Josué 22 - Bible in Tzeltal Bachajón

Te scajtajib ta chiq'uel mahtanil ta sti'il Jordán

¹ Ha yu'un te Josué la yic' tal te sts'umbal Rubén, Gad soc j'ohlil sts'umbal Manasés,

² hich la yalbe: Ha'ex la ac'ohtesic ta pasel spisil te bin la spasex ta mandar te Moisés te a'bat yu'un Jehová, soc la ach'uhumbonic spasel spisil te jc'op la jcalbeyexe.

³ Ma ba la awihquitayic te awermanotac te c'axix talel bayel tiempo c'alal ora yo'tic, ts'acal la ach'uhunic spasel te mandariletic yu'un Jehová te Dios awu'unique.

⁴ Ta ora ini, te Jehová te Dios awu'unic la ya'be scux yo'tanic te awermanotac hich te bin ut'il yaloj, ha yu'un suhtanic bahel ta anahilpaq'uic, ta q'uinal te la ya'beyex ta jehch ha' Jordán te Moisés te a'bat yu'un Jehová.

⁵ Ha nax ac'a c'ohtuc ta pasel awu'unic te mandariletic te la spasex ta mandar Moisés te a'bat yu'un Jehová: ha te c'uxuc me xawa'iy ta awo'tanic te Jehová te Dios awu'unic, te yacuc xbehenex ta spisil te behetic yu'un, te yacuc ach'uhunic te mandariletic yu'un, yacuc at'unic bahel soc yacuc awac' abahic ta a'batinel ta stojol ta spisil awo'tanic soc spisil ach'uhlelic, xchi.

⁶ Te Josué la yac'ticlambe bendición soc la sticonlan bahel, hich bahtic ta snahilpaq'uic.

⁷ Te Moisés ya'beyejix sq'uinalic ta Basán te j'ohlil jchahp yu'un Manasés; te yan j'ohlil, Josué la ya'be sq'uinalic ta yohlil te yermanotac ta stojol banti ya xmahl c'ahc'al yu'un Jordán. Ha nix hich te Josué la sticonlan bahel ta snahilpaq'uic, la yac'ticlambe bendición,

⁸ soc hich la yalbe: Suhtanic bahel ta anahilpaq'uic soc bayel c'ulejalil, bayel chambahlametic, plata, oro, bronce soc hierro, soc bayel c'u'ul pac'aletic; a'beyahic te awermanotac te pojbil biluquetic yu'un te acontrahique, xchi.

⁹ Hich te sts'umbal Rubén, Gad soc te j'ohlil sts'umbal Manasés suhtic bahel, la yihquitayic hilel te yantic snich'nab Israel ta Silo te ay ta sq'uinal Canaán, yu'un ya xbahtic ta sq'uinal Galaad, ta sq'uinal te la yu'untayic, hich te bin ut'il la yal mandar Jehová ta scuenta Moisés.

¹⁰ C'alal c'ohtic ta sti'il Jordán te ay ta sq'uinal Canaán, te sts'umbal Rubén, Gad soc te j'ohlil sts'umbal Manasés tey la spasic scajtajib ta chiq'uel mahtanil ta sti'il Jordán, mero muc' la spasic.

¹¹ Te snich'nab Israel c'alal la ya'iyic te sts'umbal Rubén, Gad soc te j'ohlil sts'umbal Manasés la spasic scajtajib ta chiq'uel mahtanil ta smojonil sq'uinal Canaán ta sti'il Jordán ta sjehchelul banti ay te yantic snich'nab Israel,

¹² la stsob sbahic spisil te pueblo yu'un te snich'nab Israel ta Silo yu'un ya ya'beyic guerra.

¹³ Pero nahil la sticonic bahel te Finees snich'an sacerdote Eleazar ta stojol te sts'umbal Rubén, Gad soc te j'ohlil sts'umbal Manasés ta sq'uinal Galaad,

¹⁴ soc joquinot bahel yu'un lajuntuhl príncipaletic, jujutuhl ta jujuchahp na yu'un tatiletic ta jujuchahp snich'nab Israel, te jujutuhl ha jtsobaw yu'un jujun na yu'un tatiletic ta jujuchahp snich'nab Israel.

¹⁵ C'alal c'ohtic ta banti ay te sts'umbal Rubén, Gad soc te j'ohlil sts'umbal Manasés ta sq'uinal Galaad, hich la yalbeyic:

¹⁶ Hich ya yal spisil te pueblo yu'un Jehová: ¿Bin a te chopol la apasic ini ta scontrahinel te Dios yu'un Israel, te la awihquitayiquix st'unel te Jehová, ha te la apasiquix scajtajib ta chiq'uel mahtanil scuenta atoybahilic ta stojol Jehová?

¹⁷ ¿Yu'un bal ma tic'uc a te mulil ta Peor, te ma to ba pocbilotic yu'un c'alal ora, te ha yu'un tal jmilawal-chamel ta stojol te pueblo yu'un Jehová,

¹⁸ te yo'tic yac awihquitayic st'unel te Jehová? Teme yac atoy abahic yo'tic ta stojol Jehová, pajel ya me xtihl yilimba ta stojol spisil te pueblo Israel.

¹⁹ Teme yac awa'iyic te bohloben sc'oblal te aq'uinalic, sohlanic tal ta q'uinal yu'un Jehová ta banti ay te Nahilpac' Templo yu'un Jehová, ich'a aq'uinalic ta cohlilcotic; pero ma xatoy abahic ta stojol Jehová soc ma xatoy abahic ta jtojolcotic, te yac apasic yan scajtajib ta chiq'uel mahtanil te bin ut'il ayix yu'un Jehová te Dios cu'untique.

