San Juan 20 - Bible in Tzeltal Bachajón

Cha'cuxaj Jesús

¹ Buen sab ta sba c'ahc'alil semana, yac to nax ta chicnajel tal q'uinal a, baht ta muquenal te María Magdalena; la yil loq'uesbilix te ton macbil sti'il a te muquenale.

² Hich baht ta ahnimal ta stojol te Simón Pedro soc te yan jnopojel te c'ux ta yo'tan Jesús, hich c'oht yalbe: La yiq'uiquix loq'uel ta muquenal te Cajwaltic, ma jna'tic banti c'oht yaq'uic hilel, xchi.

³ Ora hahchic bahel te Pedro soc te yan jnopojel, bahtic ta muquenal.

⁴ Pajal hahchic ta ahnimal, pero te yan jnopojel la sohlintay te Pedro, ha nahil c'oht ta muquenal.

⁵ La swuhts'an sba, la yilbe te pac' potsot sbaq'uetal a, pero ma ba och bahel.

⁶ Patil c'oht te Simón Pedro, ora och bahel ta yutil te muquenal, la yilbe te spohtsil sbaq'uetal tey ay a

⁷ soc te chuhquilal te potsbot sjol a te Jesús, ma ha'uc sjoc te spohtsil sbaq'uetal, parte balbil hilel.

⁸ Hich och bahel te yan jnopojel te nahil c'oht ta muquenal; la yil soc la sch'uhun.

⁹ Ma to ba c'ohem ta yo'tanic a te bin ya yal te Shun Dios te ya sc'an te ya xcha'cuxaj tal ta yohlil te mach'atic chamenic.

¹⁰ Te jnopojeletic suhtic bahel ta snahic.

Jesús la yac' sba ta ilel yu'un María Magdalena

¹¹ Yan te María tey hil ta oq'uel ta sti'il muquenal. Yac ta oq'uel a, la swuhts'an sba ta yilel te yutil muquenal,

¹² la yil cheb ch'ul a'batetic te sac sc'u' spaq'uic, jtuhl hucul ta sjolinab, jtuhl ta yoquinab ta banti ac'ot hilel te sbaq'uetal Jesús.

¹³ Hich halbot yu'unic: Ants, ¿bin yu'un yacat ta oq'uel? xchihic. Yu'un la yich'bonic bahel sbaq'uetal te Cajwal, ma jna' banti c'oht yaq'uic hilel, xchi te María.

¹⁴ Laj nax yalbel a, la sut sit te María, la yil tey teq'uelix a te Jesús, pero ma ba la sna' teme ha te Jesús.

¹⁵ Joc'obot yu'un te Jesús: Ants, ¿bin yu'un yacat ta oq'uel? ¿Mach'a yac ale? xchi. Te María la scuy te ha jcanan-ts'unubil, hich la yalbe: Tatil, teme ha'at la awich'be bahel, halbon banti c'oht awac' hilel, yu'un ya quich'be bahel, xchi.

¹⁶ La yal te Jesús: ¡María! xchi. La sut sba te María: ¡Raboni! xchi. (Maestro, xchi c'ohem).

¹⁷ Halbot yu'un te Jesús: Ma me xapicon, como ma to ba mohemon ta banti ay te Jtate; pero bahan, halbeya te quermanotac: Ya xmohonix bahel ta banti ay te Jtat soc te Tatil awu'unic, te Dios cu'un soc te Dios awu'unic, xchi.

¹⁸ Hich te María Magdalena baht yalbe ya'iy te jnopojeletic te la yilix te Cajwaltic, soc te hich halbot yu'une.

Jesús la yac' sba ta ilel yu'un jnopojeletic yu'un

¹⁹ Te c'alal ihc'ub q'uinal ta sba c'ahc'alil semana, macajtic a te puertahetic te banti stsoboj sbahic te jnopojeletic ta scaj te la xi'ic te judíohetic, tal te Jesús, la stehc'an sba ta yohlilic, hich la yal: ¡Lamaluc me q'uinal yac awa'iyic! xchi.

²⁰ Laj yalbel a, la ya'be yilic te sc'ab soc te smochbaquel. Tse'el yo'tanic yu'un te jnopojeletic te c'alal la yilic te Cajwaltique.

²¹ Cha'halbotic xan yu'un te Jesús: Lamaluc me q'uinal yac awa'iyic. Hich te bin ut'il la sticonon tal te Tatil, ha nix hich ya jticonex bahel, xchi sc'oblalic.

²² Laj yalbel a, la shuhxiy, hich la yal: Ich'ahic te Ch'ul Espíritu.

²³ Te mach'atic yac apasbeyic perdón yu'un te smulique, pasbil perdón ya xc'oht abi; soc te mach'atic ma ba yac apasbeyic perdón, ma ba pasbil perdón ya xhilic, xchi.

Wocol la sch'uhun Tomás

²⁴ Pero te Tomás, te Dídimo yan sbihil, te jtuhl ta slahchaytuhlic, ma ba tey sjoquic a te c'alal tal te Jesús.

²⁵ Hich halbot yu'un te yantic jnopojeletic: La jquilcotiquix te Cajwaltique, xchihic. La yal te Tomás: Teme ma ba ya quil te banti och lawux ta sc'ab soc teme ma ba ya cotses yal jc'ab te banti och, soc teme ma ba ya cotses jc'ab te banti lowbot smochbaquel, ma ba ya jch'uhun, xchi.

²⁶ Waxaqueb c'ahc'al ta patil ayic ta yut na yan buelta te jnopojeletic, soc tey sjoquinejiquix a te Tomás. Macajtic a te puertahetic, tal stehc'an sba ta yohlilic te Jesús, hich la yalbe: ¡Lamaluc me q'uinal xawa'iyic! xchi.

²⁷ Soc la yalbe te Tomás: Ac'a tal yal ac'ab, ilbon awil te jc'abe. Ac'a tal ac'ab, otsesa ta jmochbaquel; ma me yu'unuc ma xach'uhun, ch'uhuna me, xchi sc'oblal.

²⁸ La sjac' te Tomás: ¡Cajwal, Dios cu'un! xchi.

²⁹ Jesús la yalbe: Tomás, la ach'uhunon yu'un la awilon; ha bayel yutsil te mach'atic ya sch'uhunonic aunque ma ba yilojonic, xchi.

Bin scuentahil la yich' ts'ihbayel te hune

³⁰ Te Jesús ay to tsobol xan señahiletic la spasticlan ta stojol te jnopojeletic yu'un te ma ba ts'ihbabil li' ta hun ini.

³¹ Pero ha'i señahiletic ini la yich' ts'ihbayel scuenta yu'un hich me yac ach'uhunic a te ha Cristo te Jesús, te ha Snich'an Dios, soc teme yac ach'uhunic, ay me acuxlejalic ta scuenta te sbihile.