San Juan 11 - Bible in Tzeltal Bachajón

Cham Lázaro

¹ Ay ta chamel jtuhl winic, Lázaro sbihil, te ay ta Betania, ha te tut pueblo yu'un te María soc Marta te swixe.

² (Te María, te ha sbanquil te Lázaro te ay ta chamel, ha nix te la smalbe perfume te Cajwaltic soc te la scusbe ta stsotsel sjol te yoque.)

³ Ha yu'un te antsetic la sticonic ta halbeyel te Jesús: Cajwal, ay ta chamel te mach'a c'ux ta awo'tan, xchi c'ohel.

⁴ C'alal la ya'iy te Jesús, hich la yal: Te chamel yich'oj, ma yu'unuc ya xcham yu'un, ha ya x'ich'ot ta muc' a te Diose, scuenta yu'un ha ya x'ich'ot ta muc' a te Snich'an Dios, xchi.

⁵ C'uxic ta o'tanil yu'un Jesús te Marta soc te yihts'in soc te Lázaro.

⁶ C'alal la ya'iy te ay ta chamel te Lázaro, cheb xan c'ahc'al halaj tey a.

⁷ Patil, la yalbe te jnopojeletic yu'un: Conic, ya suhtotic xan bahel ta Judea, xchi.

⁸ Pero la yalic te jnopojeletic yu'un: Rabí, c'an sch'ojatix ta ton te judíohetique, ¿ya bal xcha'bahat xan tey a? xchihic.

⁹ La sjac' te Jesús: ¿Ma bal lahchayebuc ora yich'oj te jun c'ahc'al? Te mach'a ya xbehen ta c'ahc'alel ma ba ya sc'ohchin yoc, como ya yil q'uinal ta scuenta te sacal q'uinal yu'un te bahlumilale.

¹⁰ Yan te mach'a ta ahc'abal ya xbehen, ya sc'ohchin yoc, como mayuc sacal q'uinal ta stojol, xchi.

¹¹ C'alal laj yalbel, hich la yal xan: Wayalix te Lázaro te jun co'tan jbahtic soc, pero ya xbaht jtij hahchel, xchi.

¹² Cajwal, teme wayale, yu'un ya xlecub ta chamel, xchihic te jnopojeletique.

¹³ Pero te Jesús yac yalbel te chamix te Lázaro. Pero la scuyic te la yal te wayale.

¹⁴ Ha yu'un jamal la yal te Jesús: Chamix te Lázaro.

¹⁵ Tse'el co'tan awu'unic te ma ba tey ayon a, scuenta yu'un yac ach'uhunonic. Conic tey a, xchi.

¹⁶ Te Tomás, te Dídimo yan sbihil, la yalbe te yantic jnopojeletic: Coniquic ec, pajal ac'a chamucotic soc, xchi.

Jesús, ha cha'cuxajel soc ha cuxlejal

¹⁷ C'alal c'oht te Jesús, schanebalix c'ahc'al smuquel a te Lázaro.

¹⁸ Te Betania nopol yiloj sba soc Jerusalén, jteb ma sta jun legua,

¹⁹ tsobol judíohetic talem yilbelic te Marta soc te María scuenta yu'un ya smuc'ubtesbeyic q'uinal ya'iyic yu'un te cham te sbanquilique.

²⁰ C'alal la ya'iy te Marta te talix te Jesús, baht sta talel, yan te María hil ta na stuquel.

²¹ Te Marta hich c'oht yalbe te Jesús: Cajwal, te li'uc ayate, ma ba cham te jbanquil te hichuque.

²² Pero jna'oj te spisil bin yac ac'ambe te Diose, ya ya'bat, xchi.

²³ Halbot yu'un te Jesús: Ya xcha'cuxaj te abanquile, xchi.

²⁴ Jna'oj te ya xcha'cuxaj ta yorahil cha'cuxajel ta slajibal c'ahc'al, xchi te Marta.

²⁵ Halbot yu'un te Jesús: Ho'on te cha'cuxajelon soc ho'on te cuxlejalone; te mach'a ya sch'uhunon, aunque chamen, ya me xcuxaj.

²⁶ Spisil te mach'a cuxajtic soc te ya sch'uhunonic, ma ba ya xchamic sbahtel q'uinal. ¿Hich bal ach'uhunej? xchi.

²⁷ Hich, Cajwal; jch'uhunej te ha'at Cristohat, te Snich'anat Dios, te talemat ta bahlumilal, xchi.

Oc' Jesús ta smuquenal Lázaro

²⁸ C'alal laj yalbel a, baht sjuc ta c'op te María te yihts'in, hich muquen la yalbe: Hulix te Maestro, yac yic'belat, xchi.

²⁹ C'alal hich la ya'iy te María, ora la stehc'an sba, baht sjuc ta c'op te Jesús.

³⁰ Ma to ba ochem bahel ta tut pueblo te Jesús, tey to ay a te banti tahot yu'un te Marta.

³¹ Hich te judíohetic te talemic yu'un ya smuc'ubtesbe q'uinal ya'iyic, c'alal la yilic te la stehc'an sba ta ora te María soc te loc' bahele, la st'unic bahel, yu'un la yalic: Baht wan ta oq'uel ta muquenal, xchihic.

