San Juan 13 - Bible in Tzeltal Bachajón

Jesús la spocticlambe yoc jnopojeletic

¹ Ma to sta yorahil Q'uin Pascua a, te Jesús sna'oj te c'ohtix yorahil te ya yihquitayix hilel te bahlumilal soc te ya xbahtix ta stojol te Tatile. C'ux la ya'iy ta yo'tan te mach'atic ay yu'un ta bahlumilal, c'ux la ya'iy ta yo'tan ha to c'alal ta slajibal.

² C'alal ayic ta we'el a, te Judas Iscariote snich'an Simón halbotix ta yo'tan yu'un a te pucuj te ya yac' ta c'abal te Jesús.

³ Sna'oj te Jesús te spisil a'bibil ta sc'ab yu'un te Tatil, soc te hahchem tal ta stojol Dios soc te ya suhtix bahel ta stojol Dios;

⁴ hich la stehc'an sba tey ta banti ayic ta we'el, la sloq'ues te smuc'ul-c'u', la stsac jun toalla soc la sbech' ta sch'uyomba.

⁵ Patil, la yac' ha' ta jahy, hahch spocticlambe yoc te jnopojeletic yu'un, soc la scusticlambe ta toalla te bech'el ta sch'uyomba.

⁶ C'alal c'oht ta stojol te Simón Pedro, la yal te Pedro: Cajwal, ¿ha'at bal c'an apocbon coc? xchi.

⁷ La sjac' te Jesús: Te bin yac jpasbel ta ora ini, ma ba yac ana'be scuentahil, pero patil to ya me ana'be scuentahil, xchi sc'oblal.

⁸ La yal te Pedro: Mayuc bin ora yac apocbon coc, xchi. Teme ma ba ya jpocat, yu'un nix ma cu'unucat a, xchi te Jesús.

⁹ La yal te Simón Pedro: Cajwal, ma ha'uc nax xapocbon te coque, pocbon ec te jc'ab soc jol, xchi.

¹⁰ Halbot yu'un te Jesús: Te mach'a atinemix, ha xanix ya sc'an pocbeyel yoc, hich me scohtol pocbil ya xc'oht a. Te ha'ex pocbilexix, aunque ma apisilicuc, xchi sc'oblalic.

¹¹ Como sna'oj te mach'a ya x'ac'ot ta c'abal yu'un, ha scuentahil la yal: Ma apisilicuc pocbilex, te xchihe.

¹² C'alal laj yo'tan spocticlambeyel yoc te jnopojeletic yu'un, la yich' xan te smuc'ul-c'u', suht xan bahel ta mesa, hich la yal: ¿Ana'ojic bal te bin la jpasbeyexe?

¹³ Ha'ex hich yac awalbonic: Maestro soc Cajwal, xchihex, lec te hich yac awalic, como ho'on nix a.

¹⁴ Teme ho'on, te Ajwalilon soc te Maestrohon awu'unic, la jpocbeyex awoquic, ha nix hich ya sc'an te talel c'axel yac apocbe aba awoquique.

¹⁵ La jca'beyex awilic scuenta yu'un ha nix hich yac apasic te bin la jpasbeyexe.

¹⁶ Tulan sc'oblal ya calbeyex, te a'bat ma ha'uc toyol yu'un te yajwal, soc te mach'a ticombil tal, ma ha'uc toyol yu'un te mach'a ticonot tal yu'un.

¹⁷ Teme hich ana'ojic, bayel me awutsilic teme hich yac apasique.

¹⁸ Ma apisilicuc te hich ya calbeyex ac'oblalic; jna'oj mach'atic te tsahbilix cu'un. Pero ya sc'an te hich ya xc'oht ta pasel te bin ts'ihbabil ta Shun Dios: Te mach'a pajal ya xwe'on soc, la spason ta jcontra, te xchihe.

¹⁹ Ya calbeyex yo'tic te ma to ba c'ohem ta pasel a, scuenta yu'un te c'alal ya xc'oht ta pasel ya me ach'uhunic te ho'on ayon.

