Josué 15 - Bible in Tzeltal Bachajón

Sq'uinal Judá

¹ Te q'uinal te c'oht ta scuenta te sts'umbal Judá ta scuenta spasbeyel seña ta na'el, chican te jaychahp ayic, c'oht c'alal ta sti'il Edom, soc yich'oj te jochol taquin q'uinal Zin, ta stojol sur.

² Te sti'il ta stojol sur ha ya xloc' bahel ta ti' Mar Salado, ha te banti ay c'ab-ha' te ya yil bahel ta stojol sur,

³ ya xbaht ta stojol sur yu'un te mohel yu'un Acrabim, ya xc'ax bahel ta Zin, ya xmo bahel ta stojol sur yu'un Cades-barnea, ya xc'ax bahel ta Hezrón, ya xmo bahel ta Adar, ya yac' buelta ta Carca;

⁴ tey ya xc'ax bahel ta Asmón, ya xloc' bahel ta uc'um yu'un Egipto, soc ya xc'oht ta loq'uel ta ti' mar. Ha mojon ta stojol sur.

⁵ Te sti'il ta stojol banti ya xloc' tal c'ahc'al, ha te Mar Salado c'alal ta banti ya xc'oht ta ochel te muc'ul-ha' Jordán. Te sti'il ta stojol norte, ha ya xloc' bahel ta c'ab-ha' te banti ya xc'oht ta ochel ta mar te muc'ul-ha' Jordán,

⁶ ya xmo bahel ta Bet-hogla, ya xc'ax bahel ta stojol norte yu'un Bet-arabá, tey ya xmo bahel ta ton yu'un Bohán snich'an Rubén;

⁷ ya xmo xan bahel ta spamlej yu'un Acor c'alal ta Debir soc ya yac' buelta ta stojol Gilgal te snuhp'usitayej sba soc te mohel yu'un Adumín, te ay ta stojol sur yu'un te uc'um; ya xc'ax bahel ta ha'etic yu'un En-semes, ya xc'oht ta loq'uel ta sloq'uib-ha' Rogel;

⁸ ya xmo bahel te mojon ta sjuclej yu'un Ben-hinom te ay ta stojol sur yu'un jebuseo, ha te Jerusalén; ya xmo xan bahel ta bahwits te snuhp'usitayej sba soc te sjuclej Hinom, ta stojol smahlib c'ahc'al, ha te ay ta stojol norte yu'un te sjuclej Refaim;

⁹ ta bahwits ya yac' buelta c'alal ta sloq'uib-ha' yu'un te ha'etic yu'un Neftoa, ya xbaht xan c'alal ta pueblohetic yu'un te wits Efrón, tey ya yac' buelta c'alal ta Baala, ha te Quiriat-jearim;

¹⁰ ya yac' buelta ta Baala ya xbaht ta stojol banti ya xmahl c'ahc'al c'alal ta wits Seir, ya xc'ax bahel ta stojol norte yu'un te wits Jearim, ha te Quesalón, ya xco bahel ta Bet-semes, ya xc'ax bahel ta Timna;

¹¹ ya xbaht xan ta stojol norte yu'un Ecrón, ya yac' buelta c'alal ta Sicrón, ya xc'ax bahel ta wits Baala, ya xbaht ta Jabneel, soc ya xc'oht ta loq'uel ta mar.

¹² Te sti'il ta stojol banti ya xmahl c'ahc'al, ha te Muc'ul Mar. Ha te mojon ta sjoyobal te sq'uinal te snich'nab Judá, ha chican te jaychahp ayique.

Caleb ya stsal Hebrón soc Debir

¹³ Te Caleb snich'an Jefone, a'bot sq'uinal ta yohlil te snich'nab Judá, hich te bin ut'il pasot ta mandar yu'un Jehová te Josué: ha a'bot te Quiriat-arba, ha te Hebrón, te muc'ul pueblo yu'un te sts'umbal Anac.

¹⁴ Te Caleb la sten loq'uel tey a te oxtuhl sts'umbal Anac, ha te Sesai, Ahimán soc Talmai.

¹⁵ Patil baht ya'be guerra te mach'atic ayic ta Debir; ha te Quiriat-sefer sbihil ta nahil to.

¹⁶ Hich la yal te Caleb: Te mach'a ya yochintay te Quiriat-sefer soc teme ya stsal, ya ca'be yihnamin te cantsil-nich'an Acsa, xchi.

¹⁷ Te Otoniel snich'an Cenaz, te yihts'in Caleb, ha la stsal. Hich te Caleb la ya'be yihnamin te yantsil-nich'an Acsa.

