San Marcos 15 - Bible in Tzeltal Bachajón

Jesús ta stojol Pilato

¹ Te principal sacerdotehetic, te mamaletic, escribanohetic soc spisil mach'atic ay ya'telic schapoj sc'opic ta buen sab, hich chucul a la yiq'uic bahel te Jesús, la ya'beyic ta sc'ab te Pilato.

² Te Pilato la sjoc'obe: ¿Ha'at bal Ajwalilat yu'un te judíohetique? xchi. Hich te bin ut'il yac awale, xchi te Jesús.

³ Te principal sacerdotehetic bayel la slehbeyic smul te Jesús.

⁴ Te Pilato la scha'joc'obe xan: ¿Yu'un bal mayuc bin yac awal yu'un? Ilawil te bayel yac slehbelat amul, la yut.

⁵ Pero mayuc bin la sjac' te Jesús. Xcham yo'tan yu'un te Pilato.

Jesús ac'ot ta milel

⁶ Ta yorahil te Q'uin c'ahyem te Pilato te ya scoltay bahel jtuhl jchuquel, ha chican mach'a ya xc'ambot.

⁷ Ay jtuhl winic, Barrabás sbihil, ochem ta chuquel soc smohloltac yu'un hach-c'op te la ya'iyic milaw ta scontrahinel te ajwalil.

⁸ Talic tsobol ants-winiquetic, hahch sc'ambeyic Pilato te yacuc xpasbotic te bin c'ahyem ta spasele.

⁹ Hich joc'obotic yu'un te Pilato: ¿Ya bal ac'anic te ya jcoltaybeyex bahel te Ajwalil yu'un te judíohetique? xchi.

¹⁰ Como sna'oj te ta scaj sti'ti'o'tantaybelic te a'bot ta sc'ab yu'un te principal sacerdotehetique.

¹¹ Pero te principal sacerdotehetic la sujic te ants-winiquetic te ha'uc ya xcoltaybotic te Barrabás.

¹² Cha'joc'obotic xan yu'un te Pilato: ¿Bin yac ac'anic te ya jpasbe te mach'a Ajwalil yu'un te judíohetic te yac awalique? xchi.

¹³ ¡Mila ta cruz! xchihic ta aw.

¹⁴ ¿Bin chopol spasoj? xchi te Pilato. Pero c'ax tohy xan yawtaybelic: ¡Mila ta cruz! xchihic ta aw.

¹⁵ Te Pilato la sc'an te lecuc yo'tanic te pueblo, ha yu'un la scoltay bahel te Barrabás, soc te c'alal yich'ojix majel a te Jesús, la yac' ta milel ta cruz.

¹⁶ Hich te soldadohetic la yiq'uic ochel ta amac' yu'un te sna ajwalil, ha te Pretorio, soc la stsobic tal schahpal te soldadohetique.

¹⁷ La ya'beyic slap chi'in-yaxal muc'ul-c'u'ul soc la ya'beyic scoronahin jalbil ch'ix,

¹⁸ hich hahch yawtayic: ¡Viva, Ajwalil yu'un te judíohetic! xchihic ta slabanel.

¹⁹ La smajbeyic jalal ta sjol, la stuhbatayic soc la squejan sbahic ta stojol ta tsahtsa-ich'el ta muc'.

²⁰ C'alal laj yo'tanic ta slabanel, la sloq'uesbeyic te chi'in-yaxal muc'ul-c'u'ul, la ya'beyic slap te sc'u' nixe, la yiq'uic bahel smilic ta cruz.

Laj ta cruz Jesús

²¹ Yac ta c'axel jtuhl winic, Simón te talem ta Cirene, ha stat te Alejandro soc Rufo, yac ta ochel tal ta yan lugar, ha la sujic ta yich'el bahel te cruz.

²² La yiq'uic bahel te Jesús ta jun lugar, Gólgota sbihil, (ha Yawil Baqueljolal, xchi te c'asesbile).

²³ La ya'beyic yuch' vino capal soc mirra, pero ma ba la yuch'.

²⁴ C'alal laj sjihpambelic ta cruz la spuc sbahic a te sc'u' spac', la spasic seña ta na'el bin ya yich' ta jujutuhl.

²⁵ Yoxebalix ora sacubel q'uinal a te la sjihpanic ta cruz.

