San Lucas 1 - Bible in Tzeltal Bachajón

La yich' ts'ihbabeyel Teófilo

¹ Ay tsobol mach'atic xtiq'uet la sc'an shachic sts'ihbayel ta hun te bintic c'ohem ta pasel ta cohliltic te bin mero melel,

² hich te bin ut'il la ya'botic jnoptic te mach'atic ta shahchibal to la yil ta sitic te bintic c'oht ta pasel soc te a'tejic ta yalel te c'ope.

³ Ha nix hichon, te bin ut'il nahil la joc'oylan ca'iy ta lec spisil bin ut'il hahchem tal te bintic c'ohem ta pasel, lec la jca'iy te xtiq'uet ya jts'ihbabat ta hun, Teófilo, te buen ich'bilat ta cuenta,

⁴ scuenta yu'un yac ana' a te ha smelelil te bintic a'bibilat anop.

Halbot sc'oblal ya x'ayin Juan

⁵ Te bin ora ay ta ajwalil yu'un Judea a te Herodes ay jtuhl sacerdote Zacarías sbihil te ha yu'un te jchahp yu'un Abías; te yihnam ha nix sts'umbal Aarón, Elisabet sbihil.

⁶ Schebalic toj yo'tanic ta stojol Dios, soc ts'acal sch'uhumbeyejic spisil smandar te Cajwaltique.

⁷ Pero mayuc yal-snich'anic, como ma x'alaj te Elisabet, soc ta schebalic ayix ya'bilalic.

⁸ Te c'alal ay ta a'tel ta sacerdotehil ta stojol Dios a te Zacarías soc te jchahp smohlol ta a'tel,

⁹ ta scuenta seña ta na'el c'oht ta scuenta te Zacarías, hich bin ut'il costumbre yu'un te sacerdotehetic, te ya x'och bahel ta chiq'uel pom ta ch'ul awilal yu'un te Cajwaltique.

¹⁰ Spisil te ipal ants-winiquetic yu'un te pueblo tec'ajtic ta yamaq'uil Templo ta sc'oponel Dios ta yorahil ta chiq'uel pom.

¹¹ Chicnaj ta stojol Zacarías ch'ul a'bat yu'un te Cajwaltic, teq'uel ta wa'el ta schic'ojibal pom.

¹² Te Zacarías, c'alal la yil la xi', u'untayot yu'un xiwel.

¹³ Pero hich halbot yu'un te ch'ul a'bat: Ma xiwat, Zacarías, yu'un a'iyotix ac'op ta stojol Dios; ya me x'ayin jtuhl squerem-al te awihnam Elisabet, Juan sbihil ya me xc'oht awu'un.

¹⁴ Bayel yutsil awo'tan soc tse'el awo'tan yu'un, soc tsobol mach'atic ay yutsil yo'tanic yu'un te ya x'ayine,

¹⁵ como muc' sc'oblal ya xc'oht ta stojol Dios. Ma me xyuch' vino o bin pajuben, soc ya xnoj ta yo'tan te Ch'ul Espíritu te c'alal wolbil to yu'un snan a.

¹⁶ Ya me ya'be suhteslan yo'tanic ta stojol Dios tsobol te al-nich'anetic yu'un Israel.

¹⁷ Ha ya xnahilij bahel ta stojol Dios ta scuenta te espíritu soc te yip te Elías, yu'un ya yac' suhtuc yo'tanic te me'iltatiletic ta stojol te yal-snich'anic, soc te jc'axun-c'opetic ta stojol te p'ijil-o'tanil yu'un te mach'atic toj yo'tanic, scuenta yu'un ya schahpambe te Cajwaltic jun pueblo te chapale, xchi sc'oblal.

¹⁸ Te Zacarías hich la yalbe te ch'ul a'bat: ¿Bin ut'il ya xhu' ya jna' ini? como mamalonix soc ayix ya'bilal te quihname, xchi.

¹⁹ La sjac' te ch'ul a'bat: Ho'on Gabrielon te teq'uelon ta stojol te Diose, soc ticombilon yu'un ya calbat te lequil ach' c'op ini.

²⁰ Yo'tic uma' ya xhilat, ma xhu' ya xc'opojatix ha to c'alal ya xc'oht ta pasel bin la jcalbat, como ma ba la ach'uhumbon te jc'op te ya xc'oht ta pasel ta mero yorahil, xchi sc'oblal.

²¹ Te pueblo yac smahliybelic te Zacarías, soc yaquic na'etel yu'un te halajix ta ch'ul awilal.

²² Pero c'alal loc' talel ma ba hu' te ya sc'opon te pueblo; hich la sna'ic te ay bin la yil ta nahalsitil ta ch'ul awilal. La sc'oponlan ta seña ta sc'ab, uma' a hil.

²³ C'alal ts'acay yu'un te jayeb c'ahc'al ay ta a'tel ta Templo, suht bahel ta sna.

