San Juan 10 - Bible in Tzeltal Bachajón

Sloc'ombahil c'op yu'un corral

¹ Jamal ya calbeyex, te mach'a ma ba ya x'och ta sti'il corral yu'un tuminchijetic, teme yan banti ya x'och, ha me j'elec' soc j'uts'inwanej abi.

² Yan te mach'a ya x'och ta sti'il, ha me te jcanan yu'un te tuminchijetic stuquel.

³ Te jcanan-ti'corral ya sjambe te ti'corral, soc te tuminchijetic ya ya'iybe te sc'ope; soc ya yalticlambe sbihil te tuminchijetic yu'un, hich ya yic'ticlan loq'uel.

⁴ Te c'alal ya sloq'ues spisil te tuminchijetic yu'un, ha ya xnahilij bahel; soc ya xt'unot bahel yu'un te tuminchijetic como ya sna'beyic sc'op.

⁵ Yan te mach'a ma ba ya sna'beyic sba, ma ba ya st'unic bahel stuquel, ya x'ahnic bahel ta stojol, como ma ba ya sna'beyic sba te sc'ope, xchi.

⁶ Ta scuenta te sloc'ombahil c'op ini la sc'oponlan, pero ma ba la sna'beyic scuentahil te bin halbotique.

Ha lequil jcanan-tuminchij te Jesús

⁷ Hich halbotic xan yu'un te Jesús: Jamal ya calbeyex, ho'on te ti'corralon yu'un te tuminchijetique.

⁸ Spisil te mach'atic nahil talic cu'un, ha j'eleq'uetic soc j'uts'inwanejetic stuquelic, pero ma ba a'iybot sc'opic yu'un te tuminchijetique.

⁹ Ho'on te ti'corralon, te mach'a ho'on ta jcuenta te ya x'och bahel, ya me xcol; ya x'och soc ya xloc', soc ya sta swe'el.

¹⁰ Te j'elec' ha nax ya xtal ta elec', ta milaw soc ta jinaw. Ho'on talemon scuenta yu'un ya yich' scuxlejalic, scuenta yu'un bayel ya yich' scuxlejalic a.

¹¹ Ho'on te lequil jcanan-tuminchijon; te lequil jcanan-tuminchij ya yac' scuxlejal ta scuenta te tuminchijetique.

¹² Yan te mach'a tojbil nax, te ma ha'uc te jcanan, te ma yu'unuc te tuminchijetic, teme ya yil ya xtal ha'mal ts'i', ya yihquitay hilel te tuminchijetic, ya xloc' ta ahnel. Hich te ha'mal ts'i' ya yochintay te tuminchijetic soc ya spucticlan bahel.

¹³ Ya xloc' ta ahnel te mach'a tojbil nax, como yac nax ta tojel soc mayuc sc'oblal ta yo'tan te tuminchijetique.

¹⁴ Ho'on te lequil jcanan-tuminchijon; ya jna'ticlambe sba te tuminchijetic cu'un, soc te tuminchijetic cu'un ya sna'bonic jba,

¹⁵ hich te bin ut'il ya sna'bon jba te Tatil soc te ya jna'be sba te Tatile; soc ya cac' jcuxlejal ta scuenta te tuminchijetique.

¹⁶ Ay to yantic tuminchijetic cu'un te ma ba ochemic ta corral, ya sc'an te ha nix hich ya quic'ticlan tal; ya me ya'iybonic jc'op, ha jtsohb nax ya xc'ohtic soc jtuhl nax jcanan yu'unic.

¹⁷ Ha yu'un c'uxon ta yo'tan te Tatil como ya cac' jcuxlejal, soc patil ya quich' xan te jcuxlejale.

¹⁸ Mayuc mach'a ya smilon, ho'on nix ya cac' jcuxlejal ta sc'anojel co'tan. Ay ta jcuenta ya cac' te jcuxlejal soc ay ta jcuenta te ya jcha'ich' xan te jcuxlejal. Hich pasbilon ta mandar yu'un te Jtate, xchi.

¹⁹ Te judíohetic yan buelta la stij sbahic ta c'op yu'un te bin la yal.

