San Lucas 17 - Bible in Tzeltal Bachajón

Sc'oblal mach'atic ya xyahlteswanic ta mulil

¹ Te Jesús hich la yalbe te jnopojeletic yu'un: Fuersa ay ya xtal yahltesel ta mulil, pero ¡ay me swocol te mach'a ya xyahlteswan!

² Ha lec te yacuc yich' chucbeyel cha' ta snuc' soc ya yich' ch'ojel ochel ta mar, te mach'a ya syahltes jtuhluc ha'i bic'tal alaletic ini.

³ ¡Tsahtaya me abahic! Teme ay la sta smul ta atojol te awermano, tsitsa; teme ya suhtes yo'tan, pasbeya perdón.

⁴ Teme huqueb buelta ta jun c'ahc'al ya sta smul ta atojol, pero teme huqueb buelta ya xtal ta atojol soc ya yal: Ya jsuhtes co'tan, teme xchihe, pasbeya perdón.

Sc'anel xan sch'uhunel-o'tanil

⁵ Te jpuc-c'opetic hich la yalbeyic te Cajwaltic: A'botcotic xan sch'uhunel co'tancotic, xchihic.

⁶ La yal te Cajwaltic: Te ayuc sch'uhunel awo'tanic hich te bin ut'il jp'ij sbac' mostaza, ya xhu' yac awalbeyic te sicómoro-te' ini: Bula loq'uel aba, bahan, ts'una aba ta mar, teme xchihexe, ya me sch'uhumbeyex ac'opic.

Te bin ya sc'an ya spas te a'bat

⁷ ¿Mach'ahex a te ay a'bat yu'un te ya stop'lum o ya scanantay wacax, te c'alal ya xhul tal hich ya yalbe: La, c'axan ta mesa, xchi bal?

⁸ ¿Ma bal hichuc ya yalbe: Chahpambon jwe'el, chuca ach'uht, c'asesbon tal ta mesa, ha to teme laj co'tan ta we'el uch'el, patil ya xwe' x'uch'at te ha'ate, ma bal xchihuc?

⁹ ¿Ya bal yalbe wocol te a'bat yu'un te la spas te bin halbot ya spase? Ma wan te ya cale.

¹⁰ Ha nix hich te ha'exe, teme la apasic spisil te bin halbotex, hich me yac awalic: Ma xtuhunotcotic ta a'batinel, ha nax la jpascotic te bin ay ta jcuentacotic spasel, chihanic me, xchi te Jesús.

Jesús la slecubtes lajuntuhl jc'a'el-chameletic

¹¹ Yac ta bahel ta Jerusalén a te Jesús, c'ax ta ti'ts'acan yu'un Samaria soc Galilea.

¹² C'alal c'oht ta jun tut pueblo, tal ta tahel yu'un lajuntuhl winiquetic te yich'ojic c'a'el-chamel; namal to hul stehc'an sbahic,

¹³ hich la yawtayic te Jesús: ¡Jesús, Maestro, c'uxultayawotcotic! xchihic ta aw.

¹⁴ C'alal ilotic yu'un Jesús, hich halbotic yu'un: Bahanic, ac'a abahic ta ilel ta stojol te sacerdotehetique, xchi sc'oblalic. Te c'alal yacalic ta bahel a, ch'ay te sc'a'el-chamelique.

¹⁵ Te jtuhle, c'alal la yil te ch'ayix te sc'a'el-chamel, suht tal soc tulan yac yalbebel yutsilal te Diose,

¹⁶ tal spahcan sba c'alal lum ta ye'tal yoc Jesús ta yalbeyel wocol yu'un. Ha samaritano-winic.

¹⁷ La yal te Jesús: ¿Ma bal lajuntuhluc te lecubtesbilic? ¿Banti ay te baluntuhle?

¹⁸ ¿Ma bal ayuc yan suht tal ta yalbeyel wocol Dios, hip bal a ha'i jyanlum winic ini? xchi.

¹⁹ Hich la yalbe te winique: Hahchan, bahanix; ta scuenta sch'uhunel awo'tan colematix, xchi.

Ya xtal te cuentahinel yu'un Dios

²⁰ Te fariseohetic la sjoc'obeyic te Jesús te bin ora ya xtal te cuentahinel yu'un Dios, hich halbotic yu'un: Ma chicanuc ta ilel te ya xtal te cuentahinel yu'un Dios,

²¹ soc ma ba ya yalic: Ilawil, li' ayixi, o: Ilawil, tey ay a, ma xchihuc, como ay ta awohlilic te cuentahinel yu'un Dios, xchi.

²² Soc la yalbe te jnopojeletic yu'une: Ya me sta yorahil te awo'tanicuc te yac awilic junuc sc'ahc'alel te Nich'anil ay ta scuenta winic, pero ma ba yac awilic.

²³ Hich me ya xhalbotex: Ilawil, li' ay, o: Ilawil, tey ay a, xchihic. Ma me xbahex soc ma me xat'unic bahel,

²⁴ como hich te bin ut'il xliplujet ya xtihl tsantsehwal ta sti'il ch'ulchan c'alal ta yan sti'il, hich ya xc'oht te bin ora ya xtal te Nich'anil ay ta scuenta winic.

²⁵ Pero ya sc'an te nahil ya xc'ax bayel swocol soc ya xp'ajot yu'un te jcaj ts'umbalil ini.

²⁶ Hich te bin yilel ta yorahil Noé, hich yilel ta yorahil te Nich'anil ay ta scuenta winic.

²⁷ Yacalic ta we'el uch'el, ta nuhpunel soc ta aq'uel ta nuhpunel, ha to c'alal och ta barco te Noé soc tal te puhlel te la slajin spisilic.

²⁸ Ha nix hich ta yorahil Lot, yacalic ta we'el uch'el, ta chombajel, mambajel, ts'umbajel soc ta pas na.

²⁹ Pero te bin c'ahc'alil loc' ta Sodoma te Lot, co tal c'ahc' soc azufre ta ch'ulchan, la slajin spisilic.

³⁰ Ha nix hich te bin c'ahc'alil ya xchicnaj tal te Nich'anil ay ta scuenta winic.

³¹ Ta hich ora te mach'a mohem ta ba na ma me x'och sloq'ues tal te sbiluc ay ta yutil sna; soc te mach'a ay ta sq'uinal, ma me suhtix bahel ta sna.

³² Na'ahic me te yihnam Lot.

³³ Spisil mach'a ya sc'an ya scoltay scuxlejal, ya sch'ay bahel; yan te mach'a ya sch'ay scuxlejal, ya scoltay stuquel.

³⁴ Ya calbeyex, ta hich ahc'abal ay cheb wayalic ta jun wayibal, jtuhl ya x'ic'ot, jtuhl ya xhil.

³⁵ Ay cheb antsetic ayic ta juch', jtuhl ya x'ic'ot, jtuhl ya xhil.

³⁶ Ay cheb winiquetic ayic ta sq'uinalic, jtuhl ya x'ic'ot, jtuhl ya xhil, xchi.

³⁷ Hich joc'obot yu'unic: ¿Banti, Cajwal? xchihic. Ta banti ay te chamen baq'uet, tey nix ya stsob tal sbahic a te hosetique, xchi te Jesús.