San Lucas 20 - Bible in Tzeltal Bachajón

Te ya'tel yich'oj Jesús

¹ Jun buelta te Jesús yac sp'ijubtesbel te ants-winiquetic ta Templo soc yac yac'bel ta nopel a te lec yach'il c'op, c'oht te principal sacerdotehetic, escribanohetic soc te mamaletic,

² hich c'oht yalbeyic: Hala ca'iycotic, ¿bin awa'tel awich'oj ta spasel te bin yac apasbele? ¿Mach'a la ya'bat awa'tel? xchihic.

³ La sjac' te Jesús: Ha nix hich ay bin ya joc'obeyex. Sutbonic ca'iy:

⁴ Te ich'-ha' yu'un Juan, ¿ha bal scuenta ch'ulchan o scuenta ants-winiquetic? xchi.

⁵ Talel c'axel la yalbe sbahic: Teme ya caltic: Scuenta ch'ulchan, teme xchihotic, ya me yalbotic: ¿bin yu'un ma ba la ach'uhuniquix a? xchi me,

⁶ soc teme ya caltic: Scuenta ants-winiquetic, teme xchihotic, ya me sch'ojotic ta ton spisil te pueblo, como sch'uhunejic te ha jalwanej te Juan, xchihic.

⁷ Ha yu'un la sjaq'uic te ma na'biluc yu'unic banti talem.

⁸ Ha yu'un halbotic yu'un te Jesús: Ha nix hichon, ma ba ya calbeyex bin ca'tel quich'oj ta spasel ini, xchi.

Te chopol j'a'teletic

⁹ Te Jesús hahch yalbe te ants-winiquetic te sloc'ombahil c'op ini: Ay jtuhl winic te la sts'un ts'usubiltic, la yac' hilel ta majanel yu'un j'a'teletic, hich baht, halaj tey a.

¹⁰ C'alal la sta yorahil la sticon bahel jtuhl a'bat te yacuc x'a'bot te sit sts'usubil yu'un te j'a'teletique. Pero te j'a'teletic la smajic, mayuc bin la ya'beyic yich' bahel.

¹¹ La sticon bahel yan ya'bat; ha nix hich la smajic, la yuts'inic, mayuc bin la ya'beyic yich' bahel.

¹² La sticon bahel yan a'bat, yoxebalix a, pero ha nix hich la yehchentesic soc la sch'ojic loq'uel.

¹³ Ha yu'un la yal te yajwal ts'usubil: ¿Bin ya jpas? Ya jticon bahel te jnich'an te c'ux ta co'tan, ya wan yich'bonic ta muc' stuquel, xchi.

¹⁴ Pero te j'a'teletic te c'alal la yilic, talel c'axel hich la yalbe sbahic: Ha'ix te mach'a ya xbaht yich' te q'uinale; la'ic, ya jmiltic, scuenta yu'un ho'otic ya quich'tic te q'uinale, xchihic.

¹⁵ Hich la sch'ojic loq'uel ta ts'usubiltic, la smilic. ¿Bin ya xpasbotic yu'un te yajwal ts'usubil?

¹⁶ Ya me xtal smil te j'a'teletic, yantic mach'a ya ya'be scuentahin te sts'usubile, xchi te Jesús. C'alal hich la ya'iyic: ¡Dios ac'a te ma hichuc ya xc'oht ta pasel! xchihic yu'un.

¹⁷ Te Jesús la yilticlambe sitic, hich la yalbe: ¿Bin scuentahil hiche te hich ts'ihbabil? Te ton te ch'ayot hilel yu'un te jpas-nahetic, ha yich'o-ip xuhc c'oht, te xchihe.

¹⁸ Spisil mach'a ya xyahl ta sba te tone, wuyultic ya xc'oht yu'un; yan te mach'a ya xtenot yu'une, juch'juch'tic ya xhil, xchi.

Sc'oblal patanil

¹⁹ Te principal sacerdotehetic soc te escribanohetic la slehic bin ut'il ya stsaquic ta ora, como la sna'ic te ha sc'oblalic te bin halbotic ta sloc'ombahil c'op; pero la xi'ic te ants-winiquetique.

²⁰ Ha yu'un la sticonic bahel jtsahtaywanejetic te la scuy sbahic ta toj yo'tanic scuenta yu'un ya stsajic ta sc'op, hich ya xhu' ya yaq'uic ta sc'ab te gobernador a.

²¹ Hich la sjoc'obeyic: Maestro, jna'ojcotic te lec ac'op soc toj ya xnohpteswanat, soc mayuc mach'a tsahbil nax awu'un, smelelil yac awac' ta nopel te be yu'un Dios.

