilalic, ha spisil te mach'atic ya xhu' ya xloq'uic bahel ta guerra ta Israel,

⁴⁶ ay ho'lajuneb schanwinic ta pic soc lajuneb swaxacwinic sbalunbahc' (603,550).

A'bot ya'tel levitahetic

⁴⁷ Pero te jujuchahp sts'umbal te levitahetic ma ba la yich'ic ahtayel soc,

⁴⁸ como hich halbot yu'un Jehová te Moisés:

⁴⁹ Ma me xawahtay stuquel te jchahp yu'un Leví, ma me pajaluc xawotses ta lista soc te snich'nab Israel;

⁵⁰ ya me awa'be scuentahinic te levitahetic te Nahilpac' yu'un te Testigo-c'op soc spisil sbiluc soc bintic ya xtuhun tey a. Ha ya sq'uechic bahel te Nahilpac' Templo soc spisil sbiluc, ya scuentahinic soc ya yac' snahilpaq'uic ta sjoyobal te Nahilpac' Templo.

⁵¹ Te c'alal ya xloc' bahel te Nahilpac' Templo, te levitahetic ya stuhquiyic, soc te c'alal ya yich' tehc'anel, ha'ic nix ya spasic. Te mach'a mayuc ta scuenta te ya xnohpoje, ya me xcham.

⁵² Te snich'nab Israel ya me spasic snahilpaq'uic ta jujuchahp yawilic, jujutuhl ta banti ay te bandera yu'unic ta jujuchahp.

⁵³ Yan te levitahetic ha ya spasic snahilpaq'uic ta sjoyobal te Nahilpac' yu'un te Testigo-c'op, scuenta yu'un ma ba ya xtal ilimba ta stojol te pueblo yu'un te snich'nab Israel. Ha me te levitahetic te ya scanantayic te Nahilpac' yu'un te Testigo-c'op, xchi.

⁵⁴ Te snich'nab Israel la spasic spisil hich te bin ut'il halbot yu'un Jehová te Moisés.