Levítico 15 - Bible in Tzeltal Bachajón

Bin ya xbohlob sc'oblal sbaq'uetal yu'un

¹ Te Jehová la yalbe te Moisés soc Aarón:

² Halbeyahic te snich'nab Israel: Teme ay winic te ya xmal loq'uel snich'an, bohloben sc'oblal ya xhil yu'un.

³ Ha bohloben sc'oblal yu'un te bin ya xmal loq'uel: chican teme stuquel nax ya xmal loq'uel o teme ya xmahc te bin ya xmal loq'uele, bohloben sc'oblal ya xhil yu'un.

⁴ Bayuc banti ya xway te mach'a ay bin ya xmal yu'une, bohloben sc'oblal ya xhil; soc bayuc a te banti ya xhuhcaj, bohloben sc'oblal ya xhil yu'un.

⁵ Mach'ayuc a te ya spicbe swayib ya me sac' sc'u' spac' soc ya me x'atin; bohloben sc'oblal ya xhil c'alal yihc'ubel q'uinal.

⁶ Mach'ayuc a te ya xhuhcaj ta banti huhcaj te mach'a ay bin ya xmal yu'une, ya me sac' sc'u' spac' soc ya me x'atin; bohloben sc'oblal ya xhil c'alal yihc'ubel q'uinal.

⁷ Ha nix hich te mach'a ya spicbe sbaq'uetal te mach'a ay bin ya xmal yu'une, ya me sac' sc'u' spac' soc ya me x'atin; bohloben sc'oblal ya xhil c'alal yihc'ubel q'uinal.

⁸ Te mach'a ay bin ya xmal yu'une, teme ay ya stuhbatay mach'a lec sc'oblale, te mach'a tuhbatayot ya me sac' sc'u' spac' soc ya me x'atin; bohloben sc'oblal ya xhil yu'un c'alal yihc'ubel q'uinal.

⁹ Bayuc montura ya xmo a te mach'a ay bin ya xmal yu'une, bohloben sc'oblal ya xhil yu'un.

¹⁰ Mach'ayuc a ya spic te biluc te banti huhcaj o way te mach'a ay bin ya xmal yu'une, bohloben sc'oblal ya xhil c'alal yihc'ubel q'uinal. Te mach'a ya yich' bahel te biluque, ya me sac' sc'u' spac' soc ya me x'atin; bohloben sc'oblal ya xhil c'alal yihc'ubel q'uinal.

¹¹ Teme ay mach'a ya xpicot yu'un te mach'a ay bin ya xmal yu'une, teme ma ba la spoc sc'ab, ya me sac' sc'u' spac' soc ya me x'atin, bohloben sc'oblal ya xhil c'alal yihc'ubel q'uinal.

¹² Te pac'bil oxom te ya spic te mach'a ay bin ya xmal yu'une, ya me yich' wuyel, soc biluc pasbil ta te' ya me yich' poquel ta ha'.

¹³ C'alal ya xlecub te mach'a ay bin ya xmal yu'une, ya me yahtay huqueb c'ahc'al yu'un slecubtesel, ya sac' sc'u' spac' soc ya x'atin ta ya'lel sloq'uib-ha', hich ya xlecub sc'oblal.

¹⁴ Ta swaxaquebal c'ahc'al ya me stsac tal cheb xpuliwoc o cheb jcolel stsuhmut, ya xtal ta stojol Jehová ta yochibal Nahilpac' Templo yu'un tahojibal, ya ya'be te sacerdote,

¹⁵ te ha ya yac' jcoht scuenta mahtanil yu'un mulil soc jcoht scuenta scohtol chic'bil mahtanil. Te sacerdote hich ya spasbe te bin ya stoj mulil yu'un ta stojol Jehová te mach'a ay bin mal yu'une.

¹⁶ Teme ay winic te ya xmal loq'uel snich'an, ya me x'atin scohtol, soc bohloben sc'oblal ya xhil c'alal yihc'ubel q'uinal.

¹⁷ Biluc c'u'ulil o nuhcul te banti c'oht te snich'an ya me yich' saq'uel ta ha', soc bohloben sc'oblal ya xhil c'alal yihc'ubel q'uinal.

