Nehemías 6 - Bible in Tzeltal Bachajón

Bintic la schapic te scontratac

¹ Te c'alal la ya'iyic te Sanbalat, Tobías, Gesem te talem ta Arabia, soc te yantic jcontratic, te la jcha'pasix xan te ts'ahc, te mayuc banti jamal hilel, (aunque ma to ba cotsesbeyej a te puertahetic ta yawilic),

² te Sanbalat soc te Gesem hich la sticombonic ta halbeyel: La', yacuc jtsob jbahtic ta banti junuc tut pueblo te ay ta spamlej yu'un Ono, xchihic. Pero snopojic te ay bin chopol ya spasbonic.

³ Ha yu'un la jticon bahel a'batetic ta halbeyel: Muc' te a'tel yacon ta spasel, ma xhu' ya xtalon; yu'un quechel ya xhil te a'tel teme ya xtalon te banti ayex, xchihon.

⁴ Chaneb buelta hich la sticombonic ta halbeyel, pero ha nix hich la jsutbe te c'ope.

⁵ Ha yu'un te Sanbalat la scha'ticombon tal ya'bat scuenta yo'ebal buelta, yich'oj tal jun carta te jamal,

⁶ te hich ts'ihbabil tey a: Chicnaj ta yantic nacionetic, soc hich nix ya yal te Gesem, te ha'at soc te judiohetic anopojic te yac atoy abahic, ha yu'un te yac acha'pas xan te ts'ahque. Soc chican ta halel te ha'at ya x'ochat ta ajwalil yu'unic;

⁷ soc la awotsesix jalwanejetic te hich ya yalbat ac'oblal ta Jerusalén: ¡Ay ajwalil ta Judá! xchihic. Ya me ya'iybe sc'oblal ini te ajwalil. Ha yu'un la', pajal ya jnoptic, xchi.

⁸ Hich la jticombe ta halbeyel: Ma meleluc te bin yac yawal, hich nax anopoj ta awo'tan, xchihon.

⁹ Como spisilic yac nax xiwtesbelotic ta sc'opic, te hich ya scuyic: Ya xlaj yipic ta spasel te a'tel, hich ma ba ya shu'tesic, xchihic. Yo'tic, a'bon yip te jc'ab, xchihon ta sc'oponel Dios.

¹⁰ Patil bohon ta sna Semaías snich'an Delaía, snich'an Mehetabel, te smacoj sba ta sna. Hich la yalbon: Ya jtsob jbahtic ta sna Dios, ta yutil te Templo, ya jmactic te puertahetic yu'un te Templo, como ya xtalic yu'un ya smilat; melel, ta ahc'abal ini ya me xtalic yu'un ya smilat, xchi.

¹¹ Pero hich la jcalbe: Te jtuhl winic hich te bin ut'il ho'on ¿ya bal xloc' ta ahnel? Soc ¿mach'a a, te pajal soc ho'on, te ya x'och ta Templo ta scoltayel scuxlejal? Ma ba ya x'ochon, xchihon.

¹² La jna' te ma ba ticombil yu'un Dios, te hich la yalbon jc'oblal ta sc'op-jalwanej yu'un tojbil yu'un te Sanbalat soc te Tobías.

¹³ Ha tojbil scuenta yu'un ya xiwteson, yu'un hich ya jta jmul a. Hich ya yac' bohlobuc jc'oblal soc hich ya xpehc'aj jc'oblal a.

¹⁴ ¡Dios cu'un, na'a me te bin la spasic te Tobías soc te Sanbalat; soc na'a me te Noadías te jalwanej-ants soc te yantic jalwanejetic te ya c'an xiwtesonic! xchihon ta stojol Dios.

¹⁵ Hich hu' ta pasel te ts'ahc ta ho'eb scha'winic (25) c'ahc'al ta u Elul, ha lahchayeb yoxwinic (52) c'ahc'al hu' te a'tele.

¹⁶ C'alal la ya'iyic spisil te jcontratic, xiw spisil te nacionetic ta joyobaltic; peq'uel c'oht la ya'iy sbahic, como la sna'ic te ha ta scuenta te Dios cu'untic te hu' te a'tele.

¹⁷ Ta hich ora, te príncipaletic yu'un Judá yac sticombelic bayel cartahetic ta stojol te Tobías, soc yac yich'belic te suhtib yu'une.

¹⁸ Como ay bayelic ta Judá te schapoj sc'opic soc te Tobías, como ha snihal Secanías snich'an Ara; soc Johanán te snich'an Tobías yic'oj yihnaminic te yantsil-nich'an Mesulam snich'an Berequías.

¹⁹ Soc ya yalbonic ca'iy te bintic lec ya spas te Tobías, soc ya yalbeyic ya'iy te bin ya cale. Hich te Tobías la sticonlambon cartahetic scuenta yu'un ya xiwteson ta sc'op a.