San Mateo 28 - Bible in Tzeltal Bachajón

Cha'cuxaj Jesús

¹ C'axix a te sc'ahc'alel cux-o'tan, yac to nax ta sacubel q'uinal ta sba c'ahc'alil semana a, c'oht yilic te muquenal te María Magdalena soc te yan María.

² Tal tulan nihquel, yu'un co tal ta ch'ulchan jtuhl ch'ul a'bat yu'un te Cajwaltic, baht ta muquenal, la sbalch'un loq'uel te ton, la shuhcan sba tey a.

³ Hich yilel te bin ut'il tsantsehwal, soc sac sc'u' spac' hich te bin ut'il me'sic.

⁴ Tojic xiwel yu'un te jcananetic, hahchic ta nihquel, hich c'ohtic te bin ut'il chamenic.

⁵ Pero te ch'ul a'bat hich la yalbe te antsetic: Ma xiwex, jna'oj te yac alehic te Jesús te laj ta cruz.

⁶ Ma ba li' ayixi, cha'cuxajix, hich te bin ut'il la yal. La', ilawilic te banti la yich' xahch'ambeyel sbaq'uetal te Cajwaltique.

⁷ Bahanic ta ora, halbeyahic ya'iy te jnopojeletic yu'un te cha'cuxajix tal ta yohlil te mach'atic chamenic, soc ya xnahilij bahel awu'unic ta Galilea, tey ya xc'oht awilic a. La me jcalbeyex awa'iyic, xchi.

⁸ Hich loq'uic tal ta muquenal te antsetic soc xiwel soc bayel yutsil yo'tanic, bahtic ta ahnimal ta yalbeyel te jnopojeletic te bin yach'il c'ohtix ta pasel. Te c'alal yacalic ta behel bahel ta yalbeyel a te jnopojeletic te bin yach'il c'ohtix ta pasel,

⁹ c'ohtic ta tahel yu'un Jesús, hich halbotic yu'un: ¡Talonix! xchi. Nohpojic bahel ta stojol, la spetbeyic yoc soc la sch'uhuntayic.

¹⁰ Hich halbotic yu'un te Jesús: Ma xiwex. Bahanic, halbeyahic ya'iy te quermanotac te bin yach'il c'ohtix ta pasel. Ac'a bahticuc ta Galilea, tey ya xc'oht yilonic a, xchi.

Te jcananetic c'oht yalic bin c'oht ta pasel

¹¹ Te c'alal yacalic ta behel bahel a te antsetic, cha'oxtuhl jcananetic ochic bahel ta pueblo, c'oht yalbeyic ya'iy te principal sacerdotehetic spisil te bin c'ohtix ta pasel.

¹² Te principal sacerdotehetic la stsob sbahic soc te mamaletic, la syom sc'opic soc la ya'beyic bayel taq'uin te soldadohetic,

¹³ hich la yalic: Hich me xawalic: Talic ta ahc'abal te jnopojeletic yu'un, la yelc'anic bahel c'alal wayalotcotic a, xchihanic me.

¹⁴ Teme la ya'iy te gobernador, ya cac'cotic xc'ohtuc ta yo'tan, hich ya colex cu'uncotic, xchihic.

¹⁵ Te soldadohetic la yich'ic te taq'uin, hich nix la yalic a te bin ut'il halbotic. Hich la yich' puquel ta halel ta yohlil te judíohetic c'alal ora.

Jesús la ya'be hilel ya'telic te jnopojeletic yu'un

¹⁶ Te buluchtuhl (11) jnopojeletic bahtic ta Galilea ta wits ta banti halbotic yu'un te Jesús.

¹⁷ C'alal la yilic te Jesús, la sch'uhuntayic; pero ay mach'atic xchebet yo'tanic.

¹⁸ Nohpoj tal te Jesús, hich la yalbe: A'botonix quich' tulan ca'tel ta ch'ulchan soc ta bahlumilal.

¹⁹ Ha yu'un bahanic, otsesahic ta jnopojel spisil te nacionetic, ac'ticlambeyahic yich'ic ha' ta scuenta te Tatil, te Nich'anil soc te Ch'ul Espíritu,

²⁰ soc ac'ticlambeya snopic te ya me sch'uhunic spasel spisil bintic la jpasex ta mandar. Te ho'one joquinejex spisil ora, yalel c'alal ta slajel bahlumilal, xchi te Jesús. Hichuc.