Malaquías 3 - Bible in Tzeltal Bachajón

¹ Ilawil, ya jticon talel te jal-c'op cu'un te ya schahpambon te be cu'une. Ora nax ya xtal ta Templo te Ajwalil yac alehbelique; te jal-c'op yu'un te chapbil-c'op, ha te mach'a mulambil awu'unic, yaquix ta talel, xchi te Jehová te scuentahinej spisil.

² Pero ¿mach'a ya xcuhch yu'un te bin c'ahc'alil ya xtale? ¿Mach'a ya xhu' yu'un te teq'uel ya xhil te c'alal ya xchicnaj tale? Como hich ay te bin ut'il c'ahc' yu'un yuhltesel taq'uin, hich ay te bin ut'il xapon yu'un mach'a ya sac' pac'.

³ Ya shuhcan sba yu'un ya yuhltes soc ya slecubtes te plata, ha ya slecubtes te sts'umbal Leví hich te bin ut'il oro soc plata, hich stojil ya ya'beyic smahtan te Jehová.

⁴ Hich lec yo'tan Jehová yu'un te mahtanil yu'un Judá soc yu'un Jerusalén, hich te bin ut'il ta nahil to, hich te bin ut'il ta namey.

⁵ Ya xtalon ta atojolic scuenta chahpanwanej; ora nax ya jcontrahin ta testigo-c'op te j'ac'-chameletic, te j'antsiwejetic, te mach'atic ya yalic ta jamal ta lot, te mach'atic ma ts'acaluc ya ya'be stojol ya'tel, te ya ya'beyic swocol te me'ba' antsetic soc te me'ba' alaletic, te mach'atic ma stojiluc bin ya spasbe te jyanlumetic, soc te mach'atic ma ba ya xi'onic, xchi te Jehová te scuentahinej spisil.

Yaq'uel te jun ta slajunebal

⁶ Ho'on, Jehovahon, ma ba ya xyanij co'tan; ha yu'un te ma ba lajemex, ha'ex sts'umbalex Jacob.

⁷ C'alal ta yorahil ame'atatic la awihquitayic hilel te leyetic cu'un, ma ba la acanantayic. ¡Suhtanic tal ta jtojol, hich ya suhton tal ta atojolic! xchi te Jehová te scuentahinej spisil. Pero yac awalic: ¿Bin ut'il ya suhtotic? xchihex.

⁸ ¿Ay bal mach'a ya yelc'ambe te Diose? Pero ha'ex la awelc'ambonic. Pero yac awalic: ¿Bin la jquelc'ambatcotic? xchihex. Ha ta jun ta slajunebal soc ta mahtaniletic awu'unic.

⁹ Mero ma lecuc ac'oblalic, como ha'ex, ta spisil te nación, la awelc'anonic.

¹⁰ Ich'ahic tal spisil te jun ta slajunebal ta yawil, hich me ay we'elil ta jna. Tsajawon awilic a, xchi te Jehová te scuentahinej spisil, ilawil teme ma ba ya jambeyex te ventanahetic ta ch'ulchan soc ya jmal cohel ta atojolic c'ax bayel bendicionetic.

¹¹ Soc ya jcombeyex te jlajinwanej, ma ba ya slajimbeyex te sit awawal ats'unubic, soc te ts'usubil awu'unic ma yu'unuc ma ba ya sitin.

¹² Spisil te nacionetic ya me yalbeyex lec ac'oblalic, como mulambil ya xc'oht te alumalique, xchi te Jehová te scuentahinej spisil.

Te mach'a toj yo'tan soc mach'a chopol yo'tan

¹³ Mero tulan te c'opetic awu'unic ta jtojol, xchi te Jehová. Pero yac ajoc'oyic: ¿Bin a te calojcotic ta acontra? xchihex.

¹⁴ Ha te hich awalojic: Tojol te ya cac' jbahtic ta a'batinel ta stojol Dios. ¿Bin ya jtahtic a te ya jcanantaybetic te Ley yu'un soc te ya xbehenotic soc mel-o'tan ta stojol te Jehová te scuentahinej spisil?

¹⁵ Quilojtic te tse'el yo'tanic te jtoybahetic, soc te ma ha'uc nax lec ya xc'ohtic te mach'atic chopol ya'telic, ha ya yilbeyic yo'tan Dios, pero mayuc bin ya xpasbotic yu'un, xchihex.

¹⁶ Ha yu'un te mach'atic yich'ojic ta muc' te Jehová talel c'axel la yalbe sbahic; te Jehová la ya'iy ta lec bin la yalic. Ha yu'un ta stojol Jehová la yich' ts'ihbayel libro yu'un sna'ojibal yu'un te mach'atic xi'ojic te Jehová soc te ya yich'ic ta muc' te sbihile.

¹⁷ Te bin ora ay bin ya xhahchon ta pasel ha c'ulejalil cu'un ya xc'ohtic te bayel sc'oblal ta co'tan, xchi te Jehová te scuentahinej spisil. Hich ya jc'uxultay te bin ut'il te tatil ya sc'uxultay te snich'an te ya yac' sba ta a'batinel yu'une.

¹⁸ Ha yu'un ya me ana'ic yan buelta te yan yilel te mach'a lec yo'tan soc te mach'a chopol yo'tan, te mach'a ya yac' sba ta a'batinel yu'un Dios soc te mach'a ma ba ya yac' sba ta a'batinel yu'une.