San Lucas 4 - Bible in Tzeltal Bachajón

C'oht ta tsajel Jesús

¹ Te Jesús, nojel ta yo'tan te Ch'ul Espíritu, loc' bahel ta Jordán, ic'ot bahel yu'un te Espíritu ta jochol taquin q'uinal

² cha'winic c'ahc'al, soc c'oht ta tsajel yu'un te pucuje. Ma ba we' te jayeb c'ahc'al tey ay a, patil wi'naj.

³ Hich halbot yu'un te pucuje: Teme ha'at Snich'anat Dios, c'atp'una ta pan ha'i ton ini, xchi.

⁴ La sjac' te Jesús: Ts'ihbabil ta Shun Dios: Ma ha'uc nax ya xcuxaj ants-winiquetic yu'un te pan, ha ya xcuxaj yu'un spisil sc'op te Diose, la yut.

⁵ Patil ic'ot bahel yu'un te pucuj ta toyol wits, ta jts'ihn nax la ya'be yil spisil ta chahp nacionetic ta bahlumilal.

⁶ Hich la yal te pucuje: Ha'at ya ca'bat spisil te yipic ta cuentahinwanej soc te yutsilalique, como ho'on a'bibilon ta jcuenta, soc chican mach'a ya ca'be ta scuenta.

⁷ Awu'un me ya xc'oht spisil teme yac ach'uhuntayone, xchi.

⁸ La sjac' te Jesús: Loc'an ta jtojol, Satanás, como hich ts'ihbabil: Ch'uhuntaya te Cajwaltic te Dios awu'un, soc ha nax me xawac' aba ta a'batinel yu'un stuquel, la yut.

⁹ Ta patil ic'ot bahel yu'un te pucuj ta Jerusalén, c'oht ta tehc'anel ta jol Templo, hich halbot yu'un: Teme ha'at Snich'anat Dios, ch'oja cohel aba li'i,

¹⁰ como hich ts'ihbabil: Ya me spas ta mandar te ch'ul a'batetic yu'un te ya scanantayat;

¹¹ ya me slat'at ta sc'abic scuenta yu'un ma ba yac alajin awoc ta ton, xchi te pucuje.

¹² La sjac' te Jesús: Hich halbil: Ma me xatsaj te Cajwaltic Dios awu'un, xchi.

¹³ C'alal laj yo'tan ta tsajaw te pucuj, la to yihquitay hilel.

Jesús hahch ta yalel sc'op Dios

¹⁴ Ta scuenta yu'el te Espíritu suht bahel ta Galilea te Jesús; puhc ta halel yutsil sc'oblal ta sjoyobal te q'uinale.

¹⁵ La ya'iy p'ijubteswanej ta sinagogahetic yu'unic, spisilic buen lec sc'oblal yu'unic.

Jesús ta Nazaret

¹⁶ Tal ta Nazaret te banti muc'ub hahchel. Ta yorahil cux-o'tan och ta sinagoga, hich te bin ut'il c'ahyem ta spasel, soc la stehc'an sba ta yilel hun.

¹⁷ A'bot te hun yu'un te jalwanej Isaías; la sjam te hun, la sta te banti hich ts'ihbabil:

¹⁸ Ha scuentahinejon te Espíritu yu'un te Cajwaltic, como tsahbilon yu'un yalel te lec yach'il c'op ta stojol te pobrehetique. Sticonejon tal ta scoltayel te mach'atic pich'il yo'tanic, ta yalel te libre ayic te mach'atic chuculic, soc ta sjambeyel sit ts'o'sitetic, sticonejon ta yaq'uel ta libre te mach'atic tembilic ta mosohinel,

¹⁹ soc ta yalbeyel sc'oblal te ha'bil yu'un c'uxultayel yu'un te Cajwaltique, xchi.

²⁰ La sbal te hune, la ya'be te mach'a ay ya'tel, soc la shuhcan sba. Spisil mach'atic ayic ta sinagoga t'ojol sitic ta yilel te Jesús.

²¹ Hich hahch yalbe ya'iyic: Yo'tic c'ohtix ta pasel ta atojolic te bin ts'ihbabil ta Shun Dios, xchi.

²² Spisilic la yalbeyic lec sc'oblal soc xcham yo'tanic yu'un te yutsil sc'op te la yale. Hich la yalic: ¿Ma bal ha'uc te snich'an José? xchihic.

²³ Hich halbotic yu'un te Jesús: Ay yac awalbonic te hich ay ta halel: Jpoxtaywanej, poxtaya aba. Te bintic la apas ta Capernaum ya ca'iycotic, hich ni me xapas li' ta alumali, xchi.

