Miqueas 1 - Bible in Tzeltal Bachajón

Mel-o'tan ta stojol Samaria soc Jerusalén

¹ Ha te sc'op Jehová te tal ta stojol Miqueas te talem ta Moreset, te bin la yil sc'oblal Samaria soc Jerusalén ta yorahil te Jotam, Acaz soc Ezequías, ajwaliletic yu'un Judá.

² A'iya awa'iyic apisilic, pueblohetic; a'iya awa'iyic lumq'uinal soc spisil mach'atic ayic tey a, te Jehová te Ajwalil ha testigo ta scontrahimbelex, ha te Ajwalil c'alal ta sch'ul templo.

³ Como te Jehová ya xloc' tal ta banti nahinem, ya xco tal, ya xbehen ta toyol awilaletic ta q'uinal.

⁴ Ya x'uhl cohel te witsiltic ta ye'tal yoc, ya xjat cohel te spamlejetic hich te bin ut'il chabec' ya x'uhl ta stojol te c'ahc', hich te bin ut'il ya x'oquin cohel ha' ta cohel q'uinal.

⁵ Ta spisil ini ha ta scaj stoybahil te Jacob, ta scaj smul te sna Israel. ¿Bin a te stoybahil te Jacob? ¿Ma bal ha'uc te Samaria? ¿Bin a te toyol awilal yu'un Judá? ¿Ma bal ha'uc te Jerusalén?

⁶ Ha yu'un ya cac' te busul ya xhil ta jinel te Samaria, ha lumq'uinal ta banti ya yich' ts'unel ts'usubiletic. Ya jbusq'uin cohel ta spamlej te tonetic yu'un soc ya cac' te ya xchicnaj te yich'o-ip.

⁷ Spisil te ch'ultesbil te'etic yu'un ya yich'ic wuyticlanel, ya yich'ic chiq'uel spisil te mahtaniletic yu'un, soc ya jinticlan spisil te loc'ombahetic yu'une, como la stsobticlan ta scuenta stojol j'antsinel antsetic, soc ha nix stojol j'antsinel antsetic ya yich' tuhunel yan buelta.

⁸ Ha yu'un te ya x'oc'on soc ya x'ahcanajon; mayuc jtep soc watalon a ya xbehenon; ya x'ahcanajon hich te bin ut'il ha'mal ts'i' soc ya x'awonon hich te bin ut'il avestruz-mutetic.

⁹ Como mayuc spoxil te yehchen, c'ohtix c'alal ta Judá; c'ohtix c'alal ta pueblo cu'un, c'alal ta Jerusalén.

¹⁰ Ma xawalic ta Gat, soc ma x'oq'uex; baletanic ta sts'ubil lum ta Bet-el-afra.

¹¹ ¡C'axan bahel, ha'at te nahinemat ta Safir, watalat soc q'uexlal! ¡Ma ba ya xloc' tal te mach'a nahinem ta Zaanán! ¡Ay oq'uel ta Bet-esel! Ya yich' loq'uesel te coltayel awu'unic.

¹² Como te mach'atic nahinemic ta Marot wocol ya smahliyic te bin lec, como te Jehová la yac' te ya xc'oht te bin chopol ta yochibal te Jerusalén.

¹³ Chucahic ta carreta te cawuhetic, ha'ex te nahinemex ta Laquis. Tey hahch a te smul te yantsil-nich'an Sión, como chicnaj ta atojolic te toybahiletic yu'un Israel.

¹⁴ Ha yu'un yac awa'beyic mahtaniletic te Moreset-gat yu'un te ya xbahexe; te nahetic yu'un Aczib ha jlo'loywanejetic ya xc'ohtic ta stojol te ajwaliletic yu'un Israel.

¹⁵ Ya jticombeyex yan mach'a ya stsalex, ha'ex te nahinemex ta Maresa, te yutsilal te Israel ya xc'oht ta Adulam.

¹⁶ Bula loq'uel, quits'a stsotsel ajol, yu'un te awal-anich'nab te c'ux ta awo'tane; t'axana ajol hich te bin ut'il sjol te hos, como namal ya xbahtic ta chuquel ta atojol.