Miqueas 3 - Bible in Tzeltal Bachajón

Slehbeyel smul te jtsobawetic yu'un Israel

¹ Patil hich la jcal: A'iya awa'iyic, príncipaletic yu'un Jacob, soc jtsobawetic yu'un te sna Israel, ¿ma bal hichuc ya sc'an te yac ana'ic te bin stojil ta pasele?

² Pero yac ap'ajic te bin lec soc c'ux ta awo'tanic te bin chopole; yac aloq'uesbeyic snuhculel te pueblo cu'un soc te sbaq'uetal ta sbaquelic;

³ soc yac ati'beyic sbaq'uetal te pueblo cu'un, yac ach'i'beyic snuhculel, yac awac'beyic sbaquelic; yac asesenic hich te bin ut'il ti'bal ya x'och ta caldero, hich te bin ut'il ti'bal ya x'och ta oxom.

⁴ Ya me sta yorahil te yac awawtayic te Jehová, pero ma ba ya sjac'beyex ac'opic; ta hich ora ya me snac' sit yelaw ta atojolic ta scaj te chopol awa'telique.

⁵ Hich yaloj te Jehová sc'oblal te jalwanejetic te ya yac' howijuc bahel te pueblo cu'un, te hich ya yalic ta aw: Lamal q'uinal, xchihic te c'alal ay swe'elic, yan te mach'atic ma ba ya x'a'bot swe'elic yu'un ya yalbeyic sc'oblal guerra.

⁶ Ha yu'un ahc'abal ya xc'oht ta atojolic, mayuc nahalsitil, yihc'al q'uinal ya xc'oht ta atojolic, mayuc bin ya x'a'botex ana'ic. Ya xmahl c'ahc'al ta stojol te jalwanejetic, ya x'ihc'ub te c'ahc'alel ta stojolic.

⁷ Ya xq'uexawic te jalwanejetic soc ma sna' bin ya spasic te jna'ojeletique. Spisilic ya me smac yehic, como mayuc suhtib yu'un Dios.

⁸ Yan te ho'one nojel te co'tan ta yu'el te espíritu yu'un Jehová nojel ta stojil chahpanel soc ta quip, yu'un yalbeyel te stoybahil te Jacob soc te smul te Israel.

⁹ A'iya awa'iyic ini, jtsobawex yu'un te sna Jacob, capitanex yu'un te sna Israel, te yac ap'ajic stojil chahpanel soc te yac ajinic spisil te bintic toj,

¹⁰ te yac apasic te Sión ta scuenta ch'ich' soc te Jerusalén ta scuenta ma stojiluc chahpanel.

¹¹ Te jtsobawetic yu'un ya schahpanwanic ta taq'uin, te sacerdotehetic yu'un tojbil ya xnohpteswanic, te jalwanejetic yu'un ta scuenta taq'uin ya yalic bin ya sna'ic, soc yich'oj yipic ta Jehová, hich ya yalic: ¿Ma bal sjoquinejotic te Jehová? Mayuc bin chopol ya xtal ta jtojoltic, xchihic.

¹² Ha yu'un ha'ex ta acuentahic ya yich' tuquel te Sión, ya xc'atp'uj ta busul jinel te Jerusalén, soc te wits yu'un te Templo ya xpotsot ta ha'mal.