Nehemías 5 - Bible in Tzeltal Bachajón

La yich' comel ta tojel sjol betiletic

¹ Hahch tulan c'op yu'un te winiquetic soc te antsetic yu'unic ta stojol te yermanotac judiohetic.

² Ay mach'atic la yalic: Ay bayel queremetic soc ach'ixetic cu'uncotic; ha yu'un la jc'ancotic trigo scuenta yu'un ya xwe'otcotic soc hich ya xcuxajcotic a, xchihic.

³ Ay yantic te la yalic: La jcac'cotic ta prenda te jq'uinalcotic, jts'usubilcotic soc jnahcotic ta scaj wi'nal, xchihic.

⁴ Soc ay yantic te la yalic: La jmajancotic taq'uin yu'un ya jtojbecotic spatanil te jq'uinalcotic soc jts'usubilcotic ta stojol te ajwalil.

⁵ Junax jts'umbaltic soc te quermanotactic, te cal-jnich'nabcotic pajal soc te yal-snich'nabic; pero la jcac'cotiquix ta mosohil te queremetic soc ach'ixetic cu'uncotic, ay bahemiquix ta mosohil ach'ixetic cu'uncotic. Mayuc bin ut'il ya jcoltaycotic loq'uel a, como yan mach'atic yich'ojiquix te jq'uinalcotic soc te ts'usubiletic cu'uncotique, xchihic.

⁶ Bayel ilinon yu'un te c'alal la jca'iybe te sc'opic soc te yawique.

⁷ Ha yu'un la jnop ta lec, la jtijticlan ta c'op te mach'atic ich'bilic ta muc' soc te mach'atic ay ya'telic, hich la jcalbe: ¡Yaquex ta sc'ambeyel sjol te bintic smajanejic te awermanotac! xchihon. Soc la jquic'ticlan ta muc'ul tsoblej yu'un ya jchahpan te c'ope,

⁸ hich la jcalbeyic: Te ho'otcotic, te ban c'alal hu'em cu'uncotic, la jloq'uescotic ta sbetic te quermanotactic judiohetic te la yich'ic chonel ta stojol yantic nacionetic. ¿Yo'tic ha'ex bal yac achombelic te awermanotac scuenta yu'un te ho'otcotic ya jmancotic loq'uel? la jcut. Ch'abic, yu'un ma ba weht bin la yalic yu'un.

⁹ Hich la jcal xan: Ma lecuc te bin yacalex ta spasele. ¿Ma bal ha'uc lec te ya xbehenex ta scuenta yich'el ta muc' te Dios cu'untic, scuenta yu'un ma ba ya quich'tic labanel yu'un te yantic nacionetic te ha jcontratique?

¹⁰ Ha nix hichon soc te quermanotac soc te a'batetic cu'un, ca'beyejcotic smajan taq'uin soc trigo. ¡Ac'a jpasbetic perdón te sbetic ini!

¹¹ Ya calbeyex wocol te yacuc asutbeyic yo'tic te sq'uinalic, sts'usubic, olivohetic yu'unic, snahic soc te jun ta ho'winic taq'uin, trigo, vino o aceite scuenta sjol te yac ac'ambelique, la jcut.

¹² Hich la yalic: Ya jsutbecotic, mayuc bin ya jc'ambecotic a. Hich ya jpascotic te bin ut'il la awalixe, xchihic. Ha yu'un la jquic'ticlanic tal te sacerdotehetic soc la jcalbe ac'a yalic ta jamal te hich ya spasique.

¹³ Soc la jlihlin jc'u', hich la jcal: Hich ac'a yich' lihlinel loq'uel yu'un Dios ta sna soc ta ya'tel te mach'atic ma ba ya yac' c'ohtuc ta pasel ini; hich ac'a yich' lihlinel soc jocholuc ya xhil, xchihon. Hichuc, xchihic spisil te pueblo. Hich la yalbeyic yutsil sc'oblal te Jehová; soc te pueblo la spasic te bin la yalic ta jamal.

¹⁴ Te c'alal bin ora la yotseson ta gobernador ta sq'uinal Judá te ajwalil, ha ta jtahb (20) ha'bil yochel ta ajwalil a te Artajerjes, ha to c'alal ta lahchayeb scha'winic (32) ha'bil, ha lahchayeb (12) ha'bil ta spisil, te ho'on o te quermanotac ma ba la jwe'becotic te pan yu'un te gobernador.

¹⁵ Pero te yantic gobernadoretic te nahil ay cu'un la ya'beyic swocol te pueblo, la sc'ambeyic cha'winic (40) ta sehp plata yu'un pan soc vino, soc te a'batetic yu'unic la ya'beyic swocol te pueblo. Pero te ho'one, ma hichuc la jpas, ta scaj la jxi' te Diose.

¹⁶ Soc ha nix hichon a'tejon ta scha'pasel xan te ts'ahc, soc mayuc jmanoj q'uinal; soc spisil te a'batetic cu'un tey ayic ta a'tel a.

¹⁷ Soc ay lajuneb swaxacwinic (150) ta tuhl judiohetic soc mach'atic ay ya'telic, soc te mach'atic ya xtalic ta yantic nacionetic te we'ic ta mesa cu'un.

¹⁸ Te bin la yich'ticlan chahpanel ta jujun c'ahc'al, ha jcoht wacax, wac-coht tsahbil tuminchijetic, soc la schahpambonic mutetic; soc ta lajlajuneb c'ahc'al ya yich' tal bayel vino. Aunque hich ay, mayuc bin ora la jc'ambe te pan yu'un gobernador, como bayel ay swocolic ta mosohil te pueblo ini.

¹⁹ Dios cu'un, na'awon scuenta cutsil jlequil spisil bintic la jpasbe te pueblo ini, xchihon.