Jueces 3 - Bible in Tzeltal Bachajón

Nacionetic te ihquitayotic hilel scuenta prueba yu'un Israel

¹ Hich ay te nacionetic te la yihquitay hilel Jehová scuenta yu'un ya spas ta prueba spisil te mach'atic ayic ta Israel te ma ba la yilic guerra ta Canaán;

² ha nax la yihquitay hilel yu'un ya snopic yaq'uel guerra te cajalcaj snich'nab Israel, te ya ya'be snopic mach'atic ma to sna'ic:

³ ha te ho'tuhl príncipaletic yu'un te filisteohetic, spisil te cananeo, sidón, soc te heveo te nahinemic ta wits Líbano, c'alal ta wits Baal-hermón ha to ya xc'oht ta Hamat.

⁴ Ha ta scuentahic te la spas ta prueba te Israel, yu'un tey ya sna' a teme ya sch'uhunic spasel te mandariletic yu'un Jehová te la ya'be te sme'static ta scuenta Moisés.

⁵ Hich te snich'nab Israel hahch sjoquin sbahic ta nahinel soc te cananeo, heteo, amorreo, ferezeo, heveo soc te jebuseo.

⁶ La yic'beyic te yantsil-nich'nabic soc la ya'be yic' yantsil-nich'nabic te queremetic yu'unic, soc la yac' sbahic ta a'batinel yu'un te diosetic yu'unique.

Otoniel la scoltay Israel ta sc'ab Cusan-risataim

⁷ Te snich'nab Israel la spasic te bin chopol ta stojol Jehová te Dios yu'unic, ha la sch'ay ta yo'tanic te Jehová te Dios yu'unic soc la yac' sbahic ta a'batinel yu'un te baaletic soc te loc'ombahetic yu'un Asera.

⁸ Ha scuentahil te tihl yilimba Jehová ta stojolic, la ya'be ta sc'ab Cusan-risataim ajwalil yu'un Mesopotamia. Waxaqueb ha'bil la yac' sbahic ta a'batinel yu'un.

⁹ Ha yu'un te snich'nab Israel awonic ta stojol Jehová, hich la slehbe jtuhl jcoltaywanej yu'un te snich'nab Israel te la scoltay, ha te Otoniel snich'an Cenaz, te yihts'in Caleb.

¹⁰ Te Otoniel u'untayot yu'un te espíritu yu'un Jehová, ha juez c'oht yu'un Israel soc loc' bahel ta guerra. Te Jehová la ya'be ta sc'ab Otoniel te Cusan-risataim ajwalil yu'un Siria, la ya'be stsal te Cusan-risataim.

¹¹ Hich ay lamal q'uinal cha'winic (40) ha'bil, ha to c'alal cham te Otoniel snich'an Cenaz.

Aod la scoltay Israel ta sc'ab Moab

¹² Te snich'nab Israel cha'hahchic xan ta spasel te bin chopol ta stojol Jehová. Ha yu'un te Jehová la ya'be yip te Eglón ajwalil yu'un Moab ta scontrahinel te Israel, ta scaj te spasojic te bin chopol ta stojol Jehová.

¹³ Te ajwalil yu'un Moab la stsob tal sjoquin te snich'nab Amón soc Amalec, hich tal ya'beyic guerra te Israel, la yich'ic te pueblo yu'un xahnetic.

¹⁴ Ha yu'un te snich'nab Israel waxaclajuneb (18) ha'bil la yac' sbahic ta a'batinel yu'un Eglón ajwalil yu'un te moabetique.

¹⁵ Te snich'nab Israel awonic ta stojol Jehová; hich la slehbe jcoltaywanej yu'unic, ha te Aod snich'an Gera, sts'umbal Benjamín, ha q'uexam-c'ab winic. Te snich'nab Israel ay la ya'beyic yich' bahel patanil ta stojol Eglón ajwalil yu'un Moab.

¹⁶ Pero te Aod spasojix espada te scha'bunjehchel ay ye soc jun xuhc'ubil snahtil; la schuc ta swa'el-cub ta yutil sc'u'.

¹⁷ La ya'be te patanil te Eglón ajwalil yu'un Moab, te buen juhp'en winic.

¹⁸ Te c'alal ya'beyejix a te patanil, te Aod la sticonlan bahel te mach'atic sjoquinejic.

¹⁹ Pero te c'alal c'oht ta banti ay te loc'ombahetic ta nopol Gilgal, suht tal stuquel te Aod, hich la yalbe te Eglón: Ajwalil, ay c'op te muquen ay te ya calbat, xchi. Ha yu'un te ajwalil la yal: Ch'abanic me, xchi. Hich loq'uic bahel spisil mach'atic tey ayic a.

²⁰ Te c'alal stuquel hucul ta stsalul sna yu'un q'uixin q'uinal, nohpoj te Aod, hich la yalbe: La jquich'bat tal c'op yu'un Dios, xchi. Hich te Eglón hahch ta shuctajib.

²¹ Te Aod la yac' bahel te sq'uexam-c'ab, la stsac te espada te ay ta swa'el, la slowbe sch'uht a.

²² Sch'ixil och bahel soc yoc, te sjuhp'el te Eglón la smuc te espada. Te Aod ma ba la sloq'uesbe te espada ta sch'uht, hich loc' stsa'.

²³ Te Aod loc' bahel ta corredor, la smac hilel te spuertahul te stsalul na soc la ya'be seguro.

²⁴ C'alal loq'uemix bahel a, talic te a'batetic yu'un te ajwalil; te c'alal la yilic te macajtic te puertahetic, hich la yalic: Yac wan ta tsa'nel ta stsalul sna, xchihic yu'un.

²⁵ Hich halajic ta smahliyel, ma la sna' bin ya yutic como te ajwalil ma ba la sjam te puertahetic yu'un te stsalul snahe. Ha yu'un la yich'ic tal te llave, la sjamic, la yilic te xach'al ta lum te yajwalic, lajemix a.

²⁶ C'alal yacalic ta smahliyel a, loc' bahel ta ahnel te Aod, c'ax bahel ta banti ay te loc'ombahetic, baht ta ahnel ta Seirat.

²⁷ C'alal c'oht ta sq'uinal Israel la yoq'uesin xulubil ta witsiltic yu'un Efraín, hich te snich'nab Israel cohic bahel ta wits soc Aod, ha nahilij bahel yu'unic.

²⁸ Hich halbotic yu'un: T'unawonic, como te Jehová la ya'beyexix ta ac'abic te moabetic, te acontrahique, xchi. Hich la st'unic bahel. La yich'beyic te Moab te lugar banti ya xhu' ta teq'uel te muc'ul-ha' Jordán, mayuc mach'a la yaq'uic sohlel.

²⁹ Ha yorahil a te la smilic ay wan jpic soc ho'bahc' (10,000) ta tuhl moabetic, spisil ay yip yo'tanic soc ha winiquetic yu'un guerra; mayuc jtuhluc loc' ta ahnel.

³⁰ Hich stsalotic yu'un Israel te Moab ta hich ora. Ay chanwinic (80) ha'bil te lamal te q'uinale.

Samgar la scoltay Israel ta sc'ab filisteohetic

³¹ Patil tal te Samgar snich'an Anat, ha te mach'a la smil j'ohlil scha'bahc' (600) filisteohetic ta stijojbil j'a'tel-wacaxetic. Ha nix hich la scoltay te Israel.