San Lucas 13 - Bible in Tzeltal Bachajón

Suhtesa awo'tanic o ya xlajex

¹ Ha yorahil a te ay mach'atic tey ayic a te la yalbeyic Jesús sc'oblal te galileohetic te capbot yu'un Pilato te sch'ich'elic soc sch'ich'el te milbil smahtan Dios yu'unique.

² Hich la sjac' te Jesús: ¿Acuyojic bal te c'ax hich smulic a te galileohetic ini te bin ut'il yantic galileohetic, te hich c'oht ta scuentahique?

³ Ya calbeyex, ban c'an hichuc. Pero teme ma ba yac asuhtes awo'tanic, ha nix hich ya xlajex ta apisilic.

⁴ Soc te waxaclajuntuhl (18) te lajic ta tenel c'alal jihn te toyol ts'ahc ta Silo, ¿acuyojic bal te c'ax hich smulic a te bin ut'il spisil yantic te nahinemic ta Jerusalén?

⁵ Ya calbeyex ban c'an hichuc. Pero teme ma ba yac asuhtes awo'tanic, ha nix hich ya xlajex ta apisilic, xchi.

Sc'oblal higuera ma ba sitin

⁶ Soc la yal te sloc'ombahil c'op ini: Ay jtuhl winic sts'unoj higuera ta sts'usubil. Tal slehbe sit, pero mayuc sit la stahbe.

⁷ Hich la yalbe te jcanan-ts'usubil: Yoxebalix ha'bil te tal jlehbe sit te higuera ini, pero mayuc sit la jtahbe. Ts'eta, ¿bistuc te tojol smacoj q'uinal? xchi.

⁸ La sjac' te jcanan-ts'usubil: Cajwal, ihquitaya ha'i ha'bil ini; ya joc'be sjoyobal stomal soc ya ca'be c'a'emlum.

⁹ Teme ya yac' sit, lec ay; teme ma ba ya yac' sit, ha to yac ats'et a, xchi te Jesús.

Jesús la slecubtes jtuhl ants ta sc'ahc'alel cux-o'tan

¹⁰ Te Jesús yac ta p'ijubteswanej ta sinagoga ta sc'ahc'alel cux-o'tan.

¹¹ Ay jtuhl ants tey a te ayix waxaclajuneb (18) ha'bil te yich'oj espíritu te la ya'be schamel, c'ujul spat ya xbehen yu'un, ma xhu' yu'un te toj ya stehc'an sba.

¹² C'alal Jesús la yil, la yic' tal ta stojol, hich la yalbe: Ants, colematix yu'un te chamel awich'oj, xchi.

¹³ Hich la scajambe sc'ab ta sba, ora toj la stehc'an sba, soc la yalbe bayel yutsilal Dios yu'un.

¹⁴ Pero te principal yu'un te sinagoga ilin yu'un te bin ut'il sc'ahc'alel cux-o'tan a te la ya'iy slecubteswanej te Jesús. Hich la yalbe te ants-winiquetique: Ay waqueb c'ahc'al a'tel; ha ya sc'an ya xtal awac' abahic ta lecubtesel a, ma ha'uc ta sc'ahc'alel cux-o'tan, la yut.

¹⁵ La sjac' te Cajwaltic: ¡Jchebal-o'tanex! Jujutuhlex, ¿ma bal yacuc atilic te j'a'tel-wacax o burro awu'unic ta banti chucul yu'un yac awa'beyic yuch' ha' ta sc'ahc'alel cux-o'tan?

¹⁶ Te ants ini te ha sts'umbal Abraham te ayix ta waxaclajuneb (18) ha'bil chucbil yu'un Satanás, ¿ma bal yacuc xhu' ta tilbeyel schuhquil ta sc'ahc'alel cux-o'tan? xchi.

¹⁷ Te c'alal hich la yal, q'uexawic spisil te scontratac; pero spisil te ants-winiquetic tse'el yo'tanic yu'un spisil yutsil ya'tel te Jesús.

Sloc'ombahil c'op yu'un sbac' mostaza

¹⁸ Hich la yal xan te Jesús: ¿Bin ut'il c'ohem te cuentahinel yu'un Dios? ¿Bin ya jpaj soc?

