San Marcos 4 - Bible in Tzeltal Bachajón

Sloc'ombahil c'op yu'un jts'umbajel

¹ Yan buelta hahch ta p'ijubteswanej ta ti'mar te Jesús. Tsobol mach'atic la stsob tal sbahic ta stojol, ha yu'un och ta barco, la shuhcan sba tey a; yan te ants-winiquetic hilic ta ti'ha'.

² Ay bayel bin la ya'be snopic ta scuenta sloc'ombahil c'op. Hich la yal ta p'ijubteswanej:

³ A'iya me awa'iyic: Ay jtuhl jts'umbajel loc' ta slihlinel sts'unub;

⁴ te c'alal yac ta slihlinel, ay c'oht ta ti'be, tal ta biq'uel yu'un mutetic.

⁵ Ay c'oht ta ba tontiquil te ma ba pim slumil, ora ch'ihy como ma ba c'ubul te slumile;

⁶ pero te c'alal loc' tal te c'ahc'al, ora chic'ot yu'un ta scaj te ma ba c'uhben slohp', hich taquij.

⁷ Ay c'oht ta yohlil ch'ixileltic, pero tohy mohel te ch'ixetic, tenot yu'un, hich ma ba sitin.

⁸ Pero ay c'oht ta lequil lum, la yac' sit, ay la yac' lajuneb scha'winic (30), ay la yac' oxwinic (60), ay la yac' ho'winic (100) buelta sit, xchi te Jesús.

⁹ Soc la yalbe xan ya'iyic: Te mach'a ay schiquin, ac'a me ya'iy, xchi.

Te bin scuentahil te sloc'ombahil c'opetic

¹⁰ C'alal stuquel ay a te Jesús, te mach'atic nopol ayic soc nix te lahchaytuhl la sjoc'obeyic bin ut'il ay te sloc'ombahil c'op.

¹¹ Hich halbotic yu'un te Jesús: Te ha'ex a'bibilex ana'ic te bin muquen ay yu'un te cuentahinel yu'un Dios; yan te mach'atic ayic ta fuera ha nax ta sloc'ombahil c'op ya xhalbot ya'iyic stuquelic,

¹² scuenta yu'un ya yilic, pero ma xc'oht ta yo'tanic, soc ya ya'iyic, pero ma sna'beyic scuentahil; scuenta yu'un ma ba ya suhtes yo'tanic te hich ya xpasbot perdón yu'un smulic, xchi.

¹³ Soc halbotic yu'un te Jesús: ¿Yu'un bal ma xana'beyic scuentahil te sloc'ombahil c'ope? ¿Bin ut'il c'an ana'iquix scuentahil a hiche spisil te sloc'ombahil c'ope?

¹⁴ Te jts'umbajel ha te mach'a ya sts'un te c'ope.

¹⁵ Te ts'unubil te c'oht ta ti'be ha te mach'atic la yich'ic ts'unel ta yo'tanic te c'ope, pero c'alal ya ya'iyic, ora ya xtal te Satanás, ya sloq'uesbe ta yo'tanic te c'op ts'umbil tey a.

¹⁶ Soc te ts'unubil te c'oht ta ba tontiquil, ha te mach'atic ya ya'iyic te c'op soc tse'el yo'tanic yu'un ta ora;

¹⁷ pero bahal nax ay slohp', ma ba ya xhalajic; c'alal ya xtal wocol o uts'inel yu'un te c'ope, ora ya xyahlic.

¹⁸ Te ts'unubil te c'oht ta yohl ch'ixileltic, ha te mach'atic ya ya'iyic te c'ope;

¹⁹ pero te sna'el bintic ay ta bahlumilal, te lo'loyel yu'un te c'uhlejalil soc te bic'sitayel biluquetic, ha ya stenic te c'ope, hich ma ba ya yac' sitinuc.

²⁰ Yan te ts'unubil te c'oht ta lequil lum, ha te mach'atic ya ya'iyic te c'op soc ya xc'oht ta yo'tanic, ya sitin ta lajuneb scha'winic (30), ta oxwinic (60), ta ho'winic (100) ta p'ij, xchi te Jesuse.