¹⁸ Te c'alal ya sjoquin sbahic ta wayel te winic soc ants, teme loc' te snich'an, ya me x'atinic, bohloben sc'oblal ya xhilic c'alal yihc'ubel q'uinal.

¹⁹ Te c'alal ya yil schamel scuenta jujun u te antse, bohloben sc'oblal ya xhil huqueb c'ahc'al yu'un; mach'ayuc a te ya xpicot yu'un, bohloben sc'oblal ya xhil c'alal yihc'ubel q'uinal.

²⁰ Biluc a te ya xway a te c'alal yac yilbel schamel, bohloben sc'oblal ya xhil yu'un; soc biluc a te ya xhuhcaj a, bohloben sc'oblal ya xhil yu'un.

²¹ Mach'ayuc a te ya spicbe swayib ya me sac' te sc'u' spac' soc ya me x'atin, bohloben sc'oblal ya xhil c'alal yihc'ubel q'uinal.

²² Soc mach'ayuc a te ya spic te biluc huhcaj a te antse, ya me sac' sc'u' spac' soc ya me x'atin, bohloben sc'oblal ya xhil c'alal yihc'ubel q'uinal.

²³ Teme ha ya spic te banti mehtsaj o te banti huhcaj, te mach'a la spic bohloben sc'oblal ya xhil c'alal yihc'ubel q'uinal.

²⁴ Teme ay winic ya xway soc, teme tahot yu'un te sch'ich'ele, huqueb c'ahc'al bohloben sc'oblal ya xhil yu'un; soc bohloben sc'oblal ya xhil spisil wayibal te banti ya xwaye.

²⁵ Teme ay ants ya xc'ax sch'ich'el te ma yorahiluc a te schamel scuenta jujun u, o teme c'ax hich ya xhalaj a te bin ut'il stalel aye, bohloben sc'oblal ya xhil te jayeb c'ahc'al ay te sch'ich'ele, hich nix te bin ut'il c'alal ya yil schamel.

²⁶ Bayuc ya xway te c'alal yac yilbel a te schamel, hich ya xc'oht te bin ut'il te swayib te c'alal ay a te schamele; soc bayuc a te ya xhuhcaj bohloben sc'oblal ya xhil, hich te bin ut'il c'alal ya yil schamel.

²⁷ Mach'ayuc a te ya spic te biluquetic ini, bohloben sc'oblal ya xhil yu'un, ya me sac' sc'u' spac' soc ya me x'atin, bohloben sc'oblal ya xhil c'alal yihc'ubel q'uinal.

²⁸ Te c'alal ya xquehchaj te sch'ich'ele, ya me yahtay huqueb c'ahc'al, ha to lec sc'oblal ya xhil a.

²⁹ Ta swaxaquebal c'ahc'al ya me stsac tal cheb xpuliwoc o cheb jcolel stsuhmut, ya yich' bahel ta stojol sacerdote ta yochibal Nahilpac' Templo yu'un tahojibal.

³⁰ Te sacerdote ya yac' jcoht scuenta milbil mahtanil yu'un mulil soc jcoht scuenta scohtol chic'bil mahtanil. Te sacerdote hich ya spasbe te bin ya stoj mulil yu'un ta stojol Jehová te ants te c'ax yu'un te schamele.

³¹ Hich parte yac awaq'uic a te snich'nab Israel yu'un te bin bohloben sc'oblal yu'une, scuenta yu'un ma ba ya xchamic yu'un te bin bohloben sc'oblal te ya sbohlobtesbe sc'oblal a te nahilpac' cu'un te ay ta yohlilique, xchi te Jehová.

³² Hich ay te mandaril yu'un te mach'a ay bin ya xmal loq'uel yu'un, soc te winic te ya xmal loq'uel snich'an, te bohloben sc'oblal ya xhil yu'une;

³³ soc te ants te ay swocol yu'un te schamel, mach'ayuc a te ay bin ya xmal loq'uel yu'un, teme winic o ants, soc te winic te ya xway soc ants te bohloben sc'oblale.