Nehemías 13 - Bible in Tzeltal Bachajón

Nehemías la stojobtes ta bantic ma hichuc ta pasel

¹ Ta hich ora la yich' ilel ta stojol te pueblo te libro yu'un Moisés. Tey la yich' tahel a te ts'ihbabil hilel te bin ut'il te amonetic soc moabetic mayuc bin ora te jun ya xc'ohtic soc te pueblo yu'un Dios,

² como ma ba loq'uic ta stahel te snich'nab Israel ta ya'beyel swe'el yuch'elic, ha la ya'beyic taq'uin te Balaam yu'un ya sbohlc'optay. Pero te Dios cu'untic la sut ta bendición te bohlc'optayel.

³ Ha yu'un te c'alal la ya'iyic te bin la yal te Ley, la sloq'ueslanic ta stojol Israel spisil te mach'atic scapojix sbahic soc te jyanlumetique.

⁴ Ta nahil to, te sacerdote Eliasib te scuentahinej te yawil biluquetic ta sna te Dios cu'untic, ha smohlol ts'ahquil sba soc te Tobías.

⁵ Ya'beyejix te Tobías jun muc'ul tsahl na te banti yich'oj q'uejel mahtaniletic ta nahil to, ha te pom, te bintic ya xtuhun ta Templo, te jun ta slajunebal te trigo, vino soc aceite te halbil mandar te ya yich' a'beyel te levitahetic, te jc'ayojetic soc te jcanan-ti'nahiletic, soc te mahtaniletic yu'un te sacerdotehetique.

⁶ Te c'alal hich c'oht ta pasel, ma ba ayon ta Jerusalén a, como ta lahchayeb scha'winic (32) ha'bil yochel ta ajwalil a te Artajerjes ajwalil yu'un Babilonia cha'bohon xan ta stojol. C'alal c'axix tiempo a, la jc'ambe permiso te ajwalil

⁷ te ya suhton xan bahel ta Jerusalén. Hich ora la jna' te bin chopol spasoj te Eliasib ta sc'uxultayel te Tobías, ha te la ya'be jun tsahlul na ta yamaq'uil te sna Dios.

⁸ Mero ma lecuc la jca'iy, ha yu'un la jch'ojticlambe loq'uel ta fuera te bintic ay yu'un te Tobías.

⁹ La jcal mandar te ya yich' lecubtesel soc la jcac' te ya scha'och xan tey a te bintic ya xtuhun ta sna Dios, te mahtaniletic soc te pom.

¹⁰ Soc la jca'iy te ma ba yac yich'belic a'beyel swe'elic te levitahetique; soc te levitahetic soc jc'ayojetic te ya spasic te a'tel, jujutuhl bahtiquix ta ahnel ta sq'uinalic.

¹¹ Ha yu'un la jtijticlan ta c'op te mach'atic ay ya'telic, hich la jcal: ¿Bin yu'un te ch'aybilix awu'unic te sna Dios? xchihon. Hich la jtsobic te levitahetic soc la jcac'ticlan xan ta banti ya x'a'tejic.

¹² Spisil Judá la yich'ic tal te jun ta slajunebal te trigo, vino soc aceite, la yaq'uic ta yawil biluquetic ta templo.

¹³ La jca'be scuentahinic te biluquetic te sacerdote Selemías soc te maestro Sadoc, soc jtuhl levita-winic, Pedaías sbihil. La jcotses ta jcoltaywanej yu'unic te Hanán snich'an Zacur, snich'an Matanías, como na'bil te jun yo'tanic. Ay ta scuentahic spucbeyel te yermanotac te bintic ha yu'unic.

¹⁴ ¡Dios cu'un, ich'bon me ta cuenta te bin la jpas, soc ma me xatup' te bintic la jpas scuenta c'uxultayel ta sna te Dios cu'un soc ta a'tel yu'une! xchihon ta sc'oponel Dios.

¹⁵ Ta hich ora la jquil ta Judá te ay mach'atic ya sp'e' ta yoquic sts'usubic ta sc'ahc'alel cux-o'tan, ya scuchic tombil trigohetic, ya ya'beyic scuch vino, ts'usubetic, higohetic soc spisil yantic ihcatsiletic te burrohetic yu'unic, ya yich'ic bahel ta Jerusalén ta sc'ahc'alel cux-o'tan. Ha yu'un la jtijticlan ta c'op yu'un te yacalic ta chombajel ta c'ahc'al ini.

¹⁶ Soc ay mach'atic talemic ta Tiro te nahinemic ta Jerusalén te ya yich'ic tal chay soc spisil bintic ya yich' chonel, ya schombeyic ta sc'ahc'alel cux-o'tan te sts'umbal Judá te ayic ta Jerusalén.

