San Juan 9 - Bible in Tzeltal Bachajón

Jesús la sjambe sit ts'o'sit ta yayinab to

¹ Yac ta sohlel a te Jesús, la yil jtuhl winic te ts'o'sit ta yayinab to.

² Hich joc'obot yu'un te jnopojeletic yu'une: Rabí, ¿mach'a ta smul te ts'o'sit a ayin ha'i winic ini, ha bal ta smul stuquel o ha bal ta smul sme'stat? xchihic.

³ La sjac' te Jesús: Ma ha'uc ta scaj smul ni ha'uc ta smul sme'stat, pero scuenta yu'un ya xchicnaj ya'tel Dios ta stojol.

⁴ Ya sc'an te ya jpasbe ya'tel te mach'a sticonejon tal te c'alal sac to a te q'uinale. Ya xtal ahc'abal te mayuc mach'a ya xhu' ya x'a'tejix.

⁵ Te jayeb c'ahc'al ayon ta bahlumilal, sacal q'uinalon yu'un te bahlumilale, xchi.

⁶ Laj yalbel a, la stuhbatay lum, la spas ta ahch'al, la sjaxbe ta sit te ts'o'sit,

⁷ soc hich a yalbe: Bahan, poca asit ta yawil ha' ta Siloé, xchi. (Te Siloé, ha Ticombil, xchi te c'asesbile.) Hich baht, la spoc sit, la yilix q'uinal a suht bahel.

⁸ Te spat-xuhc soc te mach'atic ilbil yu'un te ts'o'sit ta nahil to, la yalic: ¿Ma bal ha'uc te mach'a ya xhuhcaj ta c'ambajel ini? xchihic.

⁹ Ay mach'atic la yalic: Ha, xchihic. Ay yantic la yalic: Sjel ta ha yilel, xchihic. Pero la yal te winic: Ho'on, xchi stuquel.

¹⁰ La sjoc'obeyic: ¿Bin ut'il jahm asit? xchihic.

¹¹ La sjac': Te jtuhl winic Jesús sbihil la spas ahch'al, la sjaxbon ta jsit, la yalbon: Bahan ta Siloé, poca asit, xchi. Hich bohon, la jpoc jsit, hich la jquil q'uinal, xchi te winique.

¹² La sjoc'obeyic: ¿Banti ay te winique? xchihic. Ma jna', xchi.

Te fariseohetic la sjoc'obeyic ta lec te ts'o'sit

¹³ La yiq'uic bahel ta stojol fariseohetic te mach'a ts'o'sit ta nahil to.

¹⁴ Ha sc'ahc'alel cux-o'tan a te la spas ahch'al te Jesús soc te la sjambe te site.

¹⁵ Joc'obot yu'un te fariseohetic bin ut'il jahm te site. La sjac' te winic: La sjaxbon ahch'al ta jsit, la jpoc, hich ya quilix q'uinal, xchi.

¹⁶ Ay fariseohetic hich la yalic: Te winic ini, ma ba talem ta stojol Dios, como ma ba ya scanantay te sc'ahc'alel cux-o'tan, xchihic. Ay yantic la yalic: ¿Bin ut'il ya xhu' yu'un spasel señahiletic te mach'a jmulawil? xchihic. Hich la stij sbahic ta c'op yu'un.

¹⁷ Ha yu'un la scha'joc'obeyic xan te ts'o'site: ¿Bin yac awal ha'at yu'un te mach'a la sjambat asit? la yutic. Ha jalwanej, xchi.

¹⁸ Pero te judíohetic ma ba la sch'uhunic te ha ts'o'sit ta nahil to soc te jahmix te site, ha to c'alal la yic'beyic tal te sme'stat te mach'a jambot sit,

¹⁹ soc la sjoc'obeyic: ¿Ha bal awal-anich'anic ini te ts'o'sit a ayin yac awalic? ¿Bin ut'il ay a te ya yilix q'uinal? la yutic.

²⁰ La sjac' te sme'stat: Jna'ojcotic te ha cal-jnich'ancotic soc te ts'o'sit a ayin.

