Miqueas 7 - Bible in Tzeltal Bachajón

Bohloben scuxlejal Israel

¹ ¡Obol jba! yu'un hich c'ohemon te bin ut'il c'alal tsobilix sit a ta yorahil snahtil c'ahc'al, c'alal c'axemix ta lehel a te bintic hilem yu'un te ts'usubil, mayuc hilem jchejuc ta we'el, mayuc hilem te sit te bayel ya jmulan.

² Mayuquix ta q'uinal te mach'a ay sc'uxul yo'tan, mayuc hilem ta yohlil te ants-winiquetic te mach'a toj yo'tan; spisilic ya xmacliywanic yu'un ya xmilawanic, jujutuhl ya schahpambe syacol te yermanohe.

³ Scuenta ts'acal ya spas te bin chopol, te príncipal ay bin ya xc'ambot yu'un, te juez ya sc'an smahtan ta chahpanwanej; te mach'a muc' sc'oblal ya yal chican bin ya sc'an yo'tan, pajal ya yaq'uic c'ohtuc ta pasel.

⁴ Te mach'a lec yilel hich c'ohem te bin ut'il ch'ix; te mach'a mero toj hich c'ohem te bin ut'il jpeht ch'ix. Yac ta talel te sc'ahc'alel castigo awu'un, ha te bin la yalic te j'il-q'uinal awu'un; yorahilix te howiyel awu'une.

⁵ Ma xach'uhumbe sc'op te apat-axuhc, ma me smuc'ulin awo'tan te mach'a jun awo'tan aba soc; tsahtaya aba ta stojol te mach'a ya xway ta ats'ehl, ma me ayuc bin yac awal.

⁶ Como te querem ma xyich' ta muc' te stat, te ach'ix ya scontrahin te snan, te alibal ya scontrahin te yalibme'el, te scontratac te winic, ha nix te mach'a ay ta sna.

⁷ Pero te ho'one ya cac' jsit ta stojol te Jehová, ha ya jmahliy te Dios yu'un te jcolele; ya ya'iybon jc'op te Dios cu'une.

Jehová ya yac' sacal q'uinal soc ya yac' ta libre

⁸ Ha'at jcontrahat, ma me tse'eluc awo'tan ta jtojol, aunque yahlon, ya xhahchon; aunque ya xnahinon ta yihc'al q'uinal, ha sacal q'uinal cu'un te Jehová.

⁹ Ya xcuhch cu'un te yilimba te Jehová, como jtahoj jmul ta stojol, ha to c'alal ya xchahpanon soc ya spas te bin stojil ta jtojol. Ha ya yic'on bahel ta sacal q'uinal, ya me quil te bin stojil ya spas.

¹⁰ Ya me yil te jcontra, soc ha ya xpotsot ta q'uexlal te mach'a hich la yalbon: ¿Banti ay te Jehová te Dios awu'un? te xchihe. Tse'el co'tan ya quil te c'alal hich ya yich' ts'o'el ta teq'uel te bin ut'il ahch'al ta callehetic.

¹¹ Ya xc'oht sc'ahc'alel te ya yich' pasel xan te ts'ahquetic awu'un, ta hich ora ya xmuc'ub bahel te sti'ile.

¹² Ta hich ora ya me xtalic ta atojol c'alal ta Asiria ha to ta pueblohetic yu'un Egipto, c'alal ta Egipto ha to ta muc'ul-ha' Éufrates, c'alal ta mar ha to ta yan mar, c'alal ta wits ha to ta yan wits.

¹³ Jochol taquin q'uinal ya xc'oht te q'uinal ta scaj te mach'atic nahinemic tey a, ta scaj te sit te ya'telique.

Sc'uxul yo'tan Jehová ta stojol Israel

¹⁴ Canantaya te pueblo awu'un soc anabete', ha te jtsohb tuminchijetic te ha awu'un c'oht, te stuquel nahinem ta ha'maltic, ta lequil q'uinal; ac'a we'uquic ta Basán soc ta Galaad, hich te bin ut'il ta namey.

¹⁵ Ya ca'be yilic jchahp a'teliletic hich te bin ut'il c'alal loq'uex tal ta Egipto.

¹⁶ Ya me yilic te nacionetic, ya xq'uexawic yu'un spisil te yipique; ya me smac yehic ta sc'abic soc ya me xmahc schiquinic.

¹⁷ Ya me sleq'uic ts'u'lum hich te bin ut'il chan, hich te bin ut'il te chanetic ta q'uinal; Yaquic ta nihquel a ya xloq'uic tal ta banti snac'oj sbahic, soc bayel xiwel ya xtalic ta stojol Jehová te Dios cu'untic, ya me xiwic ta atojol.

¹⁸ ¿Mach'a yan Dios te pajalat soc, te ya spas perdón yu'un te bin chopol, soc te ya sch'ay ta yo'tan te smul te mach'a cuxul hil yu'un te mach'atic ay yu'une? Ma spisiluc ora ay yilimba, como ya smulan te ya ya'iy c'uxultaywanej.

¹⁹ Ya scha'na'botic xan yo'bolil jbahtic; ya sts'o'ts'o'tec' te jmultic, soc ya sch'oj bahel ta sc'ubulil mar spisil te jmultique.

²⁰ Stalel junuc me awo'tan ta stojol Jacob, soc ya me ac'uxultay te Abraham, hich te bin ut'il la awal ta jamal ta namey ta stojol te me'iltatiletic cu'uncotique.