San Mateo 10 - Bible in Tzeltal Bachajón

Jesús ya stsa lahchaytuhl jpuc-c'opetic

¹ Te Jesús la yic'ticlan tal te lahchaytuhl (12) jnopojeletic yu'un, la yac'ticlambe ya'tel ta sloq'uesel pucujetic soc ta slahmajtesel spisil chameletic soc spisil te ban c'uxic.

² Hich ay te sbihilic te lahchaytuhl jpuc-c'opetique: Ha primero te Simón, te Pedro yan sbihil, soc Andrés te yihts'ine; Jacobo te snich'an Zebedeo, soc Juan te yihts'ine;

³ Felipe, Bartolomé, Tomás, Mateo te jc'an-patan, Jacobo snich'an Alfeo, Lebeo, te Tadeo yan sbihile,

⁴ Simón te cananeo, soc Judas Iscariote, ha te la yac' ta c'abal te Jesús.

Ticonotic ta behel te lahchaytuhlic

⁵ Te Jesús la sticonlan bahel te lahchaytuhl, hich la snohpteslan bahel: Ma me xbahex ta sq'uinal jyanlumetic soc ma me x'ochex bahel ta slumal samaritanohetic,

⁶ ha nax me ya xbahex ta stojol te ch'ayem tuminchijetic yu'un Israel.

⁷ C'alal yaquex ta bahel a, halahic te sc'op Dios, hich me xawalic: Nopolix ay te cuentahinel yu'un te ch'ulchan, xchihanic me.

⁸ Ya me alecubteslanic jchameletic soc jc'a'el-chameletic, ya me acha'cuxajtesic mach'a chamenic, soc ya me aloq'ueslanic pucujetic. Ta mahtanil la awich'ic, hich ni me ta mahtanil yac awaq'uic.

⁹ Ma me xawich'ic bahel oro, plata o cobre ta schuhquil ach'uhtic;

¹⁰ ma me xawich' achojaq'uic ta behel, o cha'lihc ac'u'ic, yan atepic, o yan anahbate'ic, como te j'a'tele tey nix ya xhu' ya sta swe'el a.

¹¹ Ta bayuc muc'ul pueblo o tut pueblo banti ya x'ochex, joc'oya awa'iyic mach'a lec yo'tan tey a, tey ya xwayex a ha to c'alal ya xloq'uex bahel.

¹² C'alal ya xc'ohex tey ta na, patbeyahic yo'tan.

¹³ Teme lec yo'tan te yajwal na, ya me xc'oht ta stojol te lamal q'uinal awu'unique; yan teme ma ba lec yo'tan, ya me suht tal ta atojolic te lamal q'uinal awu'unique.

¹⁴ Teme ay mach'a ma ba ya yiq'uex ochel soc teme ma ba ya sc'an ya ya'iybeyex te ac'opique, loc'anic bahel ta na o ta pueblo tey a, soc tihtina hilel slumil awoquic.

¹⁵ Jamal ya calbeyex, ta yorahil ich'el ta c'op peq'uel xan castigo ya yich' te Sodoma soc Gomorra te bin ut'il ya yich' ha'i pueblo ini.

Ya xtal uts'inel

¹⁶ Ya jticonex bahel hich te bin ut'il tuminchijetic ta yohlil chojetic. Ha yu'un p'ijanic me hich te bin ut'il chan soc lamaluc me awo'tanic hich te bin ut'il stsuhmut.

¹⁷ Tsahtaya me abahic ta stojol te winiquetic, como ay me ya yaq'uex ta sc'ab mach'atic ay ya'telic ta chahpanwanej, soc ay me ya yaq'uex ta majel ta sinagogahetic yu'unic.

¹⁸ Soc ay ya xtehc'anotex ta stojol gobernadoretic soc ajwaliletic ta jcuenta, scuenta testigo ya xc'ohex cu'un ta stojolic soc ta stojol te jyanlumetique.

¹⁹ Teme ac'otex ta c'abal, ma me xanopilan ta awo'tanic bin ya xc'oht awalic soc bin ut'il yac ajaq'uic te c'ope, como ta yorahil ya x'a'botex te bin yac awalique,

²⁰ como ma ha'uquex te ya xc'opojex, ha ya xc'opoj ta acuentahic te Espíritu yu'un te Atatique.

²¹ Te jtuhle ya yac' ta milel te yermano, te tatil ya yac' ta milel te snich'ane. Te al-nich'anetic ya scontrahinic te sme'static soc ya me yaq'uic ta milel.

²² Ya me yihlayex spisilic ta scaj te jbihile, pero te mach'a jun yo'tan ya xhil c'alal ta slajibal, ya me xcol stuquel.

²³ C'alal ya yuts'inex ta banti jun pueblo, ahnanic bahel ta yan pueblo. Como jamal ya calbeyex te ma to ba lajem abehentaybelic spisil a te pueblohetic yu'un Israel te ya xtal te Nich'anil ay ta scuenta winic.

²⁴ Te jnopojel, ma ha'uc toyol yu'un te maestro yu'une, soc te a'bat ma ha'uc toyol yu'un te yajwale.

²⁵ Tic'uc a te jnopojel te pajal ya xc'oht soc te maestro yu'un, soc te a'bat te pajal ya xc'oht soc te yajwale. Teme a'bot sbihilin Beelzebú te tatile, ¿ha'uc to balix a te mach'atic ay yu'un ta sna?

Mach'a ya sc'an ya yich' xi'el

²⁶ Ha yu'un ma me xaxi'ic; como mayuc bin mucul te ma ba ya yich' chicnajtesel, mayuc bin muquen te ma ba ya xna'ot.

²⁷ Te bin ya calbeyex ta yihc'al q'uinal, jamal xawalic ta sacal q'uinal; soc te bin yac awa'iy ta muquen ta achiquinic, halahic ta ba nahetic.

²⁸ Ma xaxi'ic te mach'atic ya smilbeyex abaq'uetalic, te ma xhu' yu'un ya smilbeyex ach'uhlelic; ha me xaxi'ic te Mach'a ya xhu' ya slajin ta infierno te ach'uhlel soc abaq'uetal.

²⁹ ¿Ma bal ya schonic cha'coht tut mutetic ta asarion? Pero ma ba ya xch'ay cohel ta lum jcohtuc teme ma hichuc ya sc'an yo'tan te Atatique.

³⁰ Ahtaybil spisil te stsotsel ajolique.

³¹ Ha yu'un ma me xiwex; c'ax hich ac'oblalic a te bin ut'il te tut mutetique.

Halbeya yantic te yac ana'be sba te Jesús

³² Mach'ayuc a te ya yal ta stojol ants-winiquetic te ya sna'bon jba, ha nix hichon ya cal ta stojol te Jtat ay ta ch'ulchan te ya jna'be sbahe.

³³ Yan te mach'a ya smucon ta yo'tan ta stojol ants-winiquetic, ha nix hichon ya jmuc ta co'tan ta stojol te Jtat ay ta ch'ulchane.

Ta scaj Jesús ya me spit sbahic

³⁴ Ma me xacuyic te tal cac' lamal q'uinal ta bahlumilal; ma ba tal cac' lamal q'uinal, ha tal hach guerra,

³⁵ como talemon yu'un ya scontrahin sba soc stat te winique, te ach'ix ya scontrahin sba soc snan, soc te alibal ya scontrahin sba soc yalibme'el.

³⁶ Te scontra te winic ha nix te mach'atic ay yu'un ta sna.

³⁷ Te mach'a c'ax hich c'ux ta yo'tan a te sme'stat te bin ut'il te ho'one, ma xtuhun cu'un. Te mach'a c'ax hich c'ux ta yo'tan a te yal-snich'anic te bin ut'il te ho'one, ma xtuhun cu'un.

³⁸ Soc te mach'a ma ba ya yich' bahel scruz soc ya st'unon, ma ba ya xtuhun cu'un.

³⁹ Te mach'a c'ux ya ya'iy te scuxlejal, ya me xch'ay scuxlejal; yan te mach'a ya xch'ay te scuxlejal ta jcuenta, ha me ya sta stuquel.

Mach'atic ya yich' stojol sc'abic

⁴⁰ Te mach'a ya yiq'uex, ho'on me ya yic'on abi; te mach'a ya yic'on, ha me ya yic' te Mach'a la sticonon tale.

⁴¹ Te mach'a ya yic' jtuhl jalwanej ta scuenta bin ut'il jalwanej, ya me yich' mahtanil te ha smahtan jalwanej; soc te mach'a ya yic' te mach'a toj yo'tan ta scuenta bin ut'il toj yo'tan, ya me yich' mahtanil te ha smahtan mach'a toj yo'tane.

⁴² Mach'ayuc a te ya ya'be junuc vaso siquil ha' jtuhluc te peq'uel ay te bin ut'il ha jnopojel, jamal ya calbeyex te ma ba ya xch'ay te smahtane, xchi te Jesús.