Jueces 21 - Bible in Tzeltal Bachajón

Slehel antsetic yu'un sts'umbal Benjamín

¹ Te winiquetic yu'un Israel hich yalojiquix ta jamal ta Mizpa: Ho'otic mayuc mach'a ya cac'tic nuhpunuc soc cantsil-nich'nabtic te snich'nab Benjamín, xchihic.

² Te pueblo tal stsob sbahic ta Bet-el, tey halajic ta stojol Dios a ha to c'alal ihc'ub q'uinal, tulan la yoq'uetay sbahic, hich la yalic:

³ Jehová, Dios yu'un Israel, ¿bin yu'un te hich c'oht ta pasel ta Israel, te ch'ayix jchahp yu'un Israel? xchihic.

⁴ Ta schebal c'ahc'al hahchic ta sab te pueblo; la spasic scajtajib ta chiq'uel mahtanil tey a soc la yaq'uic scohtol chic'bil mahtaniletic soc mahtaniletic scuenta lamal q'uinal.

⁵ Hich la sjoc'oyic: Ta spisil te jchahpalchahp Israel ¿mach'atic a te ma ba c'ohtic ta tsoblej ta stojol Jehová? xchihic. Yu'un jc'axel yalojiquix ta jamal te mach'a ma ba ya xc'oht ta stojol Jehová ta Mizpa, ya me xlaj.

⁶ Te snich'nab Israel bayel la smel yo'tanic yu'un te Benjamín te yermanohic, hich la yalic: Yo'tic ch'ayix jchahp yu'un Israel.

⁷ ¿Bin ya cutic ya sta yihnamic te mach'atic cuxul hilique? Te ho'otic calojtic ta jamal ta stojol Jehová te ma ba ya ca'betic ya xnuhpunic soc te cantsil-nich'nabtic, xchihic.

⁸ Soc hich la sjoc'oyic: ¿Ay bal jchahp yu'un Israel te ma ba c'oht ta stojol Jehová ta Mizpa? xchihic. Chicnaj te mayuc jtuhluc yu'un te Jabes-galaad te talem ta campamento yu'un te tsoblej.

⁹ Yu'un la yich' ahtayel te pueblo, mayuc jtuhluc tey a te talemic ta Jabes-galaad.

¹⁰ Ha yu'un te pueblo la sticonic bahel tey a j'ohlil scha'pic (12,000) winiquetic te ay yip yo'tanic, hich la spasic ta mandar: Bahanic, milahic ta espada te mach'atic nahinemic ta Jabes-galaad, soc antsetic soc alaletic.

¹¹ Pero hich me yac apasic: ya me amilic spisil winiquetic soc spisil antsetic te ma ach'ixuquix, xchihic.

¹² Ta yohlil te mach'atic nahinemic ta Jabes-galaad la stahic jbahc' (400) ta tuhl ach'ixetic te ma to tabiluc ta winic. La yiq'uic tal ta campamento ta Silo te ay ta sq'uinal Canaán.

¹³ Spisil te pueblo la sticonic bahel c'op ta stojol te snich'nab Benjamín te ayic ta muc'ul ton yu'un Rimón, la yalbeyic te lamalix q'uinal yu'unic.

¹⁴ Hich te snich'nab Benjamín suhtic tal; la ya'beyic yihnamin te ach'ixetic te la yiq'uic tal ta Jabes-galaad. Pero ma ba ts'acayic a te ach'ixetique.

¹⁵ Te pueblo la sna'beyic yo'bolil sba te Benjamín, como te Jehová la yac' te sjatoj sbahic te schahpal Israel.

¹⁶ Ha yu'un te mamaletic yu'un te pueblo hich la yalic: ¿Bin ya cutic te ya sta yihnamic te yantique? xchihic. Como lajemiquix te antsetic yu'un Benjamín.

¹⁷ Hich la yalic: Ya sc'an te ay sts'umbal Benjamín ta scuenta te mach'atic cuxul hilic, scuenta yu'un ma ba ya xch'ay jchahpuc yu'un Israel.

¹⁸ Pero te ho'otic ma xhu' ya ca'betic te cantsil-nich'nabtic, como hich calojtic ta jamal: Bohlobuc me sc'oblal te mach'a ya ya'be yihnam te snich'nab Benjamín, xchihic.

¹⁹ Soc la yalic xan: Ilawil, ta jujun ha'bil ay q'uin yu'un Jehová ta Silo, te ay ta stojol norte yu'un Bet-el soc ta stojol banti ya xloc' tal c'ahc'al yu'un te be ya xhahch ta Bet-el ya xbaht ta Siquem, soc ta stojol sur yu'un Lebona, xchihic.

²⁰ Ha yu'un la sticombeyic bahel c'op te snich'nab Benjamín, hich la yalic: Bahanic, nac'a abahic ta ts'usubiletic,

²¹ wihq'uiluc me asitic. Te c'alal ya xloq'uic tal ta ahc'ot te ach'ixetic yu'un Silo, loc'anic tal ta ts'usubiletic, jujutuhl tsacahic ach'ix yu'un awihnamic ta yohlil te ach'ixetic yu'un Silo, bahanic soc ta sq'uinal Benjamín.

²² Teme ya xtal sc'oponotcotic te static o sbanquiltac te ach'ixetic, ya calbecotic: Awocoluc, a'botcotic te ach'ixetic, yu'un ma ba la jtahbecotic yihnamic spisil te winiquetic te c'alal ay guerra. Soc ma ha'uquex te la awa'beyic, hich mayuc amulic ya xc'oht, xchihotcotic.

²³ Hich la spasic te snich'nab Benjamín, jujutuhl la yelc'anic bahel yihnam ta yohlil te ach'ixetic te yaquic ta ahc'ot. Patil suhtic bahel ta sq'uinalic, la scha'pasic xan te pueblohetic yu'unic, tey nahinic a.

²⁴ Ha nix hich suhtic bahel tey a te snich'nab Israel, jujutuhl ta banti chahpalchahp yu'unic soc ta stojol te mach'atic ay yu'unic, jujutuhl bahtic ta sq'uinalic.

²⁵ Ta hich ora mayuc ajwalil ta Israel, jujutuhl la spasic te bin la sc'an yo'tanic.