²⁴ Soc la yal xan: Jamal ya calbeyex, mayuc jalwanej te ya x'ich'ot ta cuenta ta slumal.

²⁵ Soc melel ya calbeyex te ay tsobol me'ba' antsetic ta Israel c'alal cuxul a te Elías te c'alal la yich' maquel oxeb ha'bil soc waqueb u te ch'ulchan soc tal bayel wi'nal ta spahmal q'uinal.

²⁶ Pero te Elías ma ba ticonot ta stojol yantic antsetic, ha nax ticonot ta stojol jtuhl me'ba' ants ay ta Sarepta ta sq'uinal Sidón.

²⁷ Soc ay tsobol jc'a'el-chameletic ta Israel c'alal cuxul a te jalwanej Eliseo, pero mayuc mach'a lecubtesot yu'un, ha nax te Naamán te talem ta Siria, xchi.

²⁸ C'alal la ya'iyic te hich la yal, ilinic yu'un spisil te mach'atic ayic ta sinagoga.

²⁹ La stehc'an sbahic, la yiq'uic loq'uel ta ti'pueblo, la yiq'uic bahel c'alal ta sba switsul te slumalic, yu'un ya c'an scotp'inic cohel tey a;

³⁰ pero c'ax ta yohlilic te Jesús, baht.

Loc' bohl espíritu ta yo'tan jtuhl winic

³¹ Te Jesús co bahel ta Capernaum te ay ta sq'uinal Galilea; la ya'iy p'ijubteswanej ta yorahil cux-o'tan.

³² Xcham yo'tanic yu'un te bin yac yac'bel ta nopel, como ay yip te sc'ope.

³³ Ay ta sinagoga jtuhl winic te ay pucuj ta yo'tan, te tulan awon:

³⁴ ¡Ihquitayawotcotic! ¿Bin awochelotcotic a, Jesús te talemat ta Nazaret? ¿Tal bal alajinotcotic? Ya jna'bat aba, ha'at te Mach'a Ch'ultesbilat yu'un Dios, xchi.

³⁵ Comot ta c'op yu'un te Jesús: ¡Ch'aban! ¡Loc'an tal ta yo'tan! la yut. Hich te pucuj la spuch'tes ta lum ta yohlilic, hich loc' ta yo'tan te winique, ma ba uts'inotix yu'un.

³⁶ Xcham yo'tan spisilic, talel c'axel la yalbe sbahic: ¿Bin c'opil ini te ta scuenta yip soc yu'el ya spas ta mandar bohl espírituhetic, hich ya xloq'uic yu'un? xchihic.

³⁷ Hich puhc ta halel sc'oblal Jesús ta bayuc.

Jesús la slecubtesbe snihalme'el Pedro

³⁸ Te Jesús la stehc'an sba, loc' bahel ta sinagoga, och bahel ta sna Simón. Bayel yac ta a'beyel c'ahc' te snihalme'el te Simón; la yalbeyic wocol te yacuc scoltay.

³⁹ Hich te Jesús la snijan sba ta stojol, la scombe te sc'ahc'ale; hich quehchaj te sc'ahc'al, hahch ta ora soc och ta a'batinel yu'unic.

Jesús la slecubtes tsobol jchameletic

⁴⁰ Mahlelix c'ahc'al a, spisil te mach'a ay bayel ta chahp chameletic yu'unic la yic'ticlambeyic tal ta stojol Jesús. Hich te Jesús la scajanlambe sc'ab ta sba jujutuhl, la slecubteslan.

⁴¹ Soc ay tsobol pucujetic te loc' ta yo'tanic, hich la yalic ta aw: Ha'at Snich'anat Dios, xchihic. Pero la scomticlan ta c'op, ma ba la yac' te ya xc'opojic como sna'ojic te ha te Cristo.

Jesús behen ta yalel sc'op Dios ta sq'uinal Galilea

⁴² C'alal sacub q'uinal, loc' bahel, baht ta banti jochol q'uinal. Lehot yu'un te ants-winiquetic. Te c'alal c'ohtic te banti ay, ya c'an scomic te manchuc ya x'ihquitayotic yu'un.

⁴³ Pero hich halbotic yu'un Jesús: Ya sc'an te ya jpuc ta halel ta yantic pueblohetic te lec yach'il c'op sc'oblal te cuentahinel yu'un Dios, como ha scuentahil te ticombilon tal, xchi.

⁴⁴ Hich te Jesús la ya'telin yalel te sc'op Dios ta sinagogahetic te ayic ta sq'uinal Galilea.