¹⁹ Ha pajal soc sbac' mostaza te la sts'un ta yawal-ts'unub jtuhl winic; ch'ihy soc muc' ste'el c'oht, soc te ha'mal mutetic la sluhtsan sbahic ta sc'abc'ab, xchi.

Sloc'ombahil c'op yu'un levadura

²⁰ Soc la yal xan: ¿Bin ya jpaj soc te cuentahinel yu'un Dios?

²¹ Ha pajal soc levadura te la swots' soc oxp'is harina jtuhl ants, ha to c'alal pajub spisil, xchi.

Tut yochibal te sbehlal cuxlejal

²² Te c'alal yac ta bahel ta Jerusalén a te Jesús, la ya'iy p'ijubteswanej ta muc'ul pueblohetic soc ta tut pueblohetic.

²³ Ay mach'a la sjoc'obe: Cajwal, ¿ma bal ayuc tsobol te mach'atic ya xcolic? xchi. La yal te Jesús:

²⁴ Ac'ahic fuersa ta ochel bahel ta banti tut nax sjamalil te ti'nahile, como ya calbeyex te ay tsobol mach'atic ya sc'an ya x'ochic tey a, pero ma ba ya xhu' yu'unic.

²⁵ Teme hahchemix te yajwal na soc la smac te ti'nahil, ya me xhilex ta c'op ta fuera: Cajwal, Cajwal, jambotcotic, xchihex. Ma jna' banti talemex, ya me yutex.

²⁶ Hich me ya xhahch ta yalel: La joquinatcotic ta we'el ta uch'el, soc la awa'iy p'ijubteswanej ta plaza cu'uncotic, xchihex.

²⁷ Pero hich me ya yalbeyex: Ya calbeyex te ma jna' banti talemex; loc'anic ta jtojol apisilic te chopol awa'telique, ya me yutex.

²⁸ Tey ya xc'oht awoq'uetay abahic soc tey ya xc'oht ac'uxuxan awehic a te c'alal yac awilic te Abraham, Isaac, Jacob soc spisil te jalwanejetic te tey ayic a ta banti ay te cuentahinel yu'un Dios, yan te ha'exe, ch'aybilex loq'uel.

²⁹ Ay mach'atic ya xtalic ta stojol banti ya xloc' tal c'ahc'al soc ta smahlib c'ahc'al, ta stojol norte soc ta sur, ya xc'ohtic ta we'el ta mesa ta banti ay te cuentahinel yu'un Dios.

³⁰ Ay mach'atic te patil ayic te nahil ya xc'ohtic, soc ay mach'atic nahil ayic te patil ya xc'ohtic, xchi.

Jesús la smel yo'tan yu'un Jerusalén

³¹ Ha yorahil a te ay fariseohetic te hich tal yalbeyic te Jesús: Bahan, loc'an li'i, como yo'tan ya smilat te Herodes, xchihic.

³² Hich halbotic yu'un: Bahan, hich me xawalbeyic te waxe: Ya jloq'ueslan pucujetic soc ya jlecubtes jchameletic yo'tic soc pajel, ta yoxebal c'ahc'al ya jlajin te ca'tel, xchihanic me.

³³ Pero ya sc'an te ya xbehenon yo'tic soc pajel soc cha'bej, como ma xpas te ma ba ta Jerusalén ya xlaj te mach'a jalwanej.

³⁴ ¡Jerusalén, Jerusalén, te yac amil te jalwanejetic soc te yac ach'oj ta ton te mach'atic ticombilic ta atojole! ¡Bayel buelta hich ya c'an jtsob te awal-anich'nab te bin ut'il ya stsob yalatac ta ye'tal xic' te me'mut, pero ma ba la ac'an!

³⁵ Ilawil, jochol me ya xhil te anahe; soc ya calbeyex te ma ba yac awiloniquix xan ha to c'alal ya sta yorahil te hich yac awalic: ¡Bayel yutsil te mach'a talix ta scuenta sbihil te Cajwaltic! te xchihexe, xchi te Jesús.