²⁶ Hich ay te ts'ihbabil te bin smulinej: AJWALIL YU'UN TE JUDÍOHETIC, xchi.

²⁷ Ha nix hich la sjihpanic ta cruz soc cheb j'eleq'uetic, jtuhl ta swa'el, jtuhl ta sq'uexam.

²⁸ Hich c'oht ta pasel te bin ts'ihbabil ta Shun Dios te hich ya yal: La yich' ahtayel soc jmulawiletic, te xchihe.

²⁹ Te mach'atic yacalic ta c'axel tey a la yalbeyic chopol sc'oblal, la sjimulan sjolic, hich la yalic: ¡Ha'at te yac ajin te Templo yu'un Dios soc ta oxeb c'ahc'al yac acha'pas xan ta ac'op,

³⁰ coltaya aba, cohan tal ta cruz! la yutic.

³¹ Hich nix la ya'iyic labanwanej te principal sacerdotehetic, talel c'axel hich la yalbe sbahic soc te escribanohetic: La scoltaylan yantic, laj'a ma xhu' scoltaybel sba stuquel.

³² ¡Te Cristo! ¡Te Ajwalil yu'un Israel! Ac'a cohuc tal ta ora ta cruz quiltic yu'un ya jch'uhuntic, xchihic. Ha nix hich te mach'atic pajal jipilic ta cruz soc, la yalbeyic chopol sc'oblal.

³³ C'alal la sta ohlil c'ahc'al, ihc'ub spisil te q'uinal ha to ta oxeb ora stibiltayel q'uinal.

³⁴ Ta oxeb ora stibiltayel q'uinal tulan awon te Jesús: ¡Eloi, Eloi! ¿lama sabactani? xchi. Dios cu'un, Dios cu'un, ¿bin yu'un te la apihteson? xchi te c'asesbile.

³⁵ Te mach'atic tec'ajtic tey a, c'alal la ya'iyic, hich la yalic: A'iya awa'iyic, ha yac yic'bel te Elías, xchihic.

³⁶ Ay jtuhl te ahnimal baht smul ta vinagre jun esponja, la scahts'an ta ni'jalal, la ya'be sts'u'ts'uy te Jesús, hich la yal: Ihquitayahic, ya quiltic teme ya xtal ta cohtesel yu'un te Elías, xchi.

³⁷ Tulan awon te Jesús, hich quehchaj yich'bel ic'.

³⁸ Jats ta ohlil te pac' tsalbil a te Templo, hahch ta jatsel ta sba, loc' ta yoc.

³⁹ Te capitán-soldado te teq'uel ta stojol, c'alal la ya'iy te tulan awon soc te quehchaj yich'bel ic', hich la yal: ¡Melel nix a te ha Snich'an Dios ha'i winic ini! xchi.

⁴⁰ Soc ay antsetic yac yilbelic ta namal, ha te María Magdalena, te María snan José soc Jacobo te ihts'inal, soc te Salomé.

⁴¹ Ha'ic te la st'unic bahel te Jesús soc ayic ta a'batinel yu'un c'alal ay ta Galilea a. Soc ay tsobol yantic antsetic te pajal mohemic tal ta Jerusalén soc.

Jesús la yich' otsesel ta muquenal

⁴² Tibilix q'uinal a, como ha yorahil te ya schahpan sbahic yu'un te sc'ahc'alel cux-o'tan,

⁴³ te José talem ta Arimatea, te mach'a ich'bil ta muc' ta yohlil te jtsohb chahpanwanejetic, te ha yac smahliybel te ya xtal te cuentahinel yu'un Dios, toj ochel ta stojol Pilato, la sc'ambe te sbaq'uetal te Jesús.

⁴⁴ Te Pilato xcham yo'tan yu'un c'alal la ya'iy te lajix te Jesuse. La sticon ta iq'uel te capitán-soldado, la sjoc'obe teme melel te chamix te Jesús.

⁴⁵ C'alal hich halbot yu'un te capitán-soldado, la ya'be te sbaq'uetal Jesús te José.

⁴⁶ Ha la sman sábana-pac', la scohtesbe te sbaq'uetal Jesús, la spots ta pac', la yotses ta muquenal ta hotbil ton, soc la sbalch'un tal muc'ul ton, la smacbe sti'il a te muquenale.

⁴⁷ Te María Magdalena soc te María te snan José la yilic banti a'bot hilel te sbaq'uetal Jesús.