Nehemías 4 - Bible in Tzeltal Bachajón

Tsahtayel sbahic ta stojol scontratac

¹ C'alal la ya'iy te Sanbalat te ayotcotic ta scha'pasel xan te ts'ahc, ilin soc mero c'ahc'ub yu'un, soc hahch slaban te judiohetique.

² Hich la yal ta stojol te smohloltac soc te soldadohetic yu'un Samaria: ¿Bin yac spasbelic te judiohetic te mayuc yipique? ¿Ya bal x'a'botic permiso te ya scha'aq'uic xan milbil mahtaniletic? ¿Ya bal xhu' yu'unic spasel ta junax c'ahc'al? ¿Ya bal yach'ubtesic te tonetic te busul stanul ta c'ahq'uel? xchi.

³ Tey ay ta sts'ehl a te Tobías te talem ta Amón, hich la yal: Te ts'ahc yac spasbelic ta ton, te yacuc xmo jcohtuc wax tey a ya xhemts'uj cohel yu'un te hichuque, xchi.

⁴ Dios cu'untic, a'iya awa'iy bin ya yalic ta jlabanwanej ta jtojolcotic. Sutbeya ta sjolic te slabanwanejic soc ac'a ochuquic ta pojel ta q'uinal banti ya xbahtic ta chuquel.

⁵ Ma me xamucbe sbohlilic soc ma me xatup'be smulic ta atojol, como la slabanic te mach'atic yaquic ta scha'pasel, xchihon ta sc'oponel Dios.

⁶ La jcha'pastic te ts'ahc, hu' ta pasel c'alal ta ohlil, como te pueblo spisil yo'tan a'tejic.

⁷ Pero te c'alal la ya'iyic te Sanbalat, Tobías, te árabehetic, te amonetic soc te mach'atic ayic ta Asdod te xquechet ta cha'pasel xan te sts'ahcul te Jerusalén, te xquechet ta maquel banti jamajtic, bayel ilinic yu'un.

⁸ Spisilic junax la schap sc'opic ta yuts'inel soc ta ya'beyel guerra te Jerusalén.

⁹ Ha yu'un la jc'opontic te Dios cu'untic, soc ha ta scajic te la jcac'tic jcananetic ta c'ahc'al soc ta ahc'abal.

¹⁰ Te winiquetic yu'un Judá hich la yalic: Yaquix ta lajel yipic te jcuch-ihcatsiletic; soc bayel te busajtic, ma xhu' ya jcha'pastic xan te ts'ahque, xchihic.

¹¹ Soc hich la yalic te jcontratic: Ma to sna'ic soc ma to xyilic a ya cochintaytic soc ya jmiltic, hich ya cac'tic quehchajuc te a'tele, xchihic.

¹² Pero te c'alal talic te judiohetic te nahinemic ta yohlilic, bayel buelta la yalbotic: Bayuc ya xbahex ya me ya'beyex guerra, xchihic.

¹³ Ha yu'un ta spat te ts'ahc banti peq'uel soc te banti jamajtic la jcac' te ants-winiquetic ta scuenta jujuchahp snahic, chapalic soc espada, lanza soc t'ihmalte' yu'unic.

¹⁴ C'alal laj co'tan ta yilel, hahchon, soc la jcalbe te mach'atic ich'bilic ta muc', te mach'atic ay ya'telic soc spisil te pueblo: Ma xiwex ta stojolic; na'ahic me te Cajwaltic ha muc' soc ay ta xi'el, ac'ahic guerra ta scuenta awermanotac, te querem ach'ixetic awu'unic, te antsetic awu'unic soc te anahique, xchihon.

¹⁵ Te c'alal la ya'iyic te jcontratic te la jna'tiquix te bin chapal yu'unic soc te Dios jimbotix yu'un te bintic chapal yu'unique, jpisiltic suhtotic xan bahel ta ts'ahc, jujutuhl ta ya'tel.

¹⁶ Ta hich ora bahel j'ohlil te a'batetic cu'un la spasic te a'tel, te j'ohlil xan yich'oj slanzahic, smahquilic, st'ihmalte'ic soc smahquil stahnic. Ta spatic tey ayic a te jtsobawetic yu'un spisil te mach'atic yu'un Judá.

¹⁷ Te mach'atic yacalic ta scha'pasel te ts'ahc, te mach'atic ya scuchic ihcatsil, ta jun sc'ab ya x'a'tejic a, ta yan sc'ab stsacoj ya'tejibic yu'un guerra.

¹⁸ Spisil te mach'atic a'tejic, jujutuhl schucoj ta sch'uht te espada yu'un, hich a'tejic. Te mach'a ya yoq'uesin te xulubil, ay ta jts'ehl,

¹⁹ yu'un hich calbeyejix te mach'atic ich'bilic ta muc', te mach'atic ay ya'telic soc spisil te pueblo: Muc' soc naht bahel te a'tele, jpucoj jbahtic ta ts'ahc, namal quiloj jbahtic ta tuhlultuhl.

²⁰ Te banti yac awa'iyic te ya x'oc' te xulubil, tey ya jtsob jbahtic a; te Dios cu'untic ya me yac' guerra ta jcuentatic, xchihon.

²¹ Hich la jpastic te a'tel ta sab ha to c'alal ya xchicnaj eq'uetic, j'ohlil stsacojic slanza ta sc'abic.

²² Soc hich la jcalbe te pueblo: Jujutuhl soc te ya'bat ya me xhilic ta yutil te Jerusalén; ha jcananetic ya xhilic ta ahc'abal, soc ya x'a'tejic ta c'ahc'alel, xchihon.

²³ Te ho'on soc te quermanotac, te a'batetic cu'un soc te jcananetic te sjoquinejonic, ma ba la jchol te jc'u' jpac'tic; jujutuhl ha nax la schol sc'u' spaq'uic te c'alal la ya'iyic atimal.