San Mateo 16 - Bible in Tzeltal Bachajón

La sc'an yilic seña

¹ Talic fariseohetic soc saduceohetic yu'un ya stsajic te Jesús. La sc'ambeyic te yacuc x'a'bot yilic seña talem ta ch'ulchan.

² Pero halbotic yu'un te Jesús: Te c'alal ya xmahl c'ahc'al, hich yac awalic: Q'uepelix pajel, como chicpulpul te tocal yu'un sjahts' c'ahc'al, xchihex.

³ Soc ta sab hich yac awalic: Ya xtal ha'al yo'tic, como ay ihc'al tocal, xchihex. ¡Jchebal-o'tanex! Yac ana'ic stsahtayel bin yilel te q'uinale, pero ma xana'ic stsahtayel yo'tic te señahiletic te ayique.

⁴ Te jcaj ts'umbalil te chopol soc te ha j'antsiwej ha ya sc'an ya yilic seña, pero mayuc seña ya x'a'bot yilic, ha nax seña ya xc'oht te jalwanej Jonás, xchi sc'oblalic. Tey tec'ajtic hilel a, baht te Jesús.

Te levadura yu'un fariseohetic

⁵ C'alal c'ohtic ta jehch ha' te jnopojeletic, ma ba la sna'ic yich'el talel pan.

⁶ Halbotic yu'un te Jesús: Tsahtaya me abahic yu'un te levadura yu'un te fariseohetic soc te saduceohetique, xchi.

⁷ Hich la yalbe sbahic: Ha hich ya yal yu'un te ma ba la jquich'tic tal pan, xchihic.

⁸ Na'bot yo'tanic yu'un te Jesús, hich halbotic yu'un: Winiquex te mayuc lec sch'uhunel awo'tanic, ¿bin yu'un te hich yac awalbe abahic te mayuc pan awu'unic?

⁹ ¿Ma to bal c'ohem ta awo'tanic, ma bal yac ana'ic te ho'pehch pan we' a te lajunwinic yoxlajunbahc' (5,000) ta tuhl winiquetic soc te jayeb moch sobra la atsobic?

¹⁰ Soc ¿ma bal yac ana'ic te hucpehch pan we' a te lajunbahc' (4,000) ta tuhl winiquetic soc jayeb moch sobra la atsobic?

¹¹ ¿Bin yu'unix a te ma xana'ic te ma ha'uc ta scaj te pan te hich la jcalbeyex te ya me atsahtay abahic yu'un te levadura yu'un te fariseohetic soc te saduceohetique? xchi.

¹² Hich la sna'ic te ma ha'uc halbotic te ya stsahtay sbahic yu'un te levadura yu'un te pan, pero ha te nohptesel yu'un te fariseohetic soc te saduceohetique.

Pedro la yal te ha Cristo te Jesús

¹³ C'alal c'oht Jesús ta sq'uinal Cesarea yu'un Filipo, la sjoc'obe te jnopojeletic yu'une: ¿Bin ya yalic te ants-winiquetic, mach'a a te Nich'anil ay ta scuenta winic? xchi.

¹⁴ La sjaq'uic: Ay ya yalic te ha Juan te J'ac'-ich'-ha', ay yantic ya yalic te ha Elías, ay yantic ya yalic te ha Jeremías o yan jalwanej, xchihic.

¹⁵ Hich halbotic: ¿Te ha'exe, mach'ahon yac awalic a? xchi.

¹⁶ Ha la sjac' te Simón Pedro: Ha'at te Cristohat, te Snich'anat te cuxul Dios, xchi stuquel.

¹⁷ Hich halbot yu'un te Jesús: Bayel awutsil, Simón snich'anat Jonás, como ma ha'uc la ya'bat ana' te mach'a ch'ich'-baq'uet, ha la ya'bat ana' te Jtat te ay ta ch'ulchan.

¹⁸ Soc ho'on ya calbat te ha'at Pedrohat, ta sba ha'i muc'ul ton ini ya jpas te iglesia cu'un, soc te ochibaletic yu'un te tsobojibal mach'atic chamenic ma xhu' stsalbel.

¹⁹ Ha'at ya ca'bat te llavehetic yu'un te cuentahinel yu'un te ch'ulchan: spisil bintic yac achuc ta bahlumilal, ya me yich' chuquel ta ch'ulchan, soc spisil bintic yac atil ta bahlumilal, ya me yich' tihlel ta ch'ulchan, xchi.

²⁰ Soc la yalbe mandar te jnopojeletic yu'un te ma me ayuc mach'a ya yalbeyic ya'iy te ha te Cristohe.

Jesús la yal ya xlaj ta milel

²¹ Ha nix ta yorahil a hahch yalbe ya'iyic te jnopojeletic yu'un te ya me xbaht ta Jerusalén soc te ya xc'ax swocol yu'un te mamaletic soc te principal sacerdotehetic soc te escribanohetic, ya me yich' milel, soc ya xcha'cuxaj ta yoxebal c'ahc'al.

²² Te Pedro la yic' bahel ta stuquel, hahch stsits, hich la yal: ¡Cajwal, Dios ac'a sna'bat yo'bolil aba! ¡Ma hichuc ya xc'oht ta acuenta! la yut.

²³ Pero la sut sba te Jesús, hich la yalbe te Pedro: ¡Loc'an ta jtojol, Satanás! Ha'at c'ohchinojibalat cu'un, como ma ha'uc ya xbaht ta awo'tan te bintic scuenta Dios, ha nax te bintic scuenta winiquetic, xchi sc'oblal.

²⁴ Ha yu'un te Jesús hich la yalbe te jnopojeletic yu'une: Teme ay mach'a ya sc'an ya st'unon, ac'a sloq'ues sba ta yo'tan, ac'a sq'uech bahel scruz soc ac'a st'unon.

²⁵ Como spisil te mach'a ya sc'uxultay sba, ya me xch'ay scuxlejal; yan te mach'a ya sch'ay scuxlejal ta jcuenta, ha ya sta scuxlejal stuquel.

²⁶ Como ¿bin ya sta a te winic teme yu'untayej spisil te bahlumilal, pero teme ch'ayel ya xbaht te sch'uhlele? ¿Bin ya yac' a te winic yu'un te sch'uhlele?

²⁷ como te Nich'anil ay ta scuenta winic ya xtal soc yutsilal te Stat, sjoquinej te ch'ul a'batetic yu'un, hich ya yac'ticlambe stojol sc'ab jujutuhl, ha chican bin yilel ya'telic.

²⁸ Jamal ya calbeyex te ay mach'atic li' ayic ta ora ini te ma ba chamenic a te ya me yilic yac ta talel te Nich'anil ay ta scuenta winic ta banti te cuentahinel yu'une, xchi.