³² C'alal c'oht ta banti ay Jesús te María, c'alal la yil, la squejan sba ta ye'tal yoc, hich la yalbe: Cajwal, te li'uc ayate, ma ba cham te jbanquil te hichuque, xchi.

³³ C'alal la yil te Jesús te yac ta oq'uel te María soc te ha nix hich yaquic ta oq'uel te judíohetic te sjoquinejic tale, la spich' sba yo'tan, la smel yo'tan yu'un,

³⁴ hich la yal: ¿Banti c'oht awaq'uic? xchi. Con, ilawil, Cajwal, xchihic.

³⁵ Oc' te Jesús.

³⁶ Ha yu'un hich la yalic te judíohetique: Ilawilic, mero bayel c'ux ta yo'tan, xchihic.

³⁷ Pero ay yantic te hich la yalic: Te bin ut'il la sjambe sit ts'o'sit ha'i winic ini, ¿ma bal hu'uc yu'un te ma ba la yac' chamuc te Lázaro? xchihic.

Cha'cuxajtesot Lázaro

³⁸ Te Jesús la scha'pich' sba yo'tan, tal ta muquenal. Hotbil ton te muquenal soc ay muc'ul ton macbil sti'il a.

³⁹ La yal te Jesús: Loq'uesahic te tone, xchi. Pero te Marta te swix te mach'a chamen, la yalbe: Tuhix, Cajwal, como schanebalix c'ahc'al a, xchi.

⁴⁰ ¿Ma bal lajuc calbatix teme yac ach'uhun ya me awilbe yutsilal te Diose? xchi te Jesús.

⁴¹ Hich la sloq'uesic te ton ta banti yac'ojic hilel te chamen winique. Te Jesús la shach mohel sit ta toyol, hich la yal: Jtat, wocol awal te la awa'iybon te jc'ope.

⁴² Jna'oj te spisil ora yac awa'iybon jc'op, pero hich la jcal yu'un te tsobol ants-winiquetic li' sjoytayejonic, scuenta yu'un hich ya sch'uhunic a te ha'at aticonejon tal, xchi ta sc'oponel Dios.

⁴³ C'alal laj yalbel a te Jesús, tulan c'opoj: ¡Lázaro, loc'an talel! xchi.

⁴⁴ Hich loc' talel te chamen winique, bech'ticlambil yoc sc'ab ta pac', soc potsol sit yelaw ta chuhquilal. Halbotic yu'un te Jesús: Polbeyahic te spohtsil pac', ac'ahic bahel, xchi.

Chahp sc'oblal ta milel Jesús

⁴⁵ Te judíohetic te sjoquinejic te María, c'alal la yilic te bin la spas te Jesús, hich la sch'uhunic.

⁴⁶ Pero ay yantic te baht yalbeyic te fariseohetic te bin la spas te Jesús.

⁴⁷ Ha yu'un te principal sacerdotehetic soc te fariseohetic la stsobic te jchahpanwanejetic, hich la yalic: ¿Bin ya cutic? como bayel señahiletic yac spasticlambel te winique.

⁴⁸ Teme hich nax ya xhil cu'untic, spisilic ya sch'uhunic, soc hich ya xtal te romanohetic, ya me sjimbotic te ch'ul awilal cu'untic soc te nación cu'untique, xchihic.

⁴⁹ Ha yu'un c'opoj te jtuhle, Caifás sbihil, te muc'ul sacerdote ta hich ora, hich la yal: Mayuc bin yac ana'ic.

⁵⁰ Ma xana'ic te ha lec xan te jtuhl nax winic ya xlaj ta scuenta te pueblo, te bin ut'il te ya xlaj spisil te nación, xchi.

⁵¹ Ma stuquel-o'tanuc nax te hich la yal, pero como ha muc'ul sacerdote ta hich ora, la yal ta sc'op-jalwanej te ha ya xlaj ta scuenta te nación.

⁵² Soc ma ha'uc nax ta scuenta te nación, ha nix yu'un te ya stsob ta junax te yal-snich'nab Dios te puhquemique.

⁵³ Ha yu'un tey ora la schapbeyic sc'oblal ta milel a te Jesús.

⁵⁴ Ha yu'un te Jesús ma ba behen ta comonsitil ta yohlil te judíohetique, loc' tey a, baht ta jun lugar nopol ta jochol taquin q'uinal, ta jun pueblo Efraín sbihil; tey halaj soc a te jnopojeletic yu'un.

⁵⁵ Nopol sta yorahil a te Q'uin Pascua yu'un te judíohetic, tsobolic hahchic bahel tey a, bahtic ta Jerusalén yu'un ya slecubtes sbahic te ma to sta yorahil Pascua a.

⁵⁶ La slehic te Jesús, soc te c'alal ayic ta Templo a talel c'axel la sjoc'obe sbahic: ¿Bin xchihex yu'un? ¿Ma bal yacuc xtal ta il-q'uin? xchihic.

⁵⁷ Te principal sacerdotehetic soc te fariseohetic yalojic mandar teme ay mach'a ya sna' banti ay te Jesús, ac'a yalic scuenta yu'un ya stsaquic.