Nehemías 10 - Bible in Tzeltal Bachajón

¹ Te mach'atic la spasic firmar hich ay: Nehemías snich'anon Hacalías, te gobernador; Sedequías,

² Seraías, Azarías, Jeremías,

³ Pasur, Amarías, Malquías,

⁴ Hatús, Sebanías, Maluc,

⁵ Harim, Meremot, Obadías,

⁶ Daniel, Ginetón, Baruc,

⁷ Mesulam, Abías, Mijamín,

⁸ Maazías, Bilgai soc Semaías. Ha sacerdotehotic ini.

⁹ Te levitahetic: Jesúa snich'an Azanías, Binuy, sts'umbal Henadad, soc Cadmiel

¹⁰ soc yermanotac, ha Sebanías, Hodías, Kelita, Pelaías, Hanán,

¹¹ Micaía, Rehob, Hasabías,

¹² Zacur, Serebías, Sebanías,

¹³ Hodías, Bani soc Beninu.

¹⁴ Te jtsobawetic yu'un te pueblo: Paros, Pahat-moab, Elam, Zatu, Bani,

¹⁵ Buni, Azgad, Bebai,

¹⁶ Adonías, Bigvai, Adín,

¹⁷ Ater, Ezequías, Azur,

¹⁸ Hodías, Hasum, Bezai,

¹⁹ Harif, Anatot, Nebai,

²⁰ Magpías, Mesulam, Hezir,

²¹ Mesezabeel, Sadoc, Jadúa,

²² Pelatías, Hanán, Ananías,

²³ Oseas, Hananías, Hasub,

²⁴ Halohes, Pilha, Sobec,

²⁵ Rehum, Hasabna, Maasías,

²⁶ Ahías, Hanán, Anán,

²⁷ Maluc, Harim soc Baana.

²⁸ Te yantic mach'atic ayic ta pueblo, ha te sacerdotehetic, levitahetic, jcanan-ti'nahiletic, jc'ayojetic, a'batetic ta Templo, soc spisil te mach'atic parte yac'oj sbahic yu'un te ants-winiquetic ta q'uinal yu'un ya yac' sbahic ta stojol te ley yu'un Dios, soc te yihnamic, queremetic soc ach'ixetic yu'unic, spisil te mach'atic ya sna'beyic scuentahil soc te ya sna'ic stsahtayel,

²⁹ spisilic la stsob sbahic soc te yermanotac soc te príncipaletic yu'unic, yu'un ya yalic ta jamal te ya st'unic te ley yu'un Dios te a'bot ta scuenta Moisés te a'bat yu'un Dios, soc te ya scanantayic soc ya sc'ohtesic ta pasel te mandariletic soc spisil bintic yaloj ta mandar te Jehová te Cajwaltique.

³⁰ Soc te ma ba ya ca'betiquix te cantsil-nich'nabtic te winiquetic ta q'uinal, soc ma ba ya ca'becotic yic' yantsil-nich'anic te queremetic cu'uncotique.

³¹ Soc teme ay ya xtal jyanlumetic ta schonel biluquetic soc we'elil ta sc'ahc'alel cux-o'tan, ma ba ya jmambetic ta hich ora o ta yan ch'ultesbil c'ahc'al. Soc ta huc-huqueb ha'bil ya ca'betic scux yo'tan te q'uinal, soc ya jch'aytic spisil betiletic.

³² La caltic ta mandar te ta jujun ha'bil ya cac'tic jun ta yoxebal siclo plata yu'un te a'tel ta sna te Dios cu'untic,

³³ yu'un te pan ya yich' aq'uel ta stojol Dios, te mahtanil harina soc te scohtol chic'bil mahtanil te ya yich' aq'uel jujun c'ahc'al soc ta sc'ahc'alel cux-o'tan, ta yach'il u, te yantic q'uinetic, soc yu'un te bintic ch'ultesbil, te milbil mahtaniletic scuenta stojel mulil yu'un Israel, soc ta spisil te a'teliletic ya yich'ic pasel ta sna te Dios cu'untique.

³⁴ Soc te sacerdotehetic, levitahetic soc spisil te pueblo la jpastic seña ta na'el mach'a sna te ya yich' tal mahtanil yu'un si' yu'un te sna te Dios cu'untic ta yorahil ta jujun ha'bil, scuenta yu'un ya yich' chiq'uel mahtaniletic ta scajtajib ta chiq'uel smahtan Jehová te Dios cu'untic, hich te bin ut'il ts'ihbabil ta Ley.

³⁵ Soc ta jujun ha'bil ya quich'tic talel ta sna Jehová te sba sit te awal-ts'unubil soc te sba sit te te'etic.

³⁶ Ha nix hich ya quic'tic tal te ba-alaletic cu'untic, te sba-yal te chambahlametic cu'untic, hich te bin ut'il ts'ihbabil ta Ley, soc ya quic'tic tal te sba-yal wacax soc tuminchij cu'untic ta sna te Dios cu'untic ta stojol te sacerdotehetic te ayic ta a'tel ta sna te Dios cu'untique.

³⁷ Soc ya quich'tic tal ta snahul biluquetic ta sna Dios cu'untic te shahchibal te bin ya yich' juch'el, te mahtanil harina, te sit spisil te'etic, vino soc aceite, te ha yu'un te sacerdotehetic. Soc ya quich'betic tal te levitahetic te jun ta slajunebal te bintic ya xloc' ta q'uinal, como ha te levitahetic te ya stsobic te jun ta slajunebal ta spisil te pueblohetic banti ya x'a'tejotic.

³⁸ Te bin ora ya xbahtic te levitahetic ta stsobel te jun ta slajunebal ya me xjoquinotic yu'un jtuhl sacerdote snich'an Aarón. Te levitahetic ya me yich'ic bahel ta snahul biluquetic ta sna Dios cu'untic te jun ta slajunebal te bintic tsobilixe.

³⁹ Te israeletic soc te levitahetic ya sc'an ya yich'ic bahel ta snahul biluquetic te mahtaniletic trigo, vino soc aceite. Tey ya x'ayin a te bintic ya xtuhun ta ch'ul awilal, soc tey nahinic a te sacerdotehetic te ya x'a'tejic soc te jcanan-ti'nahiletic soc te jc'ayojetique. Ya caltic ta jamal te ma ba ya quihquitaytic te sna te Dios cu'untique.