San Juan 5 - Bible in Tzeltal Bachajón

Te winic ta Betesda te chamen schihal yoc sc'ab

¹ Ta patil, ay q'uin yu'un te judíohetic, hich mo bahel ta Jerusalén te Jesús.

² Tey ta Jerusalén, ta nopol te Yochibal Tuminchijetic, ay jun yawil ha', Betesda sbihil ta hebreo, te ay ho'eb slehchul na.

³ Tey metsajtic tsobol jchameletic a, ts'o'sitetic, coxo'etic soc mach'atic chamen schihalic te yac smahliybelic te ya syuc' sba te ha'e,

⁴ como ay ch'ul a'bat te ya xco tal ta jujun yorahil ta yawil ha' soc ya syuc' te ha'e. Te mach'a nahil ya x'och ta yawil ha' te c'alal yuc'bilix a te ha'e, ya xlecub yu'un biluc chamelil te yich'oje.

⁵ Ay jtuhl winic tey a te ayix waxaclajuneb scha'winic (38) ha'bil te ay ta chamel.

⁶ C'alal Jesús la yil te tey metsel a soc te la sna' te nameyix hich ay ta chamel, la yalbe: ¿Ya bal ac'an ya xlecubat? xchi.

⁷ La sjac' te jchamele: Tat, mayuc mach'a ay cu'un te ya yotseson bahel ta yawil ha' te c'alal ya syuc' sba; ma to ba jtahoj c'ohel a, yan mach'a cohemix bahel a, xchi.

⁸ Hich halbot yu'un Jesús: Tehc'ana aba, hacha awayib, behenan, xchi sc'oblal.

⁹ Ora lecub te winique, la stsac te swayib, behen bahel. Ha yorahil sc'ahc'alel cux-o'tan a.

¹⁰ Ha yu'un te judíohetic la yalbeyic te mach'a lecubix ta chamel: Ha sc'ahc'alel cux-o'tan ini; ma xpas te yac awich' bahel te awayibe, la yutic.

¹¹ La sjac' te winic: Te mach'a la slecubteson, ha nix la yalbon: Ich'a bahel awayib, behenan, la yuton, xchi.

¹² La sjoc'obeyic: ¿Mach'a a te la yalbat: Ich'a bahel awayib soc behenan, te la yutate? xchihic.

¹³ Pero te winic te lecubix ta chamel ma ba la sna'be sba mach'a a, como loq'uemix bahel a te Jesús ta yohlil te ants-winiquetic tey a.

¹⁴ Ta patil, te Jesús la sta ta Templo te winique, hich la yalbe: Ilawil, lecubatix ta chamel; ma me xalehix xan amul scuenta yu'un ma ba c'ax hich ya xc'ax xan awocol a, xchi sc'oblal.

¹⁵ Te winic baht yalbe ya'iy te judíohetic te ha Jesús te ch'aybot schamel yu'une.

¹⁶ Ha scuentahil te hahch scontrahinic Jesús te judíohetic, como hich yac spasbel ta sc'ahc'alel cux-o'tan.

¹⁷ Hich halbotic yu'un te Jesús: Yac ta a'tel c'alal ora te Jtate, ha nix hichon yacon ta a'tel, xchi.

¹⁸ Ha scuentahil te judíohetic la ya'beyic xan yip ta schapbeyel sc'oblal ta milel; ma ha'uc nax yu'un te la sc'axuntay te sc'ahc'alel cux-o'tan, ha nix yu'un te la yal te ha Stat te Diose, hich la spajaltay sba soc Dios.

Te ya'tel yich'oj te Nich'anil

¹⁹ La sjac' te Jesús: Tulan sc'oblal ya calbeyex, mayuc bin ya xhu' ya spas ta stuquel-o'tan nax te Nich'anil, ha nax te bin ya yil yac spasbel te State. Como spisil te bin ya spas te Tatil, ha nix hich ya spas te Nich'anil,

²⁰ como te Tatil c'ux ta yo'tan te Snich'an soc ya ya'be yil spisil bintic ya spas; soc c'ax hich muc' ya'tel ya me ya'be yil a, te hich xcham awo'tanic yu'une.

²¹ Como hich te bin ut'il te Tatil ya scuxajtes te mach'atic chamenic soc ya yac'ticlambe scuxlejalic, ha nix hich te Nich'anil ya ya'be scuxlejal te mach'a ya sc'an ya ya'be.

²² Soc te Tatil mayuc mach'a ya schahpan stuquel, ha ya'beyej ya'tel ta chahpanwanej te Nich'anil,

²³ scuenta yu'un spisil ya me yich'ic ta muc' te Nich'anil, hich te bin ut'il ya yich'ic ta muc' te Tatile. Te mach'a ma ba ya yich' ta muc' te Nich'anil, ma ba yich'oj ta muc' te Tatil te ticonot tal yu'une.