²⁰ Tulan sc'oblal ya calbeyex, te mach'a ya yich' ta cuenta te mach'a ticombil cu'une, ho'on me la yich'on ta cuenta abi; soc te mach'a la yich'on ta cuenta, ha la yich' ta cuenta te mach'a la sticonon tale, xchi.

Jesús la yal ya x'ac'ot ta c'abal yu'un Judas

²¹ C'alal laj yalbel a, bayel la spich' sba yo'tan te Jesús, hich la yal: Tulan sc'oblal ya calbeyex, ay jtuhlex te ya yac'on ta c'abal, xchi.

²² Te jnopojeletic talel c'axel la yilbe sba sitic yu'un, ma ba la sna'ic mach'a a te la yalbe sc'oblal.

²³ Ay jtuhl jnopojel yu'un, te c'ux ta yo'tan Jesús, metsel ta sts'ehl te Jesús.

²⁴ A'bot yil sc'ab yu'un te Simón Pedro te yacuc sjoc'obe te Jesús mach'a a te hich la yalbe sc'oblale.

²⁵ Hich te mach'a nopol ay ta stahn Jesús, la sjoc'obe: ¿Mach'a a, Cajwal? xchi.

²⁶ La sjac' te Jesús: Ha te mach'a ya ca'be te mulbil pan, xchi. Hich te Jesús la smul te pan, la ya'be swe' te Judas Iscariote te snich'an Simón.

²⁷ C'alal la stsac te mulbil pan te Judas, och ta yo'tan te Satanás. Ha yu'un te Jesús la yalbe: Te bin ya x'och apas, pasa me ta ora, xchi sc'oblal.

²⁸ Pero mayuc mach'a ta mesa te la sna'ic bin scuentahiluc te hich la yalbe.

²⁹ Te bin ut'il yich'oj te yawil taq'uin te Judas, ay la scuyic te halbot yu'un Jesús te yacuc sman tal te bin ya xtuhun yu'unic ta q'uin, o te ay bin ya xbaht ya'be jtebuc te pobrehetique.

³⁰ C'alal la yich' te mulbil pan te Judas, ora loc' bahel. Ahc'abalix a.

Te yach'il mandaril

³¹ C'alal loq'uix bahel a te Judas, la yal te Jesús: Yo'tic ya x'ac'otix ta ich'el ta muc' te Nich'anil ay ta scuenta winic, soc ya x'ich'otix ta muc' te Dios ta scuenta.

³² Teme ich'ot ta muc' te Dios ta scuenta, ha nix hich Dios ya me yac' ta ich'el ta muc' te Nich'anil ta scuenta nix, soc nopol yorahil ya yac' ta ich'el ta muc'.

³³ Cal-jnich'nab, jts'ihn xanix te joquexe. Yac alehonic, pero hich te bin ut'il la jcalbe te judíohetic, ha nix hich ya calbeyex yo'tic: Te banti ya xbohon, ma xhu' ya xbahex tey a te ha'exe.

³⁴ Ay jun yach'il mandaril ya calbeyex: Talel c'axel c'ux xawa'iy aba ta awo'tanic; hich te bin ut'il c'ux la jca'iyex ta co'tan, ha nix hich talel c'axel c'ux xawa'iy abahic ta awo'tanic.

³⁵ Hich ya sna'ic spisil ants-winiquetic te ha'ex jnopojelex cu'un teme talel c'axel c'ux yac awa'iy aba ta awo'tanique, xchi.

Pedro halbot te ya smuc ta yo'tan te Jesús

³⁶ La yal te Simón Pedro: Cajwal ¿banti ya xbahat? xchi. La sjac' te Jesús: Te banti ya xbohon, ma xhu' yac at'unon bahel ta ora; pero ya me at'unon bahel ta patil, xchi.

³⁷ La yal te Pedro: Cajwal ¿bin yu'un te ma xhu' ya jt'unat bahel ta ora? ¡Ya cac' ta lajel jcuxlejal ta acuenta! xchi.

³⁸ La sjac' te Jesús: ¿Ya bal awac' ta lajel acuxlejal ta jcuenta? Tulan sc'oblal ya calbat, te ma to x'oc' mut a, oxeb buelta yac amucon ta awo'tan, xchi sc'oblal.