San Mateo 24 - Bible in Tzeltal Bachajón

Jesús la yal te ya xjihnot te Templo

¹ C'alal loc' bahel ta Templo te Jesús, yaquix ta bahel a, nohpoj tal te jnopojeletic yu'un, la ya'beyic yil te nahetic yu'un te Templo.

² Hich halbotic yu'un te Jesús: ¿Ya bal awilic spisil ini? Jamal ya calbeyex te mayuc cajal ya xhil junuc ton ta sba yan ton, spisil me ya yich' jinticlanel, xchi.

Señahiletic ya xchicnaj ta nopol slajibal c'ahc'al

³ C'alal hucul ta Wits yu'un Olivohetic a te Jesús, stuquel nohpojic tal te jnopojeletic, hich la yalbeyic: Hala ca'iycotic, ¿bin ora ya xc'oht ta pasel ini soc bin señahil yu'un te ya xtalat soc yu'un te slajibal c'ahc'al? xchihic.

⁴ La sjac' te Jesús: Xawil me abahic, ma me ayuc mach'a ya slo'loyex,

⁵ como bayel me yich'beyejon jbihil ya xtalic, te hich ya yalic: Ho'on Cristohon, xchihic; bayel mach'atic ya slo'loylanic.

⁶ Yac awa'iyic te ay guerrahetic soc ya xchicnaj sc'oblal te ya xhahch guerrahetic, pero ma me xnihc awo'tanic yu'un, como ya sc'an ya xc'oht ta pasel spisil ini; pero ma to ha'uc te slajibal c'ahc'ale.

⁷ Ya xhahch scontrahin sbahic nacionetic, soc ya scontrahin sbahic te jujuchahp banti scuentahinejic; ya xtal wi'nal soc nihquel ta bayuc.

⁸ Pero ta spisil ini shahchibal to nax te sc'uxule.

⁹ Ya me yaq'uex ta c'abal scuenta uts'inel, ya smilex soc yac awich'ic ihlayel yu'un spisil ants-winiquetic ta scaj te jbihile.

¹⁰ Ta hich ora ay tsobol mach'atic ya xchebaj yo'tanic, talel c'axel me ya yac' sbahic ta c'abal soc talel c'axel me ya yihlay sbahic.

¹¹ Ya xchicnaj hahchel tsobol lotil jalwanejetic soc ya slo'loylanic tsobolic.

¹² Ta scaj te ya xp'ohl te mulil, bayel mach'atic ya xpehc'aj te sc'uxul yo'tanique.

¹³ Pero te mach'a ya xcuhch yu'un c'alal ta slajibal, ha me ya xcol stuquel.

¹⁴ Ya me xpuhc ta halel ta swohlol bahlumilal sc'oblal te lec yach'il c'op yu'un te cuentahinel yu'un Dios, scuenta testigo-c'op ta stojol spisil nacionetic, ha to me ya xtal a te slajibal c'ahc'ale.

¹⁵ Ha yu'un te bin ora yac awilic ta ch'ul awilal te bin ilobtic sba te ya xjinawan, te la yalbe sc'oblal te jalwanej Daniel, (te mach'a ya yil te hun ini, ac'a me sna'be scuentahil),

¹⁶ ha yu'un te mach'atic ayic ta Judea ac'a me ahnuquic bahel ta witsiltic.

¹⁷ Te mach'a ay ta ba na, ma me xco tal yu'un ya sloq'ues te bin ay ta sna;

¹⁸ soc te mach'a ay ta sq'uinal, ma me suht bahel ta stamel te smuc'ul-c'u'.

¹⁹ ¡Ay me swocolic te mach'atic swoloj yal a soc te ay chu'alaletic yu'unic ta hich ora!

²⁰ C'ambeyahic Dios te manchuc yorahiluc sic a te ya x'ahnex bahel soc te manchuc sc'ahc'alel cux-o'tan a,

²¹ como ya me xtal tulan wocol ta hich ora, te mayuc hich c'ohem ta pasel ta shachel to tal bahlumilal c'alal ora, soc mayuc hich ya xc'oht xan ta patil.

²² Te manchuc ya xpehc'ambot sc'ahc'alel, mayuc mach'a ya xcol te hichuque. Pero ta scaj te mach'atic tsahbilic ya xpehc'ambot sc'ahc'alel.

²³ Ha yu'un teme ay mach'a hich ya yalbeyex: Ilawilic, li' ay te Cristo, o: Ilawilic, tey ay a, teme xchihe, ma me xach'uhunic.

²⁴ Como ya xchicnaj hahchel lotil cristohetic soc lotil jalwanejetic soc ya spasic muc' señahiletic soc jchahp a'teliletic yu'un ya slo'loyic te mach'a tsahbilic, te yacuc xhu' yu'unique.

²⁵ Ilawilic, nahil la jcalbeyex awa'iyic.

²⁶ Ha yu'un teme ay mach'a ya yalbeyex: Ilawilic, ay ta jochol taquin q'uinal, teme xchihe, ma me xloq'uex bahel tey a; o: Ilawilic, ay ta yutil tsahlul na, teme xchihe, ma me xach'uhunic.

