Nehemías 8 - Bible in Tzeltal Bachajón

¹ Junax la tsob sbahic spisil te pueblo ta plaza te snuhp'usitayej sba soc te Yochibal Ha', la yalbeyic te maestro Esdras te yacuc yich' tal te libro yu'un te ley yu'un Moisés, te a'botic yu'un Jehová te Israel.

² Ta sba c'ahc'alil ta shuquebal u te sacerdote Esdras la yich' tal te Ley ta stojol te ants-winiquetic, spisil mach'atic ya xhu' yu'unic sna'el.

³ Ta sab ha to c'alal ta ohlil c'ahc'al teq'uel ta yilel te libro ta stojol te plaza te snuhp'usitayej sba soc te Yochibal Ha', ta stojol te winiquetic soc antsetic soc spisil mach'atic ya xhu' yu'un sna'el. Spisil te pueblo lamalic ta ya'iyel te bin ya yal te libro yu'un te Ley.

⁴ Te maestro Esdras ay ta toyol limbil te' te ha stuc te yich'oj pasele. Tey ta swa'el ay te Matatías, Sema, Anías, Urías, Hilcías soc Maasías; ta sq'uexam ay te Pedaías, Misael, Malquías, Hasum, Hasbadana, Zacarías soc Mesulam.

⁵ Te Esdras la sjam te libro ta stojol sit spisil te pueblo, (yu'un ha toyol xan ay ta stojol te pueblo); c'alal la sjam te libro, spisil te pueblo la stehc'an sbahic.

⁶ Te Esdras la yalbe yutsilal te Jehová, te muc' Dios. Spisil te pueblo la shach mohel sc'abic, hich la sjaq'uic: ¡Hichuc! ¡Hichuc! xchihic; soc la squejan sbahic, la snijan sbahic c'alal ta lum ta sch'uhuntayel te Jehová.

⁷ Te levitahetic Jesúa, Bani, Serebías, Jamín, Acub, Sabetai, Hodías, Maasías, Kelita, Azarías, Jozabed, Hanán soc Pelaía la ya'beyic sna' te pueblo bin ya yal te Ley; tey lamalic ta ya'iyel a te pueblohe.

⁸ Jamal la yilic te libro yu'un te Ley yu'un Dios, soc la sc'asesic scuenta yu'un jamal chican bin ya yal.

⁹ Te gobernador Nehemías, te maestro-sacerdote Esdras soc te levitahetic te yac ya'bebelic sna'ic te pueblo, hich la yalbeyic spisil te pueblo: Ha ch'ul c'ahc'al ini yu'un te Jehová te Dios cu'untic; ma xamel awo'tanic soc ma x'oq'uex, xchihic. Como spisil te pueblo yac ta oq'uel yu'un te bin la yal te Ley.

¹⁰ Patil la yalbeyic: Bahanic, we'anic lequil we'elil, uch'anic chi'il vino soc ticombeya swe'el te mach'atic mayuc bin chahpambil yu'unic; como ha ch'ul c'ahc'al yu'un te Cajwaltique. Ma me xamel awo'tanic, como ha awipic te stse'elil yo'tan te Jehová, xchi.

¹¹ Soc te levitahetic la slahmajtesic spisil te pueblo, hich la yalic: Ch'abanic, como ha ch'ul c'ahc'al ini, ma me xamel awo'tanic, xchihic.

¹² Ha yu'un spisil te pueblo bahtic ta we'el uch'el soc ta sq'uebenel we'eliletic, mero tse'el yo'tanic, como c'oht ta yo'tanic te bin a'bot snopique.

¹³ Ta schebal c'ahc'al spisil te tatiletic yu'un jujun na ta spisil te pueblo, soc te sacerdotehetic soc levitahetic, la stsob sbahic ta stojol te maestro Esdras yu'un ya snopic te bin ya yal te Ley.

¹⁴ Tey ts'ihbabil la stahic a te ley te Jehová yaloj ta scuenta Moisés, te ya me xnahinic ta yaxnahetic te snich'nab Israel ta shuquebal u;

¹⁵ soc te ya me spuquic ta halel ta spisil pueblohetic soc ta Jerusalén te hich ya yich' halel: Bahanic ta ha'maltic, ich'ahic tal ya'binal olivo, ha'mal olivo, xahn soc yantic te'etic te bayel ya'binal, yu'un ya yich' pasel yaxnahetic a, hich te bin ut'il ts'ihbabil, te xchihe.

¹⁶ Hich loq'uic bahel te pueblo, la yich'ic tal ya'binal te'etic, la spasic syaxnahic a, jujutuhl ta sba sna, ta amaq'uetic yu'un, ta amaq'uetic yu'un te sna Dios, ta plaza yu'un te Yochibal Ha', soc ta plaza yu'un te Yochibal Efraín.

¹⁷ Spisil te pueblo te suhtic tal ta chuquel la spasticlan yaxnahetic, soc tey nahinic a. Como ta yorahil te Jesúa snich'an Nun c'alal ta hich ora mayuc hich la spasic te snich'nab Israel. Buen tse'el yo'tanic.

¹⁸ Te Esdras jujun c'ahc'al la yil te libro yu'un te ley yu'un Dios, ta sba c'ahc'alil c'alal ta slajibal. Huqueb c'ahc'al la spasic q'uin, ta swaxaquebal c'ahc'al la spasic ch'ul tsoblej, hich te bin ut'il ay ta pasel.