¹⁷ Ha yu'un la jtijticlan ta c'op te mach'atic ich'bilic ta muc', hich la jcalbeyic: ¿Bin a te chopol yaquex ta spasel te yac abohlobtesbeyic sc'oblal te sc'ahc'alel cux-o'tan?

¹⁸ ¿Ma bal hichuc la spasic te ame'atatic, ha yu'un te Dios cu'untic la yac' taluc spisil te wocol ini ta jtojoltic soc ta stojol te pueblo ini? ¿Ya bal awaq'uic tohyuc xan yilimba ta stojol Israel yu'un te yac abohlobtesbeyic sc'oblal te sc'ahc'alel cux-o'tan? la jcut.

¹⁹ C'alal yac ta ihc'ubel bahel q'uinal a, ma to stahoj yorahil sc'ahc'alel cux-o'tanil a, la jcal mandar te ac'a yich'ticlan maquel te puertahetic yu'un Jerusalén soc ma ba ya yich' jamel ha to c'alal c'axix a te sc'ahc'alel cux-o'tanil. Soc la jcac' a'batetic cu'un ta puertahetic scuenta yu'un ma ba ya x'och tal ihcatsil ta sc'ahc'alel cux-o'tanil.

²⁰ Jun o cheb buelta te hilic ta fuera yu'un Jerusalén te jchombajeletic soc te mach'atic ya xchonic bayel ta chahp biluquetic.

²¹ Pero la jtijticlan ta c'op, hich la jcalbeyic: ¿Bin yu'un ya xhilex ta pat ts'ahc? Teme hich yac apasic yan buelta, ya me jtsaquex, la jcut. Hich mayuquix bin ora tal ta sc'ahc'alel cux-o'tanil.

²² Patil la jcalbeyic te levitahetic te yacuc slecubtes sbahic soc te yacuc xtal scanantayic te puertahetic, scuenta yu'un ch'ultesbil ya xhil te sc'ahc'alel cux-o'tanil. ¡Dios cu'un, ha nix hich na'awon yu'un te bin la jpas, c'uxultayawon ta scuenta te smuc'ul sc'uxul awo'tan! xchihon ta sc'oponel Dios.

²³ Soc ta hich ora la jquil te ay judiohetic te yic'oj yihnaminic antsetic te talemic ta Asdod, Amón soc Moab.

²⁴ J'ohlil te yal-snich'nabic c'opojic ta sc'op Asdod, ma ba sna'ic te sc'op judiohetic, ha c'opojic ta sc'op jujuchahp pueblo.

²⁵ La jtijticlan ta c'op, la jcalbe chopol sc'oblalic, la jmajticlan, la jbulticlambe stsotsel sjolic, soc la jcaq'uic ta yalel ta jamal ta stojol Dios, soc hich la jcalbe: Ma me xawa'beyic te awantsil-nich'anic te snich'nabic, soc ma me xawic'beyic yantsil-nich'nabic yu'un te aquerem-nich'anic, soc ha nix hichex ma me xawiq'uic.

²⁶ ¿Ma bal ha'uc hich la sta smul a te Salomón te ajwalil yu'un Israel? Mayuc yan ajwaliletic ta yantic nacionetic te pajal soc, te c'ux ta o'tanil yu'un te Dios yu'un soc te otsesot ta ajwalil yu'un ta stojol spisil Israel; aunque hich ay, a'bot sle smul yu'un te jyanlum-antsetique.

²⁷ ¿Ya nax bal yich' a'iyel te ha nix hich yaquex ta spasel te muc' mulil ini, te ma junuc awo'tanic ta stojol Dios, te awic'oj awihnaminic jyanlum-antsetique? la jcut.

²⁸ Ay jtuhl snich'nab Joiada, snich'an te muc'ul sacerdote Eliasib, la jten loq'uel ta jtojol yu'un ha snihal te Sanbalat te horon-winic.

²⁹ ¡Dios cu'un, na'a me te mach'a la sbohlobtesbe sc'oblal te a'tel ta sacerdotehil soc te chapbil-c'op scuenta sacerdote soc levitahetic! xchihon ta sc'oponel Dios.

³⁰ Ha yu'un la jloq'ues spisil te bintic scuenta jyanlumetic, la jca'be ya'telic te sacerdotehetic soc te levitahetic ta scuenta jujuchahp ya'telic.

³¹ Soc la jchahpan te ya xtal mahtanil si' ta yorahil, soc te sba sit ts'unub-awaliletic. ¡Dios cu'un, na'awon me te lecuc ya xc'ohon! xchihon ta sc'oponel Dios.