Malaquías 2 - Bible in Tzeltal Bachajón

Tijel ta c'op yu'un ma junuc yo'tan Israel

¹ Yo'tic, sacerdotehetic, ha awu'unic te mandaril ini.

² Teme ma ba yac awa'iyic soc teme ma ba yac anop ta awo'tanic te yac awalbe yutsil sc'oblal te jbihil, xchi te Jehová te scuentahinej spisil, ya jticombeyex chopol c'oblalil ta atojolic, ya calbe ma lecuc sc'oblalic te bendicionetic awu'unique; calbeyejix te ma lecuc sc'oblalic como ma ba anopojic ta lec ta awo'tanic.

³ Ya jtij ta c'op ats'umbal, ya jch'ojbeyex tsa' ta asit awelawic, ha te stsa' chambahlametic te yac awaq'uic scuenta milbil mahtaniletic, soc pajal ya xch'ojotex loq'uel soc.

⁴ Hich yac ana'ic a te la jticombeyex te mandaril ini, scuenta yu'un stalel ya x'ayin te chapbil-c'op cu'un soc Leví, xchi te Jehová te scuentahinej spisil.

⁵ Te chapbil-c'op cu'un soc Leví ha cuxlejal soc lamal q'uinal. La jca'be yu'un ya xi'on a, la xi'on soc peq'uel la yac' sba ta stojol te jbihile.

⁶ Ay ta ye te smelelil ley, mayuc bin chopol tahbot ta ye. Behen ta jtojol ta scuenta lamal q'uinal soc ta scuenta bin toj ta pasel, ay tsobol mach'atic la ya'be yihquitayic hilel te bin chopole.

⁷ Como te ye te sacerdotehetic ya sc'an ya scanantay te p'ijil-o'tanil, soc tey ya sle a te Ley te pueblohe; como te sacerdote ha jal-c'op yu'un Jehová te scuentahinej spisil.

⁸ Yan te ha'exe, la awihquitayic hilel te be, la awaq'uic sc'ohchin sbahic tsobolic ta banti te Ley, la ajinic te chapbil-c'op te la yich' chahpanel soc Leví, xchi te Jehová te scuentahinej spisil.

⁹ Ha yu'un te la jcac' te p'ajbil soc peq'uel c'ohemex ta stojol spisil ants-winiquetic, como ma ba la acanantaybon te behetic cu'un, soc ma pajaluc yac achahpanic ta scuenta te Ley.

Judá ma junuc yo'tan ta stojol Dios

¹⁰ ¿Yu'un bal ma junuc nax Jtatic ta jpisiltic? ¿Ma bal junuc nax te Dios te la spasotique? ¿Bin yu'un nix a hiche te talel c'axel ya jlo'loy jbahtic, te hich ya jbohlobtesbe sc'oblal te chapbil-c'op la spas Dios soc te jme'jtatique?

¹¹ Judá ma junuc yo'tan ta stojol Dios, la spas te bin ilobtic sba ta Israel soc ta Jerusalén, como te Judá la sbohlobtesbe sc'oblal te ch'ul awilal yu'un Jehová te c'ux ta yo'tan, te bin ut'il nuhpun soc yantsil-nich'an jun dios yu'un jyanlumetic.

¹² Te Jehová ac'a sloq'ues ta snahilpac' Jacob te winic te hich ya spas, te mach'a yiloj o te mach'a ya sjac', aunque ya yich'be tal smahtan Jehová te scuentahinej spisil.

¹³ Pero ay to yantic te bintic yac apasic: yac awahts'es ta ya'lel asitic te scajtajib ta chiq'uel mahtanil yu'un Jehová, ya x'oq'uex soc ya x'ahcanajex, yu'un ma ba ya quilix te mahtanil, ma ba tse'el co'tan ya jtsacbeyex ta ac'abic.

¹⁴ Pero hich yac ajoc'oyic: ¿Bin yu'un? xchihex. Como te Jehová ha testigo ta atojol soc ta stojol te ants nuhpunat soc te c'alal queremat to a, te ma ba junix awo'tan ta stojol, aunque ha amohlol soc ha achapoj ac'op soque.

¹⁵ ¿Ma bal junuc nax pasbil yu'un Dios, te ha sbaq'uetal soc sch'uhlel? ¿Soc bin ya sle? Ha ya sle ts'umbalil te jun yo'tanic ta stojol Dios. Canantaya awo'tanic, ma me xch'ay te jun awo'tan ta stojol awihnam te la ata c'alal queremat to ahe.

¹⁶ Como ya jp'aj te ya yihquitay sbahic, xchi te Jehová te Dios yu'un Israel, soc te ya sbohlobtes sba ta spasel bin chopol, xchi te Jehová te scuentahin spisil. Ha yu'un canantaya awo'tanic, ma me xch'ay te jun awo'tan ta stojol.

Ya xnohpoj tal sc'ahc'alel ich'el ta c'op

¹⁷ La awaq'uic luhbuc te Jehová ta scaj te c'opetic awu'unique. Hich yac ajoc'oyic: ¿Bin la jluhbtesatcotic a? xchihex. Yu'un hich yac awalic: Mach'ayuc a te ya spas bin chopol, lec ta stojol Jehová, lec yo'tan ta stojol, xchihex, o te hich yac awalic: ¿Banti ay te Dios te toj ya xchahpanwan? xchihex.