Levítico 17 - Bible in Tzeltal Bachajón

Junax ch'ul awilal

¹ Te Jehová la yalbe te Moisés:

² Halbeya te Aarón soc snich'nab, soc spisil te snich'nab Israel: Hich ay te bin yaloj ta mandar te Jehová:

³ Mach'ayuc winiquil ta Israel te ya smil scuenta milbil mahtanil jcoht toro, jcolel tuminchij o tentsun ta campamento o ta fuera yu'un te campamento,

⁴ teme ma ba ya yic' tal ta yochibal te Nahilpac' Templo yu'un tahojibal scuenta ya'beyel smahtan Jehová ta stojol te nahilpac' yu'un Jehová, la sta smul te winic yu'un te la smal ch'ich'. Ya me yich' loq'uesel ta yohlil te slumal,

⁵ scuenta yu'un te snich'nab Israel ya me yiq'uic tal ta stojol Jehová te milbil mahtaniletic te yac yac'belic ta yohl q'uinal, ha ya ya'beyic te sacerdote ta yochibal te Nahilpac' Templo yu'un tahojibal, hich ya ya'beyic smahtanin Jehová te milbil mahtanil yu'un lamal q'uinal.

⁶ Te sacerdote ya stsihtsin te ch'ich' ta sba te scajtajib ta chiq'uel mahtanil yu'un Jehová te ay ta stojol yochibal te Nahilpac' Templo yu'un tahojibal, soc ya schic'be te sjuhp'el scuenta sumet yic' ta stojol Jehová.

⁷ Ma ba ya ya'beyiquix xan milbil smahtan te pucujetic te la yac' sbahic ta antsinel yu'un c'ohem. Ha mandaril ini te ma xlaj sc'oblal ta spisil sts'umbalic, xchihan me.

⁸ Soc hich yac awalbe xan: Mach'ayuc winiquil ta Israel o jyanlum te nahinem ta awohlilic te ya yac' scohtol chic'bil mahtanil o milbil mahtanil,

⁹ teme ma ba ya yich' tal ta yochibal te Nahilpac' Templo yu'un tahojibal yu'un ya ya'be te Jehová, ya me yich' loq'uesel ta yohlil te pueblo yu'une.

Comel ta swe'el ch'ich'

¹⁰ Mach'ayuc winiquil ta sna Israel o jyanlum te nahinem ta awohlilic te ya swe' ch'ich', ma lecuc co'tan yu'un te mach'a ya swe' ch'ich, ya me jloq'ues ta yohlil te slumale.

¹¹ Como ay ta ch'ich' te scuxlejal, soc ho'on la jca'beyex te ch'ich' scuenta stojel mulil awu'unic ta scajtajib ta chiq'uel mahtanil; ha nix te ch'ich' te ya stojbe smul.

¹² Ha scuentahil te la jcalbe te snich'nab Israel: Ma me ayuc jtuhluc ta awohlilic te ya swe' ch'ich', ni ha'uc te jyanlum nahinem ta awohlilic te ya swe' ch'ich'.

¹³ Mach'ayuc winiquil ta Israel o jyanlum nahinem ta awohlilic te ya snuts chambahlam o mut te lec ta we'ele, ya me smalbe sch'ich'el soc ya smucbe ta lum,

¹⁴ como ay ta ch'ich' te scuxlejale. Ha scuentahil te la jcalbe te snich'nab Israel: Ma me xawe'beyic sch'ich'el biluc a te cuxule, como ay ta ch'ich' te scuxlejale. Mach'ayuc a te ya swe', ya me yich' loq'uesel bahel.

¹⁵ Mach'ayuc a, teme ha nix slumal o jyanlum, teme ya swe'be sbaq'uetal chamen chambahlam o te ixtalambil yu'un ti'awal chambahlam, ya me sac' sc'u' spac' soc ya me x'atin, bohloben sc'oblal ya xhil c'alal ta yihc'ubel q'uinal; patil lec sc'oblal ya xhil.

¹⁶ Pero teme ma ba ya sac' sc'u' spac' soc ma ba ya x'atin, scuchoj ya xhil te smule, xchi te Jehová.