²¹ Pero te bin ut'il ya yilix q'uinal ta ora ini, ma ba ya jna'cotic soc ma ba ya jna'cotic mach'a a te jambot sit yu'une. Joc'obeyahic, ayix ya'bilal, ha nix ya yal sba, xchihic.

²² Hich la yal te sme'stat yu'un xi'ojic te judíohetic, como te judíohetic schapojic te ya yich' loq'uesel ta sinagoga te mach'a ya sch'uhun te ha Mesías te Jesús.

²³ Ha scuentahil te hich la yalic te sme'stat: Ayix ya'bilal, joc'obeyahic, te xchihique.

²⁴ Ha yu'un la scha'ticonic ta iq'uel tal te winic te ts'o'sit ta nahil to, hich la yalbeyic: ¡Halbeya yutsilal te Diose! Jna'ojcotic te ha jmulawil te winique, xchihic.

²⁵ La sjac' te winique: Teme jmulawil, ma jna' te ho'one; ha nax ya jna' te ts'o'siton ta nahil to, pero yo'tic ya quilix q'uinal, xchi.

²⁶ La scha'joc'obeyic xan: ¿Bin la spasbat? ¿Bin ut'il la sjambat asit? la yutic.

²⁷ La jcalbeyexix, pero ma xac'an yac awa'iyic. ¿Bin yu'un yac ac'an yac awa'iyic xan? ¿Yu'un bal yac ac'anic te ha nix hich ya x'ochex ta jnopojelil yu'un? xchi.

²⁸ La slabanic, hich la yalic: Ha'at jnopojelat yu'un; yan te ho'otcotic, ha jnopojelotcotic yu'un Moisés.

²⁹ Jna'ojcotic te c'oponot yu'un Dios te Moisés, pero te winic ini, ma jna'cotic ban talem stuquel, xchihic.

³⁰ La sjac' te winique: Ha jchahp ya ca'iy a te ma xana'ic ban talem, pero la sjambon te jsite.

³¹ Jna'ojtic te ma x'a'iybot sc'opic yu'un Dios te jmulawiletique; yan te mach'a ha xi'oj te Dios soc te ya spasbe te bin ya sc'an yo'tan, ya x'a'iybot sc'op yu'un stuquel.

³² Yalel ta shahchibal mayuc ya xchicnaj ta halel te ya xjambot sit te mach'a ts'o'sit a te ayine.

³³ Te yu'unuc ma ba talem ta stojol Dios, mayuc bin ya xhu' yu'un spasel te hichuque, xchi.

³⁴ La sjaq'uic: Ta scuenta mulil te ayinat, ¿ha'at bal yac anohptesotcotic? la yutic. Hich la stenic loq'uel.

Mach'atic ts'o'sit c'ohemic

³⁵ La ya'iy te Jesús te tenot loq'uel te winique. C'alal la sta, hich la yalbe: ¿Ya bal ach'uhun te Snich'an Dios? xchi.

³⁶ ¿Mach'a a, Cajwal, yu'un ya jch'uhun? xchi te winique.

³⁷ Halbot yu'un te Jesús: Awilojix; ha nix te mach'a yacat ta c'op soque, xchi.

³⁸ Ya jch'uhun, Cajwal, xchi te winique. Hich la yich' ta muc'.

³⁹ La yal te Jesús: Ha talemon ta bahlumilal scuenta jchahpanwanej, scuenta yu'un te mach'atic ma ba ya yilic q'uinal, ya me yilic q'uinal, soc te mach'atic ya yilic q'uinal, ts'o'sit ya xc'ohtic, xchi.

⁴⁰ Ay fariseohetic sjoquinej, c'alal hich la ya'iyic, la sjoc'obeyic: ¿Yu'un bal ha nix hich ts'o'sitotcotic te ho'otcotique? xchihic.

⁴¹ La sjac' te Jesús: Te ts'o'situquex, mayuc amulic te hichuque, pero yo'tic, te bin ut'il yac awalic: Ya quilcotic q'uinal, te xchihex, ay amulic ya xhil.