Jueces 6 - Bible in Tzeltal Bachajón

Yiq'uel Gedeón

¹ Te snich'nab Israel la spasic te bin chopol ta stojol Jehová. Ha yu'un te Jehová la ya'be ta sc'ab Madián huqueb ha'bil.

² Te bin ut'il behbe tohyel swocolic yu'un Madián, te snich'nab Israel la spasic banti la snac' sbahic ta witsiltic, ch'entiquil soc ahnibaletic ta scaj te la xi'ic te madianetique.

³ Teme ay bin ts'umbil yu'un Israel, mohic tal ta contrahinel yu'un te madianetic, amalequetic soc te mach'atic talemic ta stojol banti ya xloc' tal c'ahc'al.

⁴ La spas scampamentohic ta stojol te israeletic soc la slajimbeyic sit sts'unub-yawalic c'alal ta Gaza. Mayuc we'elil hil yu'unic ta Israel, o tuminchijetic, wacaxetic o burrohetic.

⁵ Talic soc snahilpaq'uic soc schansbahlamic hich te bin ut'il c'ax bayel c'ulubetic. Ma ba hu' ta ahtayel soc scamellohic; ha talic yu'un ya sjinic te q'uinale.

⁶ Hich mero pobre c'ohtic te Israel ta scuenta Madián. Hich te snich'nab Israel awonic ta stojol Jehová.

⁷ C'alal awonic ta stojol Jehová te snich'nab Israel ta scaj te madianetic,

⁸ te Jehová la sticombe jtuhl jalwanej te hich c'oht yalbe: Hich yaloj te Jehová te Dios yu'un Israel: Ho'on la jloq'uesex tal ta Egipto soc la jloq'uesex tal ta mosohil.

⁹ La jcoltayex loq'uel ta sc'ab te egipciohetic soc ta sc'ab spisil mach'atic la yuts'inex, ha la jtenticlan loq'uel ta atojolic soc la jca'beyex te sq'uinalique.

¹⁰ Soc hich la jcalbeyex: Ho'on Jehovahon te Dioson awu'unic; ma me xawich'ic ta muc' te diosetic yu'un te amorreohetic te banti nahinemexix ta sq'uinalique, xchihon. Pero ma ba la ach'uhumbonic te jc'ope, xchi.

¹¹ Hich te ch'ul a'bat yu'un Jehová tal shuhcan sba ta ye'tal jihte' te ay ta Ofra, te ha yu'un Joás te abiezer-winic. Te Gedeón, ha te snich'an, yac ta smajel trigo ta sp'e'ojibal ts'usub scuenta yu'un ya snac' sba ta stojol te madianetique.

¹² Te ch'ul a'bat yu'un Jehová la yac' sba ta ilel ta stojol, hich la yalbe: Sjoquinejat te Jehová, ha'at te tulan winicat soc te ay yip awo'tan, xchi.

¹³ La sjac' te Gedeón: Ay, cajwal, teme sjoquinejotcotic te Jehová, ¿bin yu'un te hich yac ta c'ohel ta pasel ta jtojolcotic spisil ini? ¿Banti ay spisil te jchahp a'teliletic te la yalbotcotic sc'oblal te jme'jtatcotic, te hich la yalic: Ha la sloq'uesotic tal ta Egipto te Jehová, te xchihique? Pero te Jehová la yihquitayotiquix hilel soc la yac'otiquix ta sc'ab te madianetique, xchi.

¹⁴ Te Jehová la yilbe sit, hich la yalbe: Bahan soc te awipe, coltaya te Israel ta sc'ab te madianetique. ¿Ma bal ho'ucon ya jticonat bahel? xchi.

¹⁵ La sjac' xan te Gedeón: Ay, cajwal, ¿bin ut'il ya xhu' ya jcoltay Israel te ho'one? Melel te mach'atic ay cu'un c'ax hich pobre a te bin ut'il te yantic ta Manasés, soc te ho'one mero xuton yu'un te mach'atic ayic ta sna te jtat, xchi.

¹⁶ Te Jehová la yalbe: Ho'on ya joquinat ta mero melel, ya me atsal te madianetic hich te bin ut'il jtuhl winic, xchi sc'oblal.

¹⁷ Hich la sjac' te Gedeón: Teme lecon ta atojol, awocoluc a'bon seña quil teme melel ha'at te yac ajucbelon ta c'op.

¹⁸ Awocoluc a, ma to me xbahat ha to teme ya suhton tal soc ya ca'bat ta atojol te mahtanil cu'un, xchi. Ya jmahliyat te ya suhtat tal, xchi te Jehová.

¹⁹ Hich te Gedeón baht schahpan tal jcoht tut tentsun soc panetic te ma ba yich'oj levadura te pasbilic ta jun efa yu'un harina, la yac' ta moch te ti'bal soc la yac' ta oxom te ya'lele, la yich' bahel, la ya'be ta ye'tal te jihte'.

²⁰ Te ch'ul a'bat yu'un Dios hich la yalbe: Ich'a te ti'bal soc te panetic ma ba yich'ojic levadura, ac'a ta sba te muc'ul ton ini, soc mala tey a te ya'lel, xchi. Hich la spas te Gedeón.

²¹ Te ch'ul a'bat yu'un Jehová la shach te snahbate' ay ta sc'ab, la stij a te ti'bal soc te panetic ma ba yich'oj levadura, hich loc' tal c'ahc' ta ton te la schic' te ti'bal soc te pane. Hich ch'ay ta sit te ch'ul a'bat yu'un te Jehová.

