Levítico 9 - Bible in Tzeltal Bachajón

Te mahtaniletic yu'un Aarón

¹ Ta swaxaquebal c'ahc'al, te Moisés la yic' tal te Aarón, te snich'nab soc te mamaletic yu'un Israel;

² hich la yalbe te Aarón: Ic'a tal jcoht jcolel toro scuenta mahtanil yu'un mulil, soc jcoht tat tuminchij te mayuc bin jihnem yu'un, scuenta scohtol chic'bil mahtanil; ya me awac'ticlan ta stojol Jehová.

³ Soc hich yac awalbe te snich'nab Israel: Ic'ahic tal jcoht tat tentsun scuenta mahtanil yu'un mulil, jcoht jcolel toro soc jcoht jcolel tuminchij te jujun ya'bilal, te mayuc bin jihnem yu'unic, scuenta scohtol chic'bil mahtanil,

⁴ soc jcoht toro soc jcoht tat tuminchij scuenta milbil mahtanil yu'un lamal q'uinal, te yac amilic ta stojol Jehová, soc ich'ahic tal mahtanil harina wots'bil ta aceite, como ya xchicnaj ta atojolic yo'tic te Jehová, xchi.

⁵ Hich la yich'ic bahel ta stojol te Nahilpac' Templo yu'un tahojibal te bin halbotic yu'un Moisés. Tal spisil te pueblo, la stehc'an sbahic ta stojol te Jehová.

⁶ Hich la yal te Moisés: Ha ini te bin la yal ta mandar te Jehová; pasahic, hich ya xchicnaj ta atojolic a te yutsilal Jehová, xchi.

⁷ Te Moisés la yalbe te Aarón: Nohpojan tal ta scajtajib ta chiq'uel mahtanil, ac'a te milbil mahtanil yu'un mulil soc te scohtol chic'bil mahtanil awu'un, soc pasa te stojel mulil awu'un soc yu'un te pueblo; ha nix hich ac'a te mahtanil yu'un te pueblo, soc pasbeya te stojel smulic, hich te bin ut'il yaloj te Jehová, xchi.

⁸ Ha yu'un te Aarón nohpoj tal ta scajtajib ta chiq'uel mahtanil, la smil te jcolel toro scuenta milbil mahtanil yu'un smul.

⁹ Te snich'nab Aarón la yich'beyic tal te sch'ich'el; te Aarón la smul te yal sc'ab ta ch'ich', la sjax a te xulubiletic yu'un te scajtajib ta chiq'uel mahtanil; te ch'ich' te hil la smalbe ta yoc te scajtajib.

¹⁰ La schic' ta scajtajib ta chiq'uel mahtanil te sjuhp'el, riñonetic, soc te sjuhp'el sehcub te mahtanil yu'un mulil, hich te bin ut'il halbot yu'un Jehová te Moisés.

¹¹ Pero te sbaq'uetal soc te snuhculel la schic' ta fuera yu'un te campamento.

¹² Ha nix hich la smil te scohtol chic'bil mahtanil; te snich'nab Aarón la ya'beyic te sch'ich'el, ha la stsihtsin ta sjoyobal ta sba te scajtajib ta chiq'uel mahtanil.

¹³ Soc la ya'beyic te jujujehc te scohtol chic'bil mahtanil, soc te sjol; te Aarón la schic'ticlan ta scajtajib ta chiq'uel mahtanil.

¹⁴ Patil la spocbe te sbiquil soc schebal ya', la schic' ta scajtajib ta sba te scohtol chic'bil mahtanile.

¹⁵ Soc te Aarón la yac' te mahtanil yu'un te pueblo; la stsac te tat tentsun, te ha mahtanil yu'un smul te pueblo, la smil, la yac' scuenta stojel mulil hich te bin ut'il te shahchibal mahtanil.

¹⁶ La yac' te scohtol chic'bil mahtanil hich te bin ut'il ay ta pasele.

¹⁷ Soc la yac' te mahtanil harina, la sjohp johp ta sc'ab, la schic' ta scajtajib ta chiq'uel mahtanil soc te scohtol chic'bil mahtaniletic scuenta sacubel q'uinal.

¹⁸ Soc la smil te toro soc te tat tuminchij te la yaq'uic te pueblo yu'un milbil mahtanil scuenta lamal q'uinal. Te snich'nab Aarón la ya'beyic te ch'ich', te Aarón la stsihtsin ta sjoyobal ta sba te scajtajib ta chiq'uel mahtanil.

¹⁹ Soc la ya'beyic te sjuhp'el te toro soc sjuhp'el te tuminchij, te sne, te sjuhp'el macal a te sbiquil, te riñonetic soc te sjuhp'el ay ta sehcub,

²⁰ soc la ya'beyic te sjuhp'el ta sba ta schebal stahn. Hich la schic' ta scajtajib ta chiq'uel mahtanil,

²¹ pero ta schebal stahn soc te swa'el ya' la stuchilan te Aarón scuenta tuchilambil mahtanil ta stojol Jehová, hich te bin ut'il halbot te Moisés.

²² Patil te Aarón la stoy sc'ab ta stojol te pueblo, la ya'be bendición. Te c'alal laj yac'bel a te mahtanil yu'un mulil, te scohtol chic'bil mahtanil soc te milbil mahtanil scuenta lamal q'uinal, co tal te Aarón.

²³ Te Moisés soc Aarón ochic bahel ta Nahilpac' Templo yu'un tahojibal. C'alal loq'uic tal, la ya'beyic bendición te pueblo; hich chicnaj te yutsilal Jehová ta stojol te pueblo.

²⁴ Loc' tal c'ahc' ta stojol Jehová, la slajin te scohtol chic'bil mahtanil soc te sjuhp'el ayic ta scajtajib ta chiq'uel mahtanil. C'alal hich la yilic spisil te pueblo, awonic soc la squejan sbahic ta lum.