San Lucas 15 - Bible in Tzeltal Bachajón

Sloc'ombahil c'op yu'un ch'ayem tuminchij

¹ Nohpojic tal ta stojol Jesús spisil te jc'an-patanetic soc te jmulawiletic ta ya'iybeyel te sc'ope.

² Pero te fariseohetic soc te escribanohetic hahchic wulajanel ta stojol, hich la yalic: Ha'i winic ini ya yic'ticlan jmulawiletic soc ya sjoquinlan ta we'el, xchihic.

³ Ha yu'un te Jesús la yalbe ya'iyic te sloc'ombahil c'op ini:

⁴ Teme ay jtuhlex te ay ho'winic (100) ta coht stuminchij te ya xch'ay jcoht, ¿ma bal yacuc yihquitay hilel ta aquiltic te balunlajuneb yo'winic (99) ta coht soc ya xchol bahel te jcoht ch'ayem ha to c'alal ya sta?

⁵ Te c'alal ya sta, bayel yutsil yo'tan a ya scajan tal ta snehquel,

⁶ soc te c'alal ya xc'oht ta sna, ya stsob tal yamigotac soc spat xuhc, hich ya yalbe: Pajaluc me ay yutsil co'tantic, yu'un la jtahix te jcoht jtuminchij te ch'aye, xchi.

⁷ Ya calbeyex te c'ax hich ay yutsil-o'tanil ta ch'ulchan yu'un jtuhl jmulawil te ya suhtes yo'tan te bin ut'il ay yutsil-o'tanil yu'un te balunlajuneb yo'winic (99) ta tuhl te toj yo'tanic te ma xtuhun yu'un te ya suhtes yo'tanique.

Sloc'ombahil c'op yu'un ch'ayem taq'uin

⁸ Soc teme ay jtuhl ants te ay lajuneb dracma-taq'uin yu'un, teme ch'ay junuc, ¿ma bal yacuc stsun sc'ahc', ya smes sna soc ya sle ta lec ha to c'alal ya sta?

⁹ C'alal ya sta, ya stsob tal yamigotac soc spat-xuhc, hich ya yalbe: Pajaluc me ay yutsil co'tantic, yu'un la jtahix te dracma-taq'uin te ch'ayem cu'un, xchi.

¹⁰ Ya calbeyex te hich nix ay yutsil yo'tanic te ch'ul a'batetic yu'un Dios teme ya suhtes yo'tan jtuhl jmulawil, xchi te Jesús.

Sloc'ombahil c'op yu'un querem la yihquitay hilel stat

¹¹ Soc hich la yal xan: Ay jtuhl winic te ay cheb snich'nab;

¹² te ihts'inal hich la yalbe te state: Jtat, a'bon te jayeb bintic ya xc'oht ta jcuenta awu'un, xchi. Hich te stat la spucticlambe te sbiluque.

¹³ Ma haluc c'ahc'al ta patil, te ihts'inal la stsob spisil bintic ay yu'un, baht ta namal ta yan q'uinal, tey c'oht slajin spisil a, biluc nax bin la slajin a.

¹⁴ C'alal laj yixtalambel spisil, tal bayel wi'nal tey ta q'uinal, hahch ta wocol yu'un mayuquix bin ay yu'un.

¹⁵ Hich baht sle a'tel ta stojol jtuhl winic te tey slumal a, ticonot bahel yu'un ta sq'uinal ta smac'linel chitametic.

¹⁶ Yo'tan ya snojes sch'uht a te bin ya swe' te chitametique, pero mayuc mach'a ay bin a'bot yu'un.

¹⁷ C'alal la sna' q'uinal, hich la yal: ¡Te jayeb j'a'teletic yu'un te jtat c'ax bayel swe'elic, yan te ho'one, ya xlajonix ta wi'nal li'i!

¹⁸ Ya suhton bahel ta stojol jtat, hich ya xc'oht calbe: Jtat, jtahoj jmul ta stojol ch'ulchan soc ta atojol.

¹⁹ Ma xpasix te anich'an ya xhaloton; hich yac awac'on te bin ut'il jtuhl j'a'tel awu'un, xchi ta yo'tan.

²⁰ Hich hahch ta behel, baht ta banti ay te state. C'alal namal to ay a, ilot yu'un te state, sts'ujet ta yo'tan la ya'iy te snich'an, ahnimal baht sta tal, la smech' soc la yuhts'uy.

²¹ Hich halbot yu'un te snich'an: Jtat, jtahoj jmul ta stojol ch'ulchan soc ta atojol, ma xpasix te anich'an ya xhaloton, xchi.

²² Pero te stat hich la yalbe te a'batetic yu'une: Ich'ahic tal buen lequil c'u'ul, a'beyahic slap; soc a'beyahic ch'ocowil ta yal sc'ab soc a'beyahic slap step.

²³ Ic'ahic tal te juhp'en wacax soc milahic, ya jwe'tic, ya jpastic q'uin,

²⁴ como te jnich'an chamenix a, pero cha'cuxajix tal; ch'ayem, pero la jtahix, xchi te state. Hich hahch spasic q'uin yu'un yutsil q'uinal.

²⁵ Te banquilal, bahem ta sq'uinal a. Te c'alal suht tal, nopol ya xc'ohtix ta sna a, la ya'iy ay q'uin soc noc'ol ahc'ot;

²⁶ ha yu'un la yic' tal jtuhl a'bat, la sjoc'obe bin yac ta pasel.

²⁷ Hich halbot yu'un te a'bat: Suhtix tal te awihts'in, soc te atat yac'ojix ta milel te juhp'en wacax yu'un lec ay a suht tal, xchi.

²⁸ Ilin yu'un te banquilal, ma ba la sc'an och bahel. Ha yu'un loc' talel te state, la yalbe wocol te yacuc x'och bahel.

²⁹ Pero te banquilal hich la yalbe te state: Ilawil, ayix bayel ha'bil te cac'oj jba ta a'batinel awu'un, mayuc bin ora la jc'axuntaybat amandar; pero mayuc awa'beyejon ni jcohtuc tut tentsun yu'un ya jpas q'uin soc te camigotaque.

³⁰ Pero te c'alal suht tal te anich'an te la yixtalajimbat te bintic ay awu'un soc j'antsinel-antsetic, la amilbe te juhp'en wacax, la yut.

³¹ Ha yu'un hich la yal te state: Jnich'an, spisil ora joquinejat, soc ha'at awu'un spisil bintic ay cu'un.

³² Pero ya sc'an te tse'el co'tantic ya jpastic q'uin, como te awihts'ine chamenix a, pero cha'cuxajix tal; ch'ayem, pero la jtahix, xchi.