Jueces 1 - Bible in Tzeltal Bachajón

Judá soc Simeón la stsaquic Adoni-bezec

¹ C'alal chamix a te Josué, te snich'nab Israel la sjoc'obeyic te Jehová: ¿Mach'a a te nahil ya xbaht cu'uncotic ta ya'beyel guerra te cananeohetic? xchihic.

² Hich la sjac' te Jehová: Ha ya xbaht te Judá; ho'on la jca'beyic ta sc'ab te q'uinale, xchi.

³ Te Judá hich la yalbe te yermano, ha te Simeón: Joquinawon bahel ta q'uinal te a'botonix ta jcuenta, yu'un ya ca'betic guerra te cananeohetique; soc ha nix hich ya joquinat bahel ta q'uinal awu'un, xchi. Hich te Simeón la sjoquin bahel.

⁴ Baht te Judá, te Jehová la ya'be ta sc'abic te cananeo soc te ferezeo; la smilic jpic soc ho'bahc' (10,000) ta tuhl ta Bezec.

⁵ La stahic te Adoni-bezec ta Bezec, la ya'beyic guerra soc la stsalic te cananeo soc te ferezeo.

⁶ Loc' ta ahnel te Adoni-bezec, pero la snutsic bahel, la stsaquic, la set'beyic loq'uel te sme' sc'abic soc te sme' yoquic.

⁷ Hich la yal te Adoni-bezec: Lajuneb schanwinic (70) ta tuhl ajwaliletic te loq'uemic sme' sc'abic soc sme' yoquic la stamticlanic xeht'elul we'elil ta ye'tal te mesa cu'un. Hich te bin ut'il la jpas, hich nix la ya'bon jtoj te Diose, xchi. La yiq'uic bahel ta Jerusalén, tey cham a.

Judá ya yich' Jerusalén soc Hebrón

⁸ Te winiquetic yu'un Judá la ya'beyic guerra te Jerusalén, la yich'ic, la ya'beyic espada te mach'atic nahinemic tey a soc la schiq'uic te pueblohe.

⁹ Patil te winiquetic yu'un Judá baht ya'beyic guerra te cananeohetic te nahinemic ta witsiltic, ta Neguev soc ta ahlan q'uinal.

¹⁰ Soc baht ya'beyic guerra te cananeohetic te nahinemic ta Hebrón, te ha Quiriat-arba sbihil ta nahil to; soc la stsalticlanic Sesai, Ahimán soc Talmai.

Otoniel ya stsal Debir, soc a'bot yic' yihnamin Acsa

¹¹ Loq'uic bahel tey a, baht ya'beyic guerra te mach'atic nahinemic ta Debir, te ha Quiriat-sefer sbihil ta nahil to.

¹² Hich la yal te Caleb: Te mach'a ya ya'be guerra te Quiriat-sefer soc te ya stsal, ya ca'be yihnamin te cantsil-nich'an Acsa, xchi.

¹³ Ha la stsal te Otoniel te snich'an Cenaz, te yihts'in Caleb. Hich te Caleb la ya'be yihnamin Acsa te yantsil-nich'an.

¹⁴ Te c'alal c'oht ta stojol Otoniel te Acsa, te Otoniel la suj te yacuc sc'ambe sq'uinal te state. Hich te Acsa co ta sburro, hich joc'obot yu'un te Caleb: ¿Bin yac ac'an? xchi.

¹⁵ A'bon jmahtan. Te bin ut'il la awa'bonix q'uinal ta Neguev, ha nix a'bon sloq'uib-ha'etic, xchi te Acsa. Ha yu'un te Caleb la ya'be te sloq'uib-ha'etic ta ahc'ol soc ta ahlan.

Te banti la ya'iyic tsalaw Judá soc Benjamín

¹⁶ Te sts'umbal Hobab, te snihal-mamal Moisés, loq'uic bahel ta pueblo yu'un xahnetic soc te snich'nab Judá, bahtic ta jochol taquin q'uinal yu'un Judá te ay ta Neguev ta nopol Arad; la sjoquin sbahic ta nahinel soc te yajwal q'uinal tey a.

¹⁷ Ha yu'un baht te Judá soc Simeón te yermanotac, la stsalic te cananeohetic te nahinemic ta Sefat, jc'axel la slajinic, la ya'beyic sbihilin Horma.