²⁷ Como hich te bin ut'il tsantsehwal te ya xchicnaj c'alal banti ya xloc' tal c'ahc'al ha to banti ya xmahl c'ahc'al, hich ya xtal te Nich'anil ay ta scuenta winic.

²⁸ Ta banti ay te chamen baq'uet, tey ya stsob sbahic a te hosetique.

Ya xcha'tal te Nich'anil ay ta scuenta winic

²⁹ Xc'ax nax a te bayel wocole, ya x'ihc'ub te c'ahc'al, ma xyac' sts'anabul te u, ya xch'ay cohel tal ta ch'ulchan te eq'uetic soc ya me syuc' sbahic te bintic ay ta sjamalil ch'ulchan.

³⁰ Tey ora ya xchicnaj tal ta ch'ulchan a te seña yu'un te Nich'anil ay ta scuenta winic, hich ya xhahch smel yo'tanic spisil te jaychahp mach'atic ayic ta bahlumilal, ya me yilic te Nich'anil ay ta scuenta winic te yac ta talel ta stocalil ch'ulchan soc yu'el soc bayel yutsilal.

³¹ Soc ya me sticonlan bahel te ch'ul a'batetic yu'un soc tulan yoq'uel corneta, ya stsobic tal ta schanebal ic' te mach'atic tsahticlambil yu'un, c'alal ta jehch ta jehch sti'il te ch'ulchane.

³² Ta scuenta te higuera nopahic bin ut'il ay te sloc'ombahil c'op: C'alal ya x'uhnenub te sc'ab soc ya xloc' tal te ya'binal, yac ana'ic te nopol ya sta yorahil te ha'alel q'uinal.

³³ Ha nix hichex te c'alal yac awilic spisil ini yac ana'ic te nopol ya sta yorahil, te ayix ta mero ti'nahil.

³⁴ Jamal ya calbeyex, ma to xlaj a te jcaj ts'umbalil ini te ya xc'oht ta pasel spisil ini.

³⁵ Ya xlaj ch'ulchan soc bahlumilal, pero ma ba ya xlaj stuquel te jc'ope.

³⁶ Pero mayuc mach'a ya sna' bin c'ahc'alil soc bin orahil, ni ha'uc te ch'ul a'batetic ta ch'ulchan ni ha'uc te Nich'anil, ha nax stuquel te Tatile.

³⁷ Hich te bin ut'il ta yorahil Noé, hich nix ay ta yorahil ya xtal te Nich'anil ay ta scuenta winic.

³⁸ Como te bin ora ma to xtal a te puhlel, yacalic ta we'el uch'el, yacalic ta nuhpunel soc yac yac'belic nuhpunel a, ha to c'alal och ta barco te Noé,

³⁹ ma ba la sna'ic ha to c'alal tal te puhlel soc spisilic lajinotic yu'un, hich ya xtal te Nich'anil ay ta scuenta winic.

⁴⁰ Ay cha'tuhl te sjoc sbahic ta a'tel ta sq'uinal, jtuhl ya x'ic'ot, jtuhl ya xhil.

⁴¹ Ay cha'tuhl antsetic te sjoc sbahic ta juch', jtuhl ya x'ic'ot, jtuhl ya xhil.

⁴² Cuxuluc me awo'tanic, como ma na'biluc awu'unic bin ora ya xtal te Ajwalil awu'unique.

⁴³ Na'ahic me, te lajuc sna' te yajwal na te bin ora ya xtal j'elec', la sq'uehlan sit, ma ba la yac' ta elc'anel sbiluc te hichuque.

⁴⁴ Ha nix hichex, chapaluquex me, como ya xtal te Nich'anil ay ta scuenta winic te bin ora ma ba yac ana'belic a.

Te lequil a'bat

⁴⁵ ¿Mach'a yac awa'iy a te a'bat te jun yo'tan soc p'ij, te a'bot scuentahimbe sna te yajwal yu'un ya ya'iy mac'linwanej ta yorahil?

⁴⁶ Bayel me yutsil te a'bat te hich yac spasbel a te ya xhul ta tahel yu'un te yajwale.

⁴⁷ Jamal ya calbeyex, ya me x'a'bot ta scuenta spisil bintic ay yu'un te yajwale.

⁴⁸ Yan teme hich ya yal ta yo'tan te mach'a ma lequil a'batuc: Ma orahuc ya xtal te cajwal, teme xchihe,

⁴⁹ hich ya xhahch smajticlan te smohlol ta a'batil soc ya sjoquin ta we'el ta uch'el jyacubeletic,

⁵⁰ ya xtal te yajwal te a'bat te c'alal ma ba yac smahliybel soc te bin ora ma ba yac sna'bel a,

⁵¹ ya me x'a'bot tulan castigo yu'un, soc ya x'a'bot sjoquin te jchebal-o'tanetic, tey ya xc'oht yoq'uetay sba soc tey ya xc'oht sc'uxuxan ye a.