Miqueas 5 - Bible in Tzeltal Bachajón

Te cuentahinel yu'un mach'a ya xcoltaywan ta libre

¹ Tsoba abahic ta yutil te ts'ahc, yal-snich'anat soldadohetic, como joytaybilotic ta guerra; ya smajbeyic scho' ta xul te jtsobaw yu'un Israel.

² Pero ha'at, Belén Efrata, aunque tut ayat ta yohlil te mach'atic yu'un Judá, ya xloc' tal ta atojol te mach'a ajwalil ya xc'oht yu'un Israel; nameyix te shahchibal, c'ax bayel ha'bil.

³ Pero Dios ya yihquitayic hilel ha to c'alal ya x'ayin yal te ants te swoloj yal, soc te ya scha'joquinic te snich'nab Israel te yermanotac te hilemique.

⁴ C'alal ya xtal ya me xhahch scanantay ta scuenta yu'el te Jehová, ta scuenta yutsil sbihil te Jehová te Dios yu'une; jun yo'tan ya x'ayinic, como muc' sc'oblal ya xc'oht c'alal ta sti'il te bahlumilale;

⁵ ha lamal q'uinal cu'untic ya xc'oht. C'alal ya xtal te asiriahetic ta jq'uinaltic soc ya x'ochic ta t'ujbil muc'ul nahetic cu'untic, ya jticontic bahel huctuhl jcananetic soc waxactuhl príncipaletic te ya scontrahinic,

⁶ te ya scuentahinic ta espada te sq'uinal Asiria, te sq'uinal Nimrod ta scuenta ye te espada. Ya scoltayotic ta sc'ab te asiriahetic c'alal ya xtal scontrahinic te jq'uinaltic, c'alal ya yochintaybotic te sti'il te jq'uinaltique.

⁷ Te mach'atic hilemic yu'un Jacob hich ya xc'ohtic ta yohlil bayel pueblohetic te bin ut'il te ts'ujul yu'un Jehová, hich te bin ut'il ha'al ta sba te ha'maletic, te ma ba ya yich' ta cuenta te winic, ma ba ya smahliy te ants-winiquetique.

⁸ Te mach'atic yu'un Jacob te hilemic hich ya xc'oht ta yohlil te nacionetic, ta yohlil tsobol pueblohetic, te bin ut'il choj ta yohlil te ha'mal chambahlametic, hich te bin ut'il yal choj ta yohlil jtsohb tuminchijetic, te ya xtal, ya sts'o' ta teq'uel, ya sbutsticlan, mayuc mach'a ya scoltay bahel.

⁹ Yac ahach ac'ab ta stojol te acontratac, ya xlajic spisil te mach'atic ya scontrahinat.

¹⁰ Ta hich ora, xchi te Jehová, ya cac' ya xlaj te cawuhetic awu'un soc ya cac' ya xjihn te carretahetic yu'un guerra awu'une.

¹¹ Soc ya jimbat te pueblohetic ta aq'uinal, soc ya jimbat cohel spisil te tulan ahnibaletic awu'une.

¹² Ha nix hich ya jlajimbat te j'ac'-chameletic awu'un, soc ma ba ya xchicnaj jna'ojel ta atojol.

¹³ Ya jimbat te bintic lop'talambil soc te tonetic ch'ultesbilic awu'une; mayuquix bin ora yac aquejan aba ta stojol te ya'tel ac'ab.

¹⁴ Ya jbulbat loq'uel ta awohlil te sloc'omba Asera awu'un, soc ya jimbat te pueblohetic awu'une.

¹⁵ Ta scuenta quilimba soc sc'ahc'al co'tan ya ca'be spacol te nacionetic te ma ba la sch'uhumbonic te jc'ope.