San Juan 16 - Bible in Tzeltal Bachajón

¹ La jcalbeyex ini scuenta yu'un ma ba ya xchebaj awo'tanic ta jtojol a.

² Ya me stenex loq'uel ta sinagogahetic; soc ya me sta yorahil te ya scuyic te yac spasbelic ya'tel Dios te mach'atic ya smilex.

³ Hich ya spasic ta scaj te ma sna'beyic sba te Tatil soc ma sna'bonic jba.

⁴ Pero la me jcalbeyex ini scuenta yu'un te c'alal hich ya xc'oht ta pasel ya me ana'ic te hich nix calbeyejex a. Ma ba hich la jcalbeyex ta shahchibal, como joquinejex to a.

Ya'tel Ch'ul Espíritu

⁵ Yo'tic ya xbohon ta stojol te mach'a la sticonon tal, pero te ha'ex mayuc mach'a ya sjoc'obon: ¿Banti ya xbahat? ma xchihuc.

⁶ Pero ayex ta mel-o'tan yu'un te hich la jcalbeyex.

⁷ Pero ya calbeyex te bin smelelil: Scuenta awutsil alequilic te ya xbohon, yu'un teme ma ba ya xbohon, ma ba ya xtal ta atojolic te Joquinwanej; yan teme ya xbohon, ya jticombeyex tal.

⁸ Te c'alal ya xtal, ya me ya'be sna'ic bin ut'il ay sc'oblal mulil te mach'atic ayic ta bahlumilal, soc bin ut'il ay sc'oblal toj-o'tanil soc schahpanel mulil.

⁹ Ya ya'be sna'ic bin ut'il ay sc'oblal mulil, como ma ba ya sch'uhunonic;

¹⁰ ya ya'be sna'ic bin ut'il ay sc'oblal toj-o'tanil, como ya xbohon ta stojol te Tatil soc ma ba yac awiloniquix xan;

¹¹ soc ya ya'be sna'ic bin ut'il ay sc'oblal schahpanel mulil, como chahpambilix te principal yu'un te bahlumilale.

¹² Ay to tsobol bin ya jc'an ya calbeyex, pero ma to xcuhch awu'unic.

¹³ Pero te c'alal ya xtal te Espíritu yu'un te bin smelelil, ha me ya stojobtesex ta sna'el spisil te bin smelelil, como ma stuquel-o'tanuc ya xc'opoj, ha ya yal spisil te bin ya ya'iy soc ya ya'beyex ana'ic te bin ya xc'oht ta pasele.

¹⁴ Ha me ya yac'on ta ich'el ta muc', como ya yich' te bin ay cu'un, ha ya ya'beyex ana'ic.

¹⁵ Spisil te bintic ay yu'un te Tatil, ha nix cu'un; ha scuentahil te la jcalbeyex te ya me yich' te bin ay cu'un, ha ya ya'beyex ana'ic.

Te mel-o'tan ya sutp'ij ta tse'el-o'tanil

¹⁶ Li' ta jts'ihn ma ba yac awilonic, pero jts'ihn xan ta patil yac awilonic, xchi te Jesús.

¹⁷ Ha yu'un cha'oxtuhl te jnopojeletic yu'un talel c'axel la sjoc'obe sbahic: ¿Bin yu'un te hich ya yalbotic: Li' ta jts'ihn ma ba yac awilonic, pero jts'ihn xan ta patil yac awilonic, te xchihe, soc te ya yal: Yu'un ya xbohon ta stojol te Tatile? xchihic.

¹⁸ Hich la yalic xan: ¿Bin a te hich la yal: Li' ta jts'ihn, te xchihe? Ma jna'betic scuentahil te bin ya yal, xchihic.

¹⁹ La sna' te Jesús te yo'tanuc ya sjoc'obeyic, ha yu'un la yalbe: ¿Ha bal talel c'axel yac ajoc'obe abahic yu'un te hich la jcal: Li' ta jts'ihn ma ba yac awilonic, soc jts'ihn xan ta patil ya me awilonic, te xchihone?

²⁰ Jamal ya calbeyex, ya me x'oq'uex soc yac amel awo'tanic, yan te mach'atic ayic ta scuenta bahlumilal tse'el yo'tanic; pero aunque ayex ta mel-o'tan, ta patil ya me sutp'ij ta tse'el-o'tanil.

²¹ C'alal ya x'ayin yal te ants, ay sc'uxul, como la stahix yorahil; pero te c'alal ayinix a te alale, ma ba ya sna'ix te swocole, como tse'el yo'tan yu'un te ayinix ta bahlumilal jtuhl alal.

²² Ha nix hichex, ayex ta mel-o'tan ta ora ini, pero ya jcha'ilex xan, hich ya xtal stse'elil awo'tanic yu'un, soc mayuc mach'a ya sloq'uesbeyex te stse'elil awo'tanique.

²³ Ta hich ora mayuc bin yac ajoc'oboniquix a. Tulan sc'oblal ya calbeyex, spisil te bin yac ac'ambeyic te Jtat ta scuenta jbihil, ya me ya'beyex.

²⁴ Ma to ayuc bin ac'ambeyejic ta scuenta te jbihile. C'anahic, ya me awich'ic, scuenta yu'un ts'acal ya xc'oht a te stse'elil awo'tanique.

La jtsalix te bahlumilal

²⁵ Ta seña-c'op nax la jc'oponex, pero ya sta yorahil te ma ta seña-c'opuc ya jc'oponex, pero jamal ya calbeyex bin ut'il ay te Tatile.

²⁶ Ta hich ora ay bintic yac ac'ambeyic ta scuenta te jbihile, soc ma ba ya calbeyex te ho'on ya jc'ambe te Tatil ta acuentahic,

²⁷ como ha nix te Tatil c'ux ya ya'iyex ta yo'tan, como c'uxon ta awo'tanic soc ach'uhunejic te talemon ta stojol te Diose.

²⁸ Talemon ta stojol te Tatil soc hulemon ta bahlumilal; yo'tic ya quihquitayix hilel te bahlumilal, ya xbohonix ta stojol te Tatile, xchi.

²⁹ La yalic te jnopojeletic yu'un: Yo'tic, mero jamalix bin yac awalbel, ma ba ta seña-c'op ya xc'opojat.

³⁰ La jna'cotiquix te yac ana' spisil, ma yu'unuc ya sc'an te ay mach'a ya sjoc'obat; ha scuentahil te la jch'uhuncotic te talemat ta stojol te Diose, xchihic.

³¹ La sjac' te Jesús: ¿La bal ach'uhuniquix?

³² Ya me sta yorahil, soc yorahilix ini, te ya xpuhquex bahel jujutuhlex, jtuquel ya xhilon awu'unic; pero ma jtuqueluc ayon como sjoquinejon te Tatile.

³³ La jcalbeyex ini scuenta yu'un ayuc lamal q'uinal awu'unic ta jcuenta. Ay me awocolic li' ta bahlumilal, pero ayuc me smuc'ul awo'tanic, ho'on la jtsalix te bahlumilale, xchi.