²⁰ ¿Ma bal lajuc sta smul te Acán snich'an Zera yu'un te la stsac te bintic ac'bil ta scuenta lajel, te hich tal yilimba ta stojol spisil te pueblo Israel? Te winique ma ha'uc stuquel te laj yu'un te smule, xchihic.

²¹ Ha yu'un te sts'umbal Rubén, Gad soc te j'ohlil sts'umbal Manasés hich la suhtbeyic sc'op te jolaletic yu'un bayel ta mil israeletic:

²² ¡Te Jehová te Dios yu'un diosetic, Jehová te Dios yu'un diosetic, ha ya sna' soc ac'a ya'be sna' te Israel: Teme ha ta scuenta toybahil o teme ma junuc co'tancotic ta stojol Jehová, ma me xawac' ya xcuxajotcotic yo'tic!

²³ Teme la jpascotic scajtajib ta chiq'uel mahtanil yu'un te ma ba ya jt'uncotiquix te Jehová, o teme yu'un ya cac'cotic scohtol chic'bil mahtanil o mahtanil harina, o teme yu'un ya cac'cotic tey a te mahtanil scuenta lamal q'uinal, ha me ya yich'otcotic ta cuenta te Jehová.

²⁴ Ha la jpascotic yu'un la jxi'cotic te ta patil bahel te anich'nabic ya sjoc'obeyic te jnich'nabcotic: ¿Bin awochelic a te Jehová te Dios yu'un Israel?

²⁵ Te Jehová la yac' scuenta mojon te muc'ul-ha' Jordán te banti ayotcotic soc te banti ayex ha'ex te snich'nabex Rubén soc Gad; ma awochelicuc te Jehová, teme xchihique. Hich te awal-anich'nabic ya ya'be yihquitayic ich'el ta muc' Jehová te cal-jnich'nabcotique.

²⁶ Ha scuentahil hich la jcalcotic: Jpastic scajtajib ta chiq'uel mahtanil ta ora, ma yu'unuc scuenta scohtol chic'bil mahtanil o chic'bil mahtanil,

²⁷ pero ha testigo cu'untic ya xc'oht soc ha'ex soc te patil jts'umbaltic te ya xhu' ya cac' jbahcotic ta a'batinel ta stojol Jehová soc scohtol chic'bil mahtaniletic, milbil mahtaniletic soc mahtaniletic scuenta lamal q'uinal cu'uncotic; scuenta yu'un te awal-anich'nabic ma ba hich ya yalbeyic ta patil bahel te cal-jnich'nabcotic: Te ha'exe ma awochelicuc te Jehová, ma me xchihuquic.

²⁸ Ha yu'un la jcalcotic: Teme ta patil hich ya yalbotcotic o teme ya yalbeyic te jts'umbalcotic, hich ya jsuhtbecotic te sc'opic: Ilawil bin yilel te scajtajib ta chiq'uel mahtanil yu'un Jehová la spasic te jme'jtatcotique, ma yu'unuc scuenta scohtol chic'bil mahtaniletic o chic'bil mahtaniletic, pero scuenta testigo cu'untic, xchihotcotic me ta stojolic.

²⁹ Mayuc bin ora te ya jtoy jbahcotic ta stojol Jehová o te ma ba ya jt'uncotiquix te Jehová, te ya jpascotic scajtajib ta chiq'uel mahtanil yu'un scohtol chic'bil mahtaniletic, mahtaniletic harina o milbil mahtaniletic te yan a te bin ut'il te scajtajib ta chiq'uel mahtanil yu'un Jehová te Dios cu'untic te ay ta stojol te Nahilpac' Templo yu'une, xchihic.

³⁰ Te sacerdote Finees, te príncipaletic yu'un te pueblo soc te jtsobawetic yu'un bayel ta mil ta jtuhl yu'un Israel te sjoquinejic, c'alal la ya'iyic te bin la yalic te sts'umbal Rubén, Gad soc te j'ohlil sts'umbal Manasés, lec la ya'iyic.

³¹ Te Finees snich'an sacerdote Eleazar, hich la yalbe te sts'umbal Rubén, Gad, soc te j'ohlil sts'umbal Manasés: Yo'tic c'ohtix ta co'tancotic te ay ta cohliltic te Jehová, yu'un ma hichuc nopbil awu'unic spasel te bin chopol ta stojol Jehová. Hich la acoltayiquix ta sc'ab Jehová te snich'nab Israel, xchi.

³² Patil te Finees snich'an sacerdote Eleazar, soc te príncipaletic la yihquitayic hilel te snich'nab Rubén soc Gad, loq'uic bahel ta sq'uinal Galaad, suhtic ta sq'uinal Canaán te banti ay te snich'nab Israel, c'oht yalbeyic ya'iyic te suhtib te c'ope.

³³ Lec la ya'iyic te snich'nab Israel soc la yalbeyic wocol Dios yu'un. Ma ba la yaliquix te ya ya'beyic guerra soc te ya sjimbeyic te q'uinal banti nahinemic te snich'nab Rubén soc Gad.

³⁴ Te snich'nab Rubén soc Gad la ya'beyic sbihilin Ed te scajtajib ta chiq'uel mahtanil, yu'un hich la yalic: Ha testigo ta cohliltic te ha Dios te Jehová, xchihic.