²⁰ Ay tsobolic la yalic: Ay pucuj ta yo'tan, sohquem sjol. ¿Bin stuc awu'un yac awa'iybeyic sc'op? xchihic.

²¹ Ay yantic la yalic: Ma hichuc sc'op te mach'a ay pucuj ta yo'tan. ¿Ya bal xhu' ya sjambe sit ts'o'sit te pucuje? xchihic.

Te judíohetic ya sp'ajic Jesús

²² Ha yorahil te q'uin yu'un yaq'uel ta stojol Dios te Templo ta Jerusalén. Yorahil sic a,

²³ te Jesús yac ta behel ta Templo ta slehch-na yu'un Salomón.

²⁴ C'oht ta joytayel yu'un te judíohetic, hich la yalbeyic: ¿Bin to ora te ma ba yac awac' jna'cotic? Teme ha'at Cristohat, hala ca'iycotic ta jamal, la yutic.

²⁵ La sjac' te Jesús: La jcalbeyexix, pero ma ba yac ach'uhunic. Ha testigo cu'un te a'teliletic yacon ta spasel ta scuenta sbihil te Jtate.

²⁶ Pero ma ba yac ach'uhunic, como ma ha'uquex te tuminchijex cu'un, hich te bin ut'il la jcalbeyexe.

²⁷ Te tuminchijetic cu'un ya ya'iybonic jc'op soc ya jna'ticlambe sba, soc ya st'unonic;

²⁸ soc ho'on ya ca'be scuxlejalic sbahtel q'uinal, ma jaymehl ya xch'ayic, soc mayuc mach'a ya xhu' ya spojbonic ta jc'ab.

²⁹ Te Jtat, te la yac'ticlambon te tuminchijetic, ha toyol yu'un spisil yantic, mayuc mach'a ya xhu' ya spojbe loq'uel ta sc'ab te Jtate.

³⁰ Jun ayon soc te Jtate, xchi.

³¹ Ha yu'un te judíohetic la scha'tamic xan ton yu'un ya sch'ojic a te Jesús,

³² pero la yal te Jesús: La jca'beyex awilic bayel lequil a'teliletic yu'un te Jtate. ¿Bin a'telil te yac ach'ojonic ta ton yu'une? xchi.

³³ La sjaq'uic te judíohetic: Ma ha'uc ya jch'ojatcotic ta ton yu'un te lequil a'telil, ha ya jch'ojatcotic ta ton yu'un te yac abohlc'optaybel Dios, como ha'at winicat yac acuybel aba ta Dios, xchihic.

³⁴ La sjac' te Jesús: ¿Ma bal hichuc ts'ihbabil ta Ley awu'unic: Ho'on caloj te ha'ex diosex, ma bal xchihuc?

³⁵ Teme, diosex, xchi sc'oblalic te mach'atic hul ta stojolic te sc'op Diose, (ma xhu' ya xch'ay te bin ts'ihbabil ta Shun Dios),

³⁶ ¿ha xan te mach'a tsahbil yu'un Dios soc te ticombil tal ta bahlumilal yu'un, te ha'ex yac awalic: Yac abohlc'optaybel Dios, xchihex, ta scaj te la jcal: Ha Snich'anon te Diose, te xchihone?

³⁷ Teme ma ba yacon ta spasbeyel ya'tel te Jtate, ma me xach'uhunonic.

³⁸ Yan teme yacon ta spasel, aunque ma ba yac ach'uhunonic, ch'uhunahic te a'teliletic, scuenta yu'un hich yac ana'ic soc hich yac ach'uhunic a te ay ta jtojol te Tatil soc te ayon ta stojol te Tatile, xchi.

³⁹ Ya c'an stsaquic yan buelta, pero col ta sc'abic.

⁴⁰ Cha'baht xan ta jehch Jordán te Jesús, ta banti nahil la yac' ich'-ha' te Juan; tey hil a.

⁴¹ Tsobol talic ta stojol, hich la yalic: Melel te Juan mayuc seña la spas stuquel; pero spisil te bin la yal te Juan sc'oblal te winic ini, melel nix a, xchihic.

⁴² Tsobolic la sch'uhunic tey a te Jesús.