¹⁸ Te c'alal yic'ojix a, te Otoniel la suj te Acsa te yacuc sc'ambe q'uinal te state. Ha yu'un te ants co ta sburro, te Caleb la sjoc'obe: ¿Bin yac ac'an? xchi.

¹⁹ La sjac': A'bon jmahtan. Te bin ut'il la awa'bon q'uinal ta Neguev, ha nix hich a'bon sloq'uib-ha'etic, xchi. Hich la ya'be te sloq'uib-ha'etic te ayic ta ahc'ol soc te ayic ta ahlan.

Te pueblohetic yu'un Judá

²⁰ Hich ay te q'uinal la yich' te sts'umbal Judá, ha chican te jaychahp ayique.

²¹ Te pueblohetic yu'un te sts'umbal Judá ta sur, ta stojol te sti'il Edom: ha te Cabseel, Edar, Jagur,

²² Cina, Dimona, Adada,

²³ Cedes, Hazor, Itnán,

²⁴ Zif, Telem, Bealot,

²⁵ Hazor-hadata, Queriot, Hezrón (ha te Hazor),

²⁶ Amam, Sema, Molada,

²⁷ Hazar-gada, Hesmón, Bet-pelet,

²⁸ Hazar-sual, Beerseba, Bizotia,

²⁹ Baala, Iim, Esem,

³⁰ Eltolad, Quesil, Horma,

³¹ Siclag, Madmana, Sansana,

³² Lebaot, Silhim, Aín soc Rimón. Ta spisil, baluneb scha'winic (29) pueblohetic soc te tut pueblohetic yu'unique.

³³ Ta ahlan q'uinal, ha te Estaol, Zora, Asena,

³⁴ Zanoa, En-ganim, Tapúa, Enam,

³⁵ Jarmut, Adulam, Soco, Azeca,

³⁶ Saaraim, Aditaim, Gedera soc Gederotaim; chanlajuneb (14) pueblohetic soc te tut pueblohetic yu'unique.

³⁷ Zenán, Hadasa, Migdal-gad,

³⁸ Dileán, Mizpa, Jocteel,

³⁹ Laquis, Boscat, Eglón,

⁴⁰ Cabón, Lahmam, Quitlis,

⁴¹ Gederot, Bet-dagón, Naama soc Maceda; waclajuneb (16) pueblohetic soc te tut pueblohetic yu'unique.

⁴² Libna, Eter, Asán,

⁴³ Jifta, Asena, Nezib,

⁴⁴ Keila, Aczib soc Maresa; baluneb pueblohetic soc te tut pueblohetic yu'unique.

⁴⁵ Ecrón soc te pueblohetic soc tut pueblohetic yu'une,

⁴⁶ c'alal Ecrón ha to c'alal ta mar, spisil te pueblohetic soc te tut pueblohetic yu'unic te nopol ayic ta Asdod.

⁴⁷ Asdod soc te pueblohetic soc tut pueblohetic yu'un; Gaza soc te pueblohetic soc tut pueblohetic yu'un c'alal ta uc'um yu'un Egipto soc ta ti'ti' Muc'ul Mar.

⁴⁸ Ta witsiltic: Samir, Jatir, Soco,

⁴⁹ Dana, Quiriat-sana (ha te Debir),

⁵⁰ Anab, Estemoa, Anim,

⁵¹ Gosén, Holón soc Gilo; bulucheb (11) pueblohetic soc te tut pueblohetic yu'unique.

⁵² Arab, Duma, Esán,

⁵³ Janum, Bet-tapúa, Afeca,

⁵⁴ Humta, Quiriat-arba (ha te Hebrón) soc Sior; baluneb pueblohetic soc te tut pueblohetic yu'unique.

⁵⁵ Maón, Carmel, Zif, Juta,

⁵⁶ Jezreel, Jocdeam, Zanoa,

⁵⁷ Caín, Gabaa soc Timna; lajuneb pueblohetic soc te tut pueblohetic yu'unique.

⁵⁸ Halhul, Bet-sur, Gedor,

⁵⁹ Maarat, Bet-anot soc Eltecón; waqueb pueblohetic soc te tut pueblohetic yu'unique.

⁶⁰ Quiriat-baal (ha te Quiriat-jearim) soc Rabá; cheb pueblohetic soc te tut pueblohetic yu'unique.

⁶¹ Ta jochol taquin q'uinal: Bet-arabá, Midín, Secaca,

⁶² Nibsán, Pueblo yu'un Ats'am, soc En-gadi; waqueb pueblohetic soc te tut pueblohetic yu'unique.

⁶³ Pero te snich'nab Judá ma ba hu' yu'unic sloq'uesel te jebuseohetic te nahinemic ta Jerusalén. Ha yu'un nahinemic ta Jerusalén soc te snich'nab Judá c'alal ora.