²⁴ Tulan sc'oblal ya calbeyex, te mach'a ya ya'iybon jc'op soc ya sch'uhun te mach'a la sticonon tale, ay scuxlejal sbahtel q'uinal soc ma ba ya x'a'bot stoj smul, c'axemix yu'un te lajel, ayix scuxlejal.

²⁵ Tulan sc'oblal ya calbeyex te ya me sta yorahil, soc yorahilix ini, te mach'atic chamenic ya me ya'iybeyic sc'op te Snich'an Dios, soc te mach'a ya ya'iyic, ya me xcuxajic.

²⁶ Como hich te bin ut'il ay scuxlejal ta stuquel te Tatil, ha nix hich ya'beyej te ay scuxlejal ta stuquel te Nich'anil.

²⁷ Soc la ya'be ya'tel ta chahpanwanej, te bin ut'il ha Nich'anil ay ta scuenta winic.

²⁸ Ma me xchamuc awo'tanic yu'un, como ya me sta yorahil te spisil mach'atic ayic ta muquenal ya me ya'iybeyic sc'op

²⁹ soc ya me xloq'uic talel; te mach'atic lec bin la spasic ya me xcha'cuxajic yu'un ya yich' scuxlejalic, yan te mach'atic chopol bin la spasic, ya xcha'cuxajic yu'un ya stoj smulic.

Testigohetic yu'un Cristo

³⁰ Mayuc bin ya xhu' ya jpas ta jtuquel-o'tan nax; te bin ya ca'iy, hich ya jchahpan; soc toj ya ca'iy chahpanwanej, como ma ha'uc ya jle binti ya sc'an co'tan, ha ya jle te binti ya sc'an yo'tan te Jtat te sticonejon tale.

³¹ Teme ho'onix ya cal jc'oblal, mayuc ta ich'el ta cuenta.

³² Ay yan mach'a ya yalbon jc'oblal, ya jna' te ha smelelil bin ya yalbon jc'oblal.

³³ Ha'ex la aticonic ta joc'obeyel te Juan, ha la yalbe sc'oblal te bin melele.

³⁴ Ma yu'unuc ya quich' ta cuenta te bin xchi jc'oblal yu'un winiquetic; pero ha ya cal ini scuenta yu'un hich me ya xcolex a.

³⁵ Te Juan ha c'ahc' te tihl soc te la sacubtes q'uinal; soc la ac'anic te che'oxeb c'ahc'al te tse'el awo'tanic ya x'ayinex ta sacal q'uinal yu'un.

³⁶ Pero ay bin ya yalbon jc'oblal te c'ax hich ay sc'oblal a te bin la yal te Juan: ha te a'teliletic a'bibilon yu'un te Tatil yu'un ya hu'tes, ha nix te a'teliletic te yacon ta spasel, ha ya yalbonic jc'oblal te sticonejon tal te Tatile.

³⁷ Soc te Tatil te la sticonon tal, ha nix la yalbon jc'oblal. Mayuc awa'iybeyejic sc'op soc mayuc awilojic bin yilel,

³⁸ soc mayuc ta awo'tanic te sc'ope, como ma xach'uhunic te mach'a ticombil tal yu'une.

³⁹ Yac anopilanic ta lec te Shun Dios yu'un yac awalic te tey yac awich' acuxlejalic sbahtel q'uinal a; tey nix halbil jc'oblal a,

⁴⁰ pero ma xac'an ya xtalex ta jtojol yu'un yac awich' acuxlejalic.

⁴¹ Ma ba ya quich' ta cuenta te ya yalbon cutsilal ants-winiquetic.

⁴² Pero ya jna'beyex awo'tanic, te mayuc ta awo'tanic te sc'uxul yo'tan te Diose.

⁴³ Talemon ta scuenta sbihil te Jtate, pero ma xawich'onic ta cuenta. Teme ay yan te ya xtal ta scuenta sbihil nix, ha yac awich'ic ta cuenta stuquel.

⁴⁴ ¿Bin ut'il c'an ach'uhunic teme talel c'axel yac awalbel abahic yutsil ac'oblalic, te ma ha'uc yac alehic te yutsil ac'oblalic te ya xtal ta stojol te Dios te stuquel ay?

⁴⁵ Ma me xacuyic te ho'on ya calbeyex amulic ta stojol te Tatile. Ay mach'a ya yalbeyex amulic, ha te Moisés te ha smuc'ulinej awo'tanic.

⁴⁶ Teme ach'uhunejic te Moisés, yac ach'uhunonic te hichuque, como ho'on jc'oblal te la sts'ihbay.

⁴⁷ Pero teme ma xach'uhunic te bin la sts'ihbay, ¿bin ut'il c'an ach'uhumboniquix a te jc'ope? xchi.