²² ¿Stojil bal te ya ca'be jpatantic te César, o ma'uc? xchihic.

²³ Pero te Jesús la sna' te bin chopol snopojic, hich la yalbe:

²⁴ A'bonic quil junuc denario. ¿Mach'a sloc'omba soc mach'a sbihil ini? xchi. Ha yu'un César, xchihic.

²⁵ Halbotic yu'un te Jesús: Ha yu'un a'beya César te bin yu'un César, soc a'beya Dios te bin yu'un Dios, xchi.

²⁶ Hich ma ba hu' yu'unic stsajbelic ta c'op ta stojol te ants-winiquetic, pero xcham yo'tanic yu'un te suhtibe, ch'abic yu'un.

Jesús joc'obot sc'oblal cha'cuxajel

²⁷ Ay c'ohtic cha'oxtuhl saduceohetic te ma ba sch'uhunejic te ay cha'cuxajel, hich la sjoc'obeyic te Jesús:

²⁸ Maestro, hich la sts'ihbabotic hilel te Moisés: Teme ay mach'a cham sbanquil te mayuc yal-snich'an hil soc te yihnam, ya me yic'be te yihnam sbanquil te ihts'inale, yu'un ay sts'umbal ya xhil te sbanquile, xchi.

²⁹ Ay huctuhl winiquetic te jun sme'static; te muc'ul banquilal la sta yihnam, mayuc yal-snich'an a cham.

³⁰ Te schebal la yic'be yihnam sbanquil, ha nix hich mayuc yal-snich'an a cham.

³¹ Te yoxebal la yic' yihnamin, hich nix ta shuctuhlulic, mayuc yal-snich'anic soc a chamic.

³² Patil cham te antse.

³³ Ta yorahil cha'cuxajel, ¿mach'a yihnam ya xc'oht te antse, como shuctuhlulic la yihnaminic? xchihic.

³⁴ Te Jesús la yalbe ya'iyic: Li' ta bahlumilali ya xnuhpunic soc ya x'ac'otic ta nuhpunel,

³⁵ yan te mach'atic te lec ya x'ilotic yu'un Dios te ya xhu' ya stahic c'ohel te utsilal te ya xchicnaj ta patil soc te cha'cuxajel ta yohlil te mach'atic chamenic, ma xnuhpunic soc ma x'ac'otic ta nuhpunel,

³⁶ como ma xhu' ya xchamiquix, yu'un hich ya xc'ohtic te bin ut'il te ch'ul a'batetic, soc ha al-nich'anetic yu'un Dios te bin ut'il ayic ta scuenta te cha'cuxajele.

³⁷ Pero te bin ut'il te ya xcha'cuxajic te mach'atic chamenic, ha nix la yac' ta na'el te Moisés te banti ya yalbe sc'oblal te jpeht ch'ix, te c'alal la yalbe sbihil te Cajwaltic: Ha Dios yu'un Abraham, Dios yu'un Isaac, soc Dios yu'un Jacob, te xchihe,

³⁸ como te Diose ma ha'uc Dios yu'un mach'atic chamenic, ha Dios yu'un mach'atic cuxulic, como spisil cuxulic ta sit te Diose, xchi.

³⁹ La sjaq'uic cha'oxtuhl escribanohetic: Maestro, lec te bin la awale, xchihic.

⁴⁰ Hich mayuc bin la sjoc'obeyiquix.

Te Cristo ¿mach'a snich'an?

⁴¹ Te Jesús la yalbe: ¿Bin ut'il ay a te ha snich'an David te Cristo te ya yalique?

⁴² Como ha nix te David la yal ta libro yu'un Salmohetic: Te Cajwaltic la yalbe te Cajwal: Huclan ta jwa'el-c'ab,

⁴³ ha to c'alal ya ca'bat atec'tajibin acontra, te xchihe.

⁴⁴ Te David ya yal: Cajwal, xchi; ha yu'un ¿bin ut'il ay a te ha snich'an? xchi te Jesús.

Jesús la yalbe smulic escribanohetic

⁴⁵ Spisil te ants-winiquetic yac ya'iybelic a, te Jesús hich la yalbe te jnopojeletic yu'un:

⁴⁶ Tsahtaya me abahic ta stojol te escribanohetic te ya smulanic te naht sc'u' ya xbehenic, te ya xpatbot yo'tanic ta plazahetic, ya smulanic te primero huctajibaletic ta sinagogahetic soc te primero huctajibaletic ta we'el;

⁴⁷ ya yich'beyic sna me'ba' antsetic, soc naht ya sc'oponic Dios yu'un ya x'ilotic. Ya me yich'ic tulan castigo, xchi.