Spisil ya yich' chicnajtesel

²¹ Soc hich la yalbeyic: ¿Ya bal yich' ich'el tal c'ahc' yu'un ya yich' nujel ta moch o ta ye'tal wayibal? ¿Ma bal yacuc yich' aq'uel ta scajtajib?

²² Mayuc bin muquen te ma ba ya yich' chicnajtesel, mayuc bin nac'bil te ma ba ya xloc' ta sacal q'uinal.

²³ Te mach'a ay schiquin, ac'a me ya'iy, xchi.

²⁴ Soc la yalbeyic: Tsahtaya me abahic yu'un te bin yac awa'iyic, como te bin yilel yac ap'is, ha nix hich yac awich' p'isbeyel, soc c'ax hich ya x'a'botat a,

²⁵ como te mach'a ay bin ay yu'un, ya x'a'bot xan yan, pero te mach'a mayuc bin ay yu'un, ya me yich' pojbeyel te bin ay to nix yu'une, xchi.

Sloc'ombahil c'op bin ut'il ya xcol ts'unubil

²⁶ Soc la yal xan: Te cuentahinel yu'un Dios, hich c'ohem te bin ut'il ay mach'a ya slihlin sts'unub ta lum.

²⁷ Ya xway, ya xhahch, c'ahc'al ahc'abal ya xch'ihy soc ya xcol, ma sna' bin ut'il hich ya spas,

²⁸ como stuquel ya yac' sitinuc te q'uinal: nahil te ya'binal, patil te snich, patil ya xnoj ta sit.

²⁹ C'alal yijubix a te site, ya yich' bojel ta hoz, yu'un la stahix yorahil ta tsobel, xchi.

Sc'oblal te sbac' mostaza

³⁰ Hich la yal xan te Jesús: ¿Bin ya jpajtic a te cuentahinel yu'un Dios? ¿Bin sloc'ombahil c'op ya jpajtic a?

³¹ Hich c'ohem te bin ut'il sbac' mostaza, te c'alal ya yich' ts'unel ha tut yu'un spisil yantic ts'unubiletic,

³² pero te c'alal ts'umbilix, ya xcol tal, c'ax hich smuc'ul ya xc'oht a te bin ut'il spisil te ts'unubiletic ta yawil ts'unubil, ya yac' smuc'ul c'ab, hich ya xtal ta nahinel ta yaxinal te ha'mal mutetique, xchi te Jesuse.

Jesús la stuhun bayel sloc'ombahil c'op

³³ Ta scuenta bayel sloc'ombahil c'op hich bin ut'il ini la yalbe te sc'op Dios ta ban c'alal hu' yu'unic sna'el.

³⁴ Ma ba la sc'opon teme ma ha'uc ta sloc'ombahil c'op; pero te c'alal stuquel ay soc a te jnopojeletic yu'une, spisil la yalbe bin scuentahil.

Jesús la scom ic' soc mar

³⁵ Ha nix ta stibiltayel q'uinal a, halbotic yu'un Jesús te jnopojeletic: Sohlucotic bahel ta jehch mar, xchi.

³⁶ C'alal la sc'oponic hilel te bayel ants-winiquetic, la yiq'uic bahel ta barco te Jesús. Soc ay yan barcohetic te la sjoquinic bahel.

³⁷ Pero hahch tulan ic' te la sten ochel ta barco te tulan sts'elajan mar, hich hahch ta mulel ta ha'.

³⁸ Te Jesús ay ta yit barco, wayal ta sts'amjol. La stijic soc hich la yalbeyic: Maestro, ¿ma bal ayuc sc'oblal yac awa'iy te ya xlajotic? la yutic.

³⁹ Hich hahch te Jesús, la scom te ic' soc la yalbe te mar: Ch'aban, lahmajan, la yut. Ch'ab te iq'ue, buen lamal q'uinal c'oht.

⁴⁰ Hich la yalbe te jnopojeletic yu'un: ¿Bin yu'un te yaquex ta xiwel? ¿Bin ut'il ay a te mayuc sch'uhunel awo'tanic? xchi sc'oblalic.

⁴¹ Ha yu'un bayel xiwic, talel c'axel hich la sjoc'obe sbahic: ¿Mach'a a ini, te ha ch'uhumbil smandar yu'un te ic' soc te mar? xchihic yu'un.