Malaquías 4 - Bible in Tzeltal Bachajón

Te sc'ahc'alel Jehová

¹ Ya me xtal te sc'ahc'alel, yac ta tihlel hich te bin ut'il horno, spisil te jtoybahetic soc te mach'atic chopol bin ya spasic, ha ac ya xc'ohtic. Te c'ahc'alil te ya xtal ya me schic'ticlan, xchi te Jehová te scuentahinej spisil, ma ba ya xhil yu'un te slohp' o te sc'abe.

² Yan te ha'ex te awich'ojic ta muc' te jbihile, ya me xtihl ta atojolic te bin stojil ta pasel hich te bin ut'il sts'anabul te c'ahc'ale, soc ya yich' talel ta xic' te colele. Ya me xloq'uex bahel soc ya me xwihlawetex hich te bin ut'il tut wacaxetic te ya xloq'uic bahel ta snahic.

³ Ta sc'ahc'alel te ay bin ya jpas, yac ats'o'ic ta teq'uel te mach'atic chopolic, hich ya xc'ohtic te bin ut'il stanul c'ahc' ta ye'tal awoquic, xchi te Jehová te scuentahinej spisil.

⁴ Na'ahic me te ley yu'un te ca'bat Moisés, te la jca'be ta Horeb, ha te halbil mandariletic soc te leyetic yu'un spisil Israel.

⁵ Ilawil, ya jticombeyex te jalwanej Elías te c'alal ma to xc'oht a te sc'ahc'alel yu'un Jehová, te ha muc' soc xiweltic sba.

⁶ Ha ya yac' suhtuc yo'tanic te tatiletic ta stojol te snich'nabic, soc te yo'tanic te yal-snich'nabic ta stojol te tatiletique, teme ma'uque, ya xtalon soc ya ca'be castigo te q'uinale, xchi te Jehová.