²² C'alal la sna' te Gedeón te ha ch'ul a'bat yu'un Jehová, hich la yal: Ay, Cajwal Jehová, la jquilbe jba sit soc te ch'ul a'bat yu'un Jehová, xchi.

²³ Pero te Jehová la yalbe: Lamaluc me q'uinal xawa'iy. Ma me xiwat, ma ba ya xchamat, xchi.

²⁴ Te Gedeón la spasbe scajtajib ta chiq'uel mahtanil yu'un Jehová tey a, soc la ya'be sbihilin Jehová-salom. Te scajtajib ta chiq'uel mahtanil tey ay a ta Ofra yu'un te abiezeretic c'alal ora.

²⁵ Ta ahc'abal nix Jehová hich la yalbe: Ic'a bahel te jcoht toro yu'un te atat, ha te schebal toro te huqueb ya'bilal, soc jina cohel te scajtajib ta chiq'uel mahtanil yu'un Baal, te ha yu'un te atate; soc ts'eta te sloc'omba Asera te tey nopol ay a.

²⁶ Pasa scajtajib ta chiq'uel mahtanil yu'un Jehová te Dios awu'un ta sba te ahnibal ini. Ic'a tal te schebal toro, a'beya scuenta scohtol chic'bil mahtanil, tuhuna scuenta si' te ste'el te sloc'ombahil Asera te yac ats'et, xchi.

²⁷ Ha yu'un te Gedeón la yic' bahel lajuntuhl a'batetic yu'un, baht spas te bin halbot yu'un Jehová. Pero la spas ta ahc'abal, yu'un la xi' te ya spas ta c'ahc'alel ta scaj te mach'atic ay yu'un te stat soc te winiquetic yu'un te pueblo.

²⁸ Ta sab, te c'alal hahchic te mach'atic ayic ta pueblo, jimbilix a te scajtajib ta chiq'uel mahtanil yu'un Baal soc ts'etbilix a te sloc'omba Asera te nopol ay tey a, soc ac'bilix a scuenta scohtol chic'bil mahtanil te schebal toro ta sba te scajtajib ta chiq'uel mahtanil te pasbilixe.

²⁹ Jujutuhl la sjoc'obe sbahic: ¿Mach'a la spas ini? xchihic. Te c'alal la sjoc'oyic ta lec, hich halbotic: Ha la spas te Gedeón snich'an Joás, xchihic. Ha yu'un te winiquetic yu'un te pueblo hich la yalbeyic te Joás:

³⁰ Loq'uesa tal te anich'an yu'un ya jmilcotic, como la sjimbe te scajtajib ta chiq'uel mahtanil yu'un Baal soc la sts'et te sloc'omba Asera te nopol ay tey a, xchihic.

³¹ Pero te Joás hich la sjac'be sc'op spisil mach'atic tey ayic a: ¿Ya bal xc'opojex ta scuenta te Baal? ¿Ya bal acoltayic? Mach'ayuc a te ya xc'opoj yu'un te Baal, ac'a lajuc yo'tic ta sacubel q'uinal. Teme melel ha dios te Baal, ac'a scoltay sba stuquel ta stojol te mach'a jimbot te scajtajib ta chiq'uel mahtanil yu'une, xchi.

³² Ha yu'un ta hich ora te Gedeón a'bot sbihilin Jerobaal, ha: Ac'a scoltay sba Baal ta stojol scontra, xchi c'ohem, yu'un la sjimbe te scajtajib ta chiq'uel mahtanil yu'une.

³³ Spisil te madianetic, amalequetic soc te mach'atic talemic ta stojol banti ya xloc' tal c'ahc'al, junax la stsob sbahic, sohlic tal ta muc'ul-ha' Jordán, la spas scampamentohic ta spamlej yu'un Jezreel.

³⁴ Te Gedeón u'untayot yu'un te espíritu yu'un Jehová. C'alal la yoq'uesin te xulubil, tal ta joquinel yu'un te abiezeretic.

³⁵ La sticon bahel jal-c'opetic ta spahmal Manasés, ha nix hich junax tal yac' sbahic soc. Soc la sticon bahel winiquetic ta Aser, ta Zabulón soc ta Neftalí; hich loq'uic tal stahic.

³⁶ Te Gedeón hich la yalbe te Diose: Teme melel te yac acoltay Israel ta jcuenta, hich te bin ut'il la awal,

³⁷ ilawil, ya cac' stsotsel tuminchij ta swuyojibal trigo; teme ha nax ay ts'ujul ta stsotsel, teme taquin te lum ta sjoyobal, tey ya jna' a te yac acoltay te Israel ta jcuenta, hich te bin ut'il la awale, xchi.

³⁸ Hich c'oht ta pasel; c'alal hahch ta sab, la spits'be ya'lel te stsotsel tuminchij, noj jun taza yu'un te ya'lele.

³⁹ Pero te Gedeón la yalbe te Diose: Ma me xtihl awilimba ta jtojol teme ya jc'oponat xan: ya jpas jun xan prueba quil soc te stsotsel tuminchij. Awocoluc, taquin ac'a hiluc te stsotsel, ac'a cohuc ta lum te ts'ujule, xchi.

⁴⁰ Hich la spas te Dios ta ahc'abal nix; taquin hil te stsotsel soc ay ts'ujul ta spisil te lume.