¹⁸ Te winiquetic yu'un Judá ha nix hich la yu'untayic te Gaza, Ascalón, soc Ecrón soc te q'uinal yu'unique.

¹⁹ Te Jehová la sjoquin te Judá, te ha la yu'untayic te witsiltic, pero ma ba hu' yu'unic stenel loq'uel te mach'atic nahinemic ta spamlej, yu'un ay scarretahetic yu'un guerra pasbilic ta taq'uin.

²⁰ Hich te bin ut'il yaloj te Moisés, la ya'beyic Hebrón te Caleb. Te Caleb la sten loq'uel tey a te oxtuhl snich'nab Anac.

²¹ Yan te sts'umbal Benjamín ma ba la sloq'uesic te jebuseohetic te nahinemic ta Jerusalén; hich te jebuseohetic nahinemic ta Jerusalén soc te sts'umbal Benjamín c'alal ora.

Sts'umbal José la stsal Bet-el

²² Ha nix hich te sts'umbal José baht ya'beyic guerra te Bet-el; joquimbilic yu'un Jehová.

²³ Te sts'umbal José la sticonic bahel jtsahtaywanejetic ta Bet-el, te ha Luz sbihil ta nahil to.

²⁴ Te jtsahtaywanejetic la yilic jtuhl winic yac ta loq'uel tal ta pueblo, hich la yalbeyic: A'botcotic quilcotic te yochibal te pueblo, hich ya jc'uxultayatcotic, xchihic.

²⁵ Ha yu'un la ya'be yilic te yochibal te pueblo, hich te sts'umbal José la yac'ticlambeyic espada te mach'atic ayic ta pueblo, pero la yaq'uic bahel te winic soc spisil mach'atic ay yu'un.

²⁶ Te winic baht ta sq'uinal te heteohetic, la shach jun pueblo te la ya'be sbihilin Luz; hich ay sbihil c'alal ora.

Te banti la ya'iyic stsalaw sts'umbal Manasés soc Efraín

²⁷ Te Manasés ma ba la sten loq'uel te mach'atic ayic ta Bet-seán, Taanac, Dor, Ibleam o Meguido soc te tut pueblohetic yu'unique; te cananeohetic la yaq'uic fuersa te ya xnahinic xan tey a.

²⁸ Te c'alal la yich' yip te Israel, la ya'beyic spas tulan a'tel te cananeohetic, pero ma ba la stenic loq'uel ta jc'axel.

²⁹ Ha nix hich te Efraín ma ba la stenic loq'uel te cananeohetic te nahinemic ta Gezer, hich te cananeohetic hilic ta nahinel ta yohlilic.

Banti la ya'iyic stsalaw te yantic jchahp yu'un Israel

³⁰ Ha nix hich te Zabulón ma ba la stenic loq'uel te mach'atic nahinemic ta Quitrón soc ta Naalal; te cananeo hilic ta nahinel ta yohlilic, pero a'botic spas tulan a'tel.

³¹ Ha nix hich te Aser, ma ba la stenic loq'uel te mach'atic nahinemic ta Aco, Sidón, Ahlab, Aczib, Helba, Afec soc Rehob.

³² Te Aser nahinic ta yohlil te cananeohetic te nahinemic tey a, ma ba la stenic loq'uel.

³³ Ha nix hich te Neftalí ma ba la stenic loq'uel te mach'atic nahinemic ta Bet-semes soc ta Bet-anat, ha nahinic ta yohlil te cananeohetic te nahinemic tey a; pero la ya'beyic spas tulan a'tel te mach'atic ayic ta Bet-semes soc Bet-anat.

³⁴ Te amorreohetic la stenic bahel te sts'umbal Dan c'alal ta witsiltic, ma ba la yaq'uic te ya xcohic tal ta spamlej.

³⁵ Te amorreohetic la yaq'uic fuersa te ya xnahinic ta Heres, Ajalón soc Saalbim; pero c'alal la yich'ic yip te sts'umbal José la ya'beyic spasic tulan a'tel.

³⁶ Te sti'il sq'uinal te amorreohetic hahch bahel ta mohel q'uinal yu'un Acrabim, c'alal ta Sela soc mohel xan bahel.