Nehemías 2 - Bible in Tzeltal Bachajón

Artajerjes la yac' bahel ta Jerusalén Nehemías

¹ Ta u Nisán, ta jtahb (20) ha'bil yochel ta ajwalil a te Artajerjes, te c'alal tey ayix a te vino ta stojol, la jtsac soc la jca'be te ajwalil. Mayuc bin ora te jmeloj co'tan ta stojol,

² ha yu'un la sjoc'obon te ajwalil: ¿Bin yu'un te chican ta asit te ayat ta mel-o'tan? ma ba ayat ta chamel. Ha nax mel-o'tan, xchi. Bayel xiwon yu'un.

³ Hich la jcalbe te ajwalil: Sbahtel q'uinal cuxuluc me te ajwalil. ¿Bin ut'il ma ba ya jmel co'tan yu'un te jihnemix te pueblo te banti muculic te me'iltatiletic cu'un, soc lajemic ta c'ahc' te puertahetic yu'une? xchihon.

⁴ ¿Bin yac ac'an? xchi te ajwalil. La jc'opon te Dios ta ch'ulchan,

⁵ soc la jcalbe te ajwalil: Teme lec ya ya'iy te ajwalil soc teme lec ta asit te a'bat awu'une, ticonawon bahel ta Judá, ta pueblo te banti mucajtic te me'iltatiletic cu'un, scuenta yu'un ya jcha'pas xan, xchihon.

⁶ Ha yu'un te ajwalil, soc tey nix hucul a te ajwalil-ants, hich la yalbon: ¿Jayeb c'ahc'al te behel awu'un, soc bin ora ya suhtat tal? xchi. La jcalbe te bin ora ya suhton tal, lec la ya'iy te ajwalil te ya sticonon bahel.

⁷ Soc la jcalbe xan te ajwalil: Teme lec ya ya'iy te ajwalil, te yacuc ya'bon cartahetic yu'un te gobernadoretic ta jehch muc'ul-ha' scuenta yu'un ya yac'onic c'axel bahel c'alal ta Judá;

⁸ soc carta yu'un Asaf, te jcanan-tohyem te'etic yu'un te ajwalil, scuenta yu'un ya ya'bon te' yu'un ya jpas xan te puertahetic yu'un te sts'ahcul te Templo, te sts'ahcul te pueblo soc te na banti ya xnahinon, xchihon. Te ajwalil la ya'bon te bin la jc'ambe, como ay ta jtojol te sc'ab te Dios cu'une.

⁹ Hich talon ta stojol te gobernadoretic ta jehch muc'ul-ha', la jca'beyic te cartahetic yu'un te ajwalil. Soc te ajwalil la ya'bon joquin jtsobawetic yu'un soldadohetic soc jmoheletic ta cawu.

¹⁰ Pero c'alal hich la ya'iyic te Sanbalat te talem ta Horón soc te Tobías te a'bat te talem ta Amón, c'ax ma lecuc la ya'iyic te ay mach'a tal slehbe yutsil slequil te snich'nab Israel.

Nehemías ya ya'be yip yo'tanic ta scha'pasel te ts'ahc

¹¹ Hich c'ohon ta Jerusalén. Ta yoxebal c'ahc'al jc'ohel tey a,

¹² hahchon ta ahc'abal, joquinej cha'oxtuhl winiquetic, mayuc mach'a la jcalbe te bin la yalbon ta co'tan te Dios te ya jpas ta Jerusalén. Mayuc yan cawu quic'oj, hip a te mohemon a.

¹³ Ta ahc'abal loc'on bahel ta Puerta yu'un Spamlej, behenon bahel ta stojol te sloq'uib-ha' Dragón soc te puerta yu'un Tsa'najibal; la jtsahtay quil te sts'ahcul Jerusalén te jimbil soc te puertahetic yu'un te chic'ticlambilic.

¹⁴ Patil c'axon bahel ta puerta yu'un Sloq'uib-ha' soc ta yawil ha' yu'un Ajwalil, pero mayuc banti hu' ya xc'ax te cawu te cajalon a.

¹⁵ Hich mohon bahel ta uc'um ta ahc'abal soc la jtsahtay quil te ts'ahque, patil suhton tal, cha'ochon xan bahel ta Puerta yu'un Spamlej.

¹⁶ Te mach'atic ay ya'telic ma ba la sna'ic banti c'ohon soc te bin jpasoj; ma to ba calbeyej te judiohetic o te sacerdotehetic, te mach'atic ich'bilic ta muc', te mach'atic ay ya'telic, o te yantic te yaquic ta spasel te a'tele.

¹⁷ Ha yu'un hich la jcalbeyic: Ha'ex awilojic te jwocoltic: ha te jihnemix te Jerusalén soc c'ahq'uemiquix te puertahetic yu'un. La'ic, ya jpastic te sts'ahcul te Jerusalén scuenta yu'un ma ba ya quich'tiquix labanel a, xchihon.

¹⁸ Soc la jcalbe te bin ut'il lec ay ta jtojol te sc'ab te Dios cu'un, soc te bin la yalbon te ajwalil. Hich la yalic: Hachucotic ta scha'pasel, xchihic. Hich la yaq'uic fuersa ta spasel.

¹⁹ Pero te c'alal hich la ya'iyic te Sanbalat te talem ta Horón, te Tobías te talem ta Amón, soc te Gesem te talem ta Arabia, la slabanotcotic soc la sp'ajotcotic, hich la yalic: ¿Bin a ini te yaquex ta spasele? ¿Yu'un bal yac atoy abahic ta stojol te ajwalil? xchihic.

²⁰ Pero hich la jcalbeyic: Te Dios ta ch'ulchan ya me yac' te lec ya xc'ohotcotic. Te ho'otcotic te a'batotcotic yu'un ya jcha'hachcotic spasel te sts'ahcul, yan te ha'exe ma awochelicuc soc ma acuentahicuc soc mayuc ana'ojibal ta Jerusalén, xchihon.