²⁴ Patil hahch yal te yihnam, ha te Elisabet; ho'eb u ma ba loc' ta sna, yu'un hich la yal:

²⁵ Hich spasbeyejon te Cajwaltique, ta ora ini la yaq'uix ta ilel te lec yo'tan ta jtojol, la sloq'uesbon te jq'uexlal ta stojol te ants-winiquetique, xchi.

Halbot sc'oblal ya x'ayin Jesús

²⁶ Waqueb u ta patil te ch'ul a'bat Gabriel ticonot bahel yu'un Dios ta jun pueblo yu'un Galilea, Nazaret sbihil,

²⁷ ta stojol jtuhl ach'ix te macbil yu'un jtuhl winic, José sbihil, sts'umbal David; María sbihil te ach'ixe.

²⁸ Te ch'ul a'bat och bahel ta banti ay te ach'ix, hich la yal: ¡Ya jpatbat awo'tan, ha'at te c'uxultaybilat yu'un Dios! Sjoquinejat te Cajwaltic, bayel awutsil ta yohlil te antsetique, xchi.

²⁹ Te María, c'alal la yil te ch'ul a'bat, xiw yu'un te bin halbot yu'une, soc xna'et yu'un te bin scuentahiluc te patil-o'tanile.

³⁰ Ha yu'un hich halbot yu'un te ch'ul a'bat: Ma xiwat, María, bayel yutsil yo'tan awu'un te Diose.

³¹ Ya me xhahch awal, ya x'ayin jtuhl aquerem-al, JESÚS me sbihil ya xc'oht awu'un.

³² Muc' sc'oblal ya xc'oht, soc ya x'a'bot sbihilin Snich'an te Mach'a ay ta toyol. Te Cajwaltic Dios ya me ya'be sjelolin ta ajwalil te David te state.

³³ Sbahtel q'uinal ay ta ajwalil yu'un te patil al-nich'anetic yu'un Jacob; mayuc slajibal te cuentahinel yu'une, xchi sc'oblal.

³⁴ Te María la sjoc'obe te ch'ul a'bat: ¿Bin ut'il ay a ini, como mayuc jmamalal? xchi.

³⁵ La sjac' te ch'ul a'bat: Ya me xhul ta atojol te Ch'ul Espíritu, ya spotsat ta yaxinal yu'el te Mach'a ay ta toyol; ha yu'un te Ch'ul Alal te ya x'ayine, Snich'an Dios sbihil ya xc'oht.

³⁶ Ha nix hich te amohlol ats'ahquil Elisabet, te mach'a jma'al ta halel yu'unic, swolojix yal aunque me'elix, swaquebalix u shahchel a te yale.

³⁷ Como mayuc bin ma xhu' yu'un stuquel te Diose, xchi.

³⁸ La yal te María: Ya'baton te Cajwaltic Dios; ac'a spasbon hich te bin ut'il la awal, xchi. Hich te ch'ul a'bat la yihquitay hilel.

Te María baht yula'tay te Elisabet

³⁹ Ta hich ora hahch bahel te María, baht ta ora ta jun pueblo te ay ta witsiltic ta sq'uinal Judea;

⁴⁰ och ta sna Zacarías, la spatbe yo'tan te Elisabet.

⁴¹ C'alal patbot yo'tan yu'un María te Elisabet, la stij sba te alal swoloje. Te Elisabet noj ta yo'tan te Ch'ul Espíritu,

⁴² tulan c'opoj, hich la yal: ¡Bayel awutsil ta yohlil te antsetic, soc bayel yutsil te sit te yawil alal awu'un!

⁴³ ¿Bin ut'il ay a te hich c'oht ta jtojol, te ha tal stahon te snan te Cajwal?

⁴⁴ Como te c'alal la jca'iy te spatil-o'tanil awu'un, te alal jwoloj wihl yu'un yutsil q'uinal la ya'iy.

⁴⁵ Bayel me yutsil te mach'a la sch'uhun te ya xc'oht ta pasel te bin halbot yu'un te Cajwaltique, xchi.

⁴⁶ La yal te María: Ya yalbe yutsilal Cajwal te jch'uhlel,

⁴⁷ soc te espíritu cu'un bayel yutsil ya ya'iy ta stojol Dios te Jcoltaywanej cu'une,

⁴⁸ como la yil te peq'uel ay te a'bat yu'une. Ta ora bahel ya me yalbonic yutsil jc'oblal spisil te cajalcaj ts'umbalil,

⁴⁹ como muc' bin la spasbon te Mach'a bayel yu'el. ¡Ch'ultesbil te sbihile,

⁵⁰ soc te sc'uxul yo'tan ya xc'oht ta stojol te cajalcaj mach'atic ya yich'ic ta muc'!

⁵¹ Bayel bintic muc' spasticlanej ta sc'ab; la spucticlan bahel te mach'atic stoyoj sbahic yu'un te bin snopoj ta yo'tanic.

⁵² La sloq'ueslan ta shuctajibic te mach'atic ay yipic, soc la stoybe sc'oblal te mach'atic peq'uel ayique.

⁵³ Te mach'atic ayic ta wi'nal la yac'ticlambe te bintic lec, pero jochol sc'abic la sticonlan bahel te jc'uhlejetique.

⁵⁴ La scoltay te Israel te a'bat yu'une, la to sna' te ya sc'uxultay

⁵⁵ te Abraham soc te sts'umbal scuenta sbahtel q'uinal, hich te bin ut'il yalbeyej te jme'jtatic, xchi te María.

⁵⁶ Te María oxeb u la sjoquin te Elisabet, patil suht bahel ta sna.

Ayin Juan te J'ac'-ich'-ha'

⁵⁷ C'alal la sta yorahil te ya x'ayin yal te Elisabet, ayin squerem-al.

⁵⁸ C'alal la ya'iyic te spat-xuhc soc smohlol sts'ahquil te la yich'ix bayel c'uxultayel yu'un Dios, pajal bayel yutsil yo'tanic soc.

⁵⁹ Ta swaxaquebal c'ahc'al yayinel a, tal ya'beyic yich' circuncisión, soc c'an ya'be sbihilin Zacarías, hich te bin ut'il sbihil te state;

⁶⁰ pero la yal te snan: ¡Ma'uc! Juan sbihil ya xc'oht, xchi.

⁶¹ ¿Bin yu'un? Mayuc amohlol ats'ahquil te hich sbihil, xchihic.

⁶² Ha yu'un la sjoc'obeyic te stat ta scuenta seña sc'abic bin sbihil ya xc'oht yu'un.

⁶³ Hich te Zacarías la sc'ambe jun tut tabla yu'un ts'ihbayel, hich la sts'ihbay: Juan sbihil, xchi. Spisilic xcham yo'tanic yu'un.

⁶⁴ Ora jahm ye soc tojob yac' te Zacarías, hahch yalbe bayel yutsil te Diose.

⁶⁵ Tojic xiwel yu'un spisil te spat-xuhc, soc puhc ta halel ta witsiltic yu'un Judea te bintic c'oht ta pasele.

⁶⁶ Spisil te mach'atic la ya'iyic la sq'uej ta yo'tanic, hich la sjoc'oyic: ¿Bin yilel ya xc'oht ta patil te alal ini? xchihic. Como te sc'ab te Cajwaltic ay ta stojol.

Sc'ayoj Zacarías

⁶⁷ Te Zacarías te stat te alale, noj ta yo'tan te Ch'ul Espíritu, hahch ta c'op ta scuenta jalwanej, hich la yal:

⁶⁸ Bayel yutsil te Cajwaltic, te Dios yu'un Israel, yu'un tal swehtesbe scolel te pueblo yu'une.

⁶⁹ Ta sts'umbal David te a'bat yu'un la schicnajtesbotic jtuhl Jcoltaywanej te bayel yu'el,

⁷⁰ hich te bin ut'il la yal ta scuenta te ch'ul jalwanejetic yu'un ta shahchibal tal,

⁷¹ ya scoltayotic loq'uel ta sc'ab te jcontratic, soc ta sc'ab te mach'atic ya yil-o'tantayotic;

⁷² yu'un ya sc'uxultay te jme'jtatic, soc yu'un sna'el te ch'ul chapbil-c'op yu'une,

⁷³ ha te jc'axel la yalbe ta jamal te jtatic Abraham te ya me xc'oht ta pasel,

⁷⁴ ha te ya scoltayotic loq'uel ta sc'ab te jcontratic, te hich mayuc xiwel te ya cac' jbahtic ta a'batinel yu'un

⁷⁵ ta scuenta ch'ultesel soc toj-o'tanil ta stojol Dios te jayeb c'ahc'al cuxulotique.

⁷⁶ Ha'at, alal, jalwanejat yu'un te Mach'a mero toyol ay, ya xc'oht abihil; yu'un ya me xnahilijat ta stojol te Cajwaltic yu'un yac achahpambe te behetic yu'une,

⁷⁷ yac awa'be sna'ic te pueblo yu'un sc'oblal colel te ay ta scuenta spasel perdón yu'un smulic,

⁷⁸ ta scuenta yutsil sc'uxul yo'tan te Dios cu'untic, te la stahotic c'alal ta toyol ta scuenta te c'ahc'al te loq'uemix tal,

⁷⁹ yu'un ya sacubtes q'uinal ta stojol te mach'atic ayic ta yihc'al q'uinal soc ta yaxinal lajel; yu'un ya stojobtesotic bahel ta sbehlal lamal q'uinal, xchi te Zacarías.

⁸⁰ Muc'ub te alale, la yich' yip yo'tan; ayin ta jochol taquin q'uinal ha to c'alal la sta yorahil te la yac' sba ta ilel ta stojol Israel.