San Mateo 1 - Bible in Tzeltal Bachajón

Cajalcaj me'iltatiletic yu'un Jesucristo

¹ Ha shunal te cajalcaj me'iltatiletic yu'un Jesucristo, sts'umbal David, sts'umbal Abraham.

² Te snich'an Abraham, Isaac, te snich'an Isaac, Jacob, te snich'an Jacob, Judá soc te yermanotac,

³ te yal-snich'nab soc te Tamar te Judá, ha Fares soc Zara, te snich'an Fares, Esrom, te snich'an Esrom, Aram,

⁴ te snich'an Aram, Aminadab, te snich'an Aminadab, Naasón, te snich'an Naasón, Salmón,

⁵ te yal-snich'an soc Rahab te Salmón, ha Booz, te yal-snich'an soc Rut te Booz, ha Obed, te snich'an Obed, Isaí,

⁶ te snich'an Isaí, ha te ajwalil David. Te snich'an te ajwalil David, Salomón te ha yal te yihnam Urías,

⁷ te snich'an Salomón, Roboam, te snich'an Roboam, Abías, te snich'an Abías, Asa,

⁸ te snich'an Asa, Josafat, te snich'an Josafat, Joram, te snich'an Joram, Uzías,

⁹ te snich'an Uzías, Jotam, te snich'an Jotam, Acaz, te snich'an Acaz, Ezequías,

¹⁰ te snich'an Ezequías, Manasés, te snich'an Manasés, Amón, te snich'an Amón, Josías,

¹¹ te snich'an Josías, Jeconías soc te yermanotac. Ha yorahil a te ic'otic bahel ta chuquel ta Babilonia.

¹² Ta patil te ic'otic bahel ta Babilonia, te snich'an Jeconías, ha te Salatiel, te snich'an Salatiel, Zorobabel,

¹³ te snich'an Zorobabel, Abiud, te snich'an Abiud, Eliaquim, te snich'an Eliaquim, Azor,

¹⁴ te snich'an Azor, Sadoc, te snich'an Sadoc, Aquim, te snich'an Aquim, Eliud,

¹⁵ te snich'an Eliud, Eleazar, te snich'an Eleazar, Matán, te snich'an Matán, Jacob,

¹⁶ te snich'an Jacob, José, ha te smamalal María te la yayintes Jesús, ha te Cristo te sbihile.

¹⁷ Te jaycaj ts'umbalil ta spisil c'alal Abraham ha to ta David, ay chanlajuncaj (14); c'alal David ha to te bin ora ic'otic bahel ta chuquel ta Babilonia, ay chanlajuncaj (14); c'alal ic'otic bahel ta chuquel ta Babilonia ha to c'alal ayin Cristo, ay chanlajuncaj (14).

Ayin Jesucristo

¹⁸ Te bin ut'il ayin te Jesucristo, hich ay: C'alal macbil yu'un José te María te snan te Jesús, c'alal ma to ba yic'oj a, chicnaj te hahchemix yal ta scuenta te Ch'ul Espíritu.

¹⁹ Te bin ut'il toj yo'tan te José te smamalal, ma ba la sc'an la yac' ta q'uexlal te smacbil antse, ha yu'un la snop te muquen ya yihquitay.

²⁰ Te c'alal hich yac sna'bel a, chicnaj ch'ul a'bat yu'un Cajwaltic ta swayich, hich halbot yu'un: José, sts'umbalat David, ma me xaxi' te yac awic' awihnamin te María, como te bin ut'il ayix yal, ha ta scuenta te Ch'ul Espíritu.

²¹ Ya x'ayin yal, soc ya me awa'be sbihilin JESÚS, como ha ya scoltay yu'un smulic te pueblo yu'un, xchi sc'oblal.

²² Ta spisil ini hich c'oht ta pasel scuenta yu'un hich ya xc'oht a te bin yaloj te Cajwaltic ta scuenta te jalwanej, te hich la yal:

²³ Ay jtuhl ach'ix te ya xhahch yal soc ya x'ayin squerem-al, Emanuel sbihil ya xc'oht, te xchihe. (Dios sjoquinejotic, xchi te c'asesbile.)

²⁴ Te José, c'alal cux yo'tan yu'un te swayich, hich la spas te bin ut'il halbot yu'un te ch'ul a'bat yu'un te Cajwaltic, la yic' yihnamin te María.

²⁵ Pero ma ba la sta sba soc ha to c'alal ayin te sba-ale, soc la